ރަސްމީ ގަޑި ނިމުނުފަހުން އައީ ކުއްލި ސިޓީ އެއް، ފެނަކައިގެ ޗެއަރމަނާއި 2 ބޯޑުމެމްބަރުން ވަކިކޮށްފި

މި ހަފްތާގެ ބުރާސްފަތިފަ ދުވަހުގެ ރަސްމީ ގަޑި ނިމުނުފަހުން ކުއްލިގޮތަކަށް ފެނަކައިގެ ޗެއަރމަނާއި 2 ބޯޑުމެމްބަރުން ވަކިކޮށްފިއެވެ.

ރާއްޖެ އެމްވީ އަށް މައުލޫމާތު ދެމުން ނަން ހާމަ ނުކުރުމަށް ޝަރުތުކޮށް ފެނަކަ ކޯޕަރޭޝަންގެ އިސް މަޤާމެއްގައި މަސައްކަތް ކުރާ މީހަކު ބުނީ މަޤާމުން ވަކިކޮށްފައި ވަނީ ޗެއަރމަން އަހުމަދު ޝަހީރު އާއި، އެގްޒެކެޓިވް ޑިރެކްތަރ އަދި ބޯޑު މެމްބަރު އިބްރާހިމް ނާއިދު އަދި ޑިރެޖްޓަރ އަހުމަދު އީހާބް ކަމަށެވެ. އަދި އެ ތިން މީހުން ވަކިކުރުމަށް ސިޓީ ފޮނުވާފައި ވަނީ ބުރާސްފަތި ދުވަހުގެ ރޭގެ ވަގުތެއްގައި ކަމަށް ރާއްޖެ އެމްވީ އަށް ވަނީ މައުލޫމާތު ލިބިފައެވެ. އެ ސިޓީގައި އެ މީހުން ވަކިކުރާ ސީދާ ސަބަބު ސާފުކޮށް ބަޔާންކޮށްފައި ނުވާ ކަމަށްވެސް ވަނީ އެނގިފައެވެ.

ރާއްޖެ އެމްވީ އަށް އެނގިފައިވާ ގޮތުން މީގެ ތެރެއިން އިބްރާހިމް ނާއިފް އަކީ ޕީއެންސީގެ ޗެއަރޕަރސަން އަދި މަޖިލީހުގެ ރައީސް އަބްދުއްރަހީމް އަބްދުﷲގެ ތިމާގެ ބޭފުޅެކެވެ. އަދި 2023ގެ ރިޔާސީ އިންތިޚާބުގެ ކުރިން ރައީސް ޑރ.މުހައްމަދު މުއިއްޒު އަށް ޕީއެންސީގެ ޓިކެޓް ހޯއްދަވާދެއްވަން ވެސް އެންމެ އިސްކޮށް އުޅުއްވި އެއް ބޭފުޅާ އަކީ ނާއިފް ކަމަށް ވަނީ އަޑު ފެތުރިފައެވެ. އެހެންކަމުން އަބްދުއްރަހީމްގެ ތިމާގެ ބޭފުޅަކު، އަދި ރައީސް މުއިއްޒު ވެރިކަމަށް ގެންނަވަން އެހާ ބުރަކޮށް މަސައްކަތް ކުރެއްވި ބޭފުޅަކު މިފަދަ ގޮތަކަށް މަޤާމުން ވަކިކުރުމުން ގިނަ ބަޔަކު ސުވާލު އުފައްދައެވެ.

ރާއްޖެ އެމްވީ އަށް އެނގިފައިވާ ގޮތުން މި 3 މީހުން ވަކިކޮށްފައި ވަނީ އެ ކުންފުނި ރިފޯރމްކުރުމުގެ މަސައްކަތް ކުރަމުން ދަނިކޮށެވެ. އެގޮތުން ކުންފުނީގެ ޕްރޮކިއުމެންޓް ޕޮލިސީ ބަދަލުކުރުމަށް 3 ވަނަ ބައްދަލުވުމެއް ބުރާސްފަތި ދުވަހު ބާއްވަން ތާވަލްކުރި ކަމަށް ވަނީ އެނގިފައެވެ. އެ ފަރާތްތަކުން މަސައްކަތް ކުރަމުން ދިޔައީ ޕްރޮކިއުމެންޓް ޕޮލިސީ ޕްރޮސީޖަރ އަށް ބަދަލުތަކެއް ގެނެސް ކޮރަޕްޝަނަށް މަގުފަހިވާ ގޮތަށް ކަންކަން ކުރަމުންދާ ދިއުން ހުއްޓުވުމަށެވެ. ރާއްޖެ އެމްވީ އާއި ވާހަކަދެއްކި މުވައްޒަފު ވަނީ މިހާރުވެސް ފެނަކަ ތެރޭގައި ކޮރަޕްޝަންގެ ކަންކަން ހިނގާ ކަމަށާއި ބޯޑު މެމްބަރުން ވަކި ކުރީ އެކަމަށް މަގުފަހިކުރުމަށް ނޫންތޯ ސުވާލު އުފެދޭ ކަމަށް ވިދާޅުވެފައެވެ.