ހުޅަނގު އައްސޭރީގައި އިސްރާއީލު ސިފައިން ހިންގި އޮޕަރޭޝަނެއްގައި ފަލަސްތީނުގެ ދެ މީހަކު ޝަހީދުކޮށްލައިފި
24 ސެޕްޓެމްބަރު 2023 | އާދީއްތަ 08:13ފަލަސްތީނުގެ މިނިވަން އަމިއްލަ ދައުލަތެއް ގާއިމު ކުރެވިގެން ނޫނީ މެދުއިރުމައްޗަށް ސުލުހަ ނުގެނެވޭނެކަމަށް އައްބާސް ވިދާޅުވި
އިސްރާއިލްގެ ހަތިޔާރު އެޅި ސިފައިން ހުޅަނގު އައްސޭރީގައި ހަރަކާތްތެރިވަނީ
ފަލަސްތީނުގެ ހުޅަނގު އައްސޭރީގައި އިސްރާއީލު ސިފައިން ހިންގި އޮޕަރޭޝަނެއްގައި ފަލަސްތީނުގެ ދެ މީހަކު ބަޑިޖަހައި މަރާލާފައިވާ ކަމަށް ފަލަސްތީނުގެ ސަލާމަތީ ސިފައިންނާއި ހަވާލާދީ އެގައުމުގެ ހެލްތު މިނިސްޓްރީން ބުނެފިއެވެ.
ތުލްކަރޭމް އަވަށުގައި ފަލަސްތީނުގެ ދެ މީހަކު ޝަހީދުކޮށްލާފައިވަނީ އިޒްރޭލުގެ ލައިވް ބަޑީގެ ހަމަލާތަކެއްގައި ކަމަށް އެ މިނިސްޓްރީން ބުނެފައިވާއިރު، އެ އަވަށުގެ ކައިރީގައި އޮންނަ ނޫރު ޝަމްސް ރެފިއުޖީ ކޭމްޕްގައި ހިނގި ހަމަނުޖެހުންތަކުގައި ސިފައިންގެ މީހަކު ޒަހަމްވެފައިވާ ކަން އަސްކަރިއްޔާއިން ވަނީ ކަށަވަރުކޮށްދީފަ އެވެ.
ފަލަސްތީނުގެ ސިއްހަތާ ބެހޭ ވުޒާރާއިން ބުނީ މަރުވި ދެ މީހުންނަކީ އުމުރުން 22 އަހަރުގެ އޮސައިދު އަބޫ އަލީ އާއި އަބްދުއްރަހްމާން އަބޫ ދަގާޝް، 32، ކަމަށެވެ.
އިސްރާއިލްގެ އަސްކަރިއްޔާއިން ނެރުނު ބަޔާނެއްގައި ބުނީ ކޭމްޕުގެ އިމާރާތެއްގެ ތެރޭގައި ހުރި "އޮޕަރޭޝަނަލް ކޮމާންޑް ސެންޓަރެއް" ސިފައިން ރޫޅާލައި ގިނަ އަދަދެއްގެ ގޮވާތަކެތި ނެރެފައިވާ ކަމަށެވެ.
މިހާދިސާގައި އިސްރާއިލް ސިފައިންނާއި، ދެކޮޅަށް ފަލަސްތީނުގެ ހަނގުރާމަވެރިންވެސް ރައްދު ދިންކަމަށާއި، އަދި ހަމަލާ ދިންކަމަށް ތުހުމަތު ކުރެވޭ މީހުން ހޯދުމުގެ މަސައްކަތް ކުރަމުން ދާކަމަށް އިސްރާއިލްގެ އަސްކަރިއްޔާއިން ބުނެއެވެ.
ފަލަސްތީނުގެ ހުޅަނގު އައްސޭރީގައި ކޮންމެދުވަހަކު ކަހަލަ ގޮތަކަށް އިސްރާއިލް ސިފައިން, އަނިޔާވެރި އަމަލު ތަކެއް ހިންގަމުންދާއިރު، އދ.ގެ ޢާއްމު ޖަލްސާގައި އެކަމާ ދެކޮޅަށް ފަލަސްތީނުގެ ރައީސް މަހުމޫދު އައްބާސްވަނީ އަޑު އުފުއްލަވާފައެވެ.
އަދި ފަލަސްތީނުގެ މިނިވަން އަމިއްލަ ދައުލަތެއް ގާއިމު ކުރެވިގެން ނޫނީ މެދުއިރުމައްޗަށް ސުލުހަ ނުގެނެވޭނެކަމަށް އޭނާ ދަނީ ތަކުރާރު ކޮށް ވިދާޅުވަމުންނެވެ.
