އިންޓަ މިއާމީން ޓޮރޮންޓޯ ބަލިކޮށްފި

މޭޖާ ލީގް ސޮކާ (އެމެރިކާ ލީގު) ގައި އިންޓަ މިއާމީން ޓޮރޮންޓޯއާ ދެކޮޅަށް ކުޅު މެޗުން މޮޅުވެއްޖެ އެވެ.

ބުދަ ދުވަހުގެ ރޭ ކުޅުނު މެޗު މިއާމީން ކާމިޔާބު ކުރީ 4-0 އިންނެވެ. މެޗުގައި އެ ޓީމުގެ ކެޕްޓަން ލިއޮނަލް މެސީ ވަނީ ކުޅެފަ އެވެ. އެއީ ޤައުމީ ޓީމާ އެކު ފީފާ ވޯލްޑް ކަޕް ކޮލިފިކޭޝަންގެ މެޗުތައް ކުޅުމަށް ފަހު އެވެ. ނަމަވެސް މެޗުގެ ވަކި ހިސާބަކުން މެސީ ވަނީ ބަދަލުކޮށްފަ އެވެ.

މެޗުގެ ފުރަތަމަ ހާފުގެ އިތުރު ވަގުތުގައި މިއާމީ އަށް ލީޑު ނަގައިދިނީ ފަކުންޑޯ ފާރިއާސް އެވެ. ދެ ވަނަ ހާފު ފަށައިގެން އަށް ވަނަ މިނެޓުގައި އެ ޓީމުގެ ދެ ވަނަ ލަނޑު ޖެހީ ރޮބާޓް ޓޭލާ އެވެ. އޭގެ ފަހުން މެޗުގެ 73 ވަނަ މިނެޓުގައި މިއާމީގެ ތިން ވަނަ ލަނޑު ޖެހީ ބެންޖަމިން ކްރެސްމަޗީ އެވެ. މިއާމީގެ ހަތަރު ވަނަ ލަނޑު 87 ވަނަ މިނެޓުގައި ޖެހީ، ދެ ވަނަ ލަނޑު ވެސް ޖެހި ޓޭލާ އެވެ.

ލީގުގައި ދެން މިއާމީ އަށް އޮންނާނީ އަންނަ ހޯމަ ދުވަހު އޯލަންޑް ސިޓީއާ ދެކޮޅަށް ކުޅޭ މެޗެވެ.