ފަހަތުން އަރައި މޮޅުވެ، ޗެމްޕިއަން ސިޓީ އަށް ރަނގަޅު ފެށުމެއް

ޔުއެފާ ޗެމްޕިއަންސް ލީގުގެ ގްރޫޕް ސްޓޭޖުގެ ފުރަތަމަ މެޗުގައި އެފްކޭ ކޫވްވެނާ ޒުވެޒްޑާ ބަލިކޮށް އެންމެ ފަހުގެ ޗެމްޕިއަން މެންޗެސްޓަރ ސިޓީން ފެށުން ރަނގަޅު ކޮށްފި އެވެ.

އަންގާރަ ދުވަހުގެ ރޭ ސިޓީގެ އިއްތިހާދު ސްޓޭޑިއަމްގައި ކުޅުނު މެޗުގައި ފުރަތަމަ ލަނޑު ޖަހައި ކުރި ހޯދީ އެފްކޭ ކޫވްވެނާ ޒުވެޒްޑާ އިންނެވެ. މެޗުގެ ފުރަތަމަ ހާފުގެ 45 ވަނަ މިނެޓުގައި އެ ޓީމަށް ލީޑު ނަގައިދިނީ އޮސްމާން ބުކާރީ އެވެ. އޭނާ ލަނޑު ޖެހީ މިކޯ އިވާނިކް ތަނަވަސްކޮށްދިން ފުރުސަތެއްގަ އެވެ. ސިޓީން މެޗުގައި ނަތީޖާ ހަމަހަމަަކޮށް، ލީޑު ނެގީ ވެސް ދެ ވަނަ ހާފުގަ އެވެ. ދެ ވަނަ ހާފު ފަށައިގެން ދެ ވަނަ މިނެޓުގައި ސިޓީ އަށް ނަތީޖާ ހަމަހަމަ ކޮށްދިނީ އާޖެންޓީނާގެ ހޫލިއަން އަލްވާރޭޒް އެވެ. އޭނާ ލަނޑު ޖަހަން ފުރުސަތު ތަނަވަސްކޮށްދިނީ ނޯވޭގެ އާލިން ހާލަންޑް އެވެ. މެޗުން ސިޓީ މޮޅުކޮށްދިން ލަނޑު ރޮޑްރީ ޖެހީ މެޗުގެ 70 ވަނަ މިނެޓުގަ އެވެ. އޭނާ އެ ލަނޑު ޖެހީ ފިލް ފޮޑެން ތަނަވަސްކޮށްދިން ފުރުސަތެއްގަ އެވެ.

މި ގްރޫޕްގައި އާރްބީ ލައިޕްޒިގުން ވަނީ ޔަންގް ބޯއީސްއާ ދެކޮޅަށް ކުޅުނު މެޗުން މޮޅުވެފަ އެވެ. ލައިޕްޒިގުން މެޗު ކާމިޔާބު ކުރީ 3-1 އިންނެވެ.

މި ގްރޫޕްގެ އެއް ވަނައިގައި އޮތް ލައިޕްޒިގާއި، ދެ ވަނައިގައި އޮތް ސިޓީ އަށް ލިބެނީ ތިން ޕޮއިންޓެވެ. ލައިޕްޒިގް ކުރި ހޯދަނީ ފައިދާ ލަނޑުންނެވެ.