"ގަރާޖުން ނުކުމެގެން ދިޔައިރު ކުރެވެމުން ދިޔައީ މަރު ގާތްވެއްޖެ ކަމުގެ އިޙުސާސް"

ލީބިޔާގެ އިރުއުތުރު އައްސޭރިފަށުގެ އަވަށެއް ކަމަށް ސޫސާގެ މަގުތައް މަތިން ފެންނަނީ ކިސަޑު ބޯވެފައި ވާ މަންޒަރާއި ހަލާކުވެފައި ވާ ކާރުތަކެވެ. އަހުމަދު އަލް ކަރްކަރާ އަކީ ސޫސާގެ ރަށްވެއްސެކެވެ. ނަމަވެސް، ލީބިޔާގެ އަދުގެ ތާރީޚު ދުށް އެންމެ ވަރުގަދަ ފެންބޮޑުވުމުގެ ކާރިޘާގައި، އަހުމަދުގެ ގެއާއި ކާރުތައް ވަނީ އޮޔާ ގެންގޮސްފައެވެ.

އެތައް ހާސް ބައެކޭ އެއްފަދައިން އަހުމަދުވެސް މިއަދު މަސައްކަތް ކުރަމުން ދަނީ ލިބުނު ގެއްލުމާއި ކުރިމަތިވި ހިތާމައާއި އެކުގައިވެސް ދިރިއުޅުމައިގެން ކުރިއަށް ދެވޭތޯއެވެ. ތޫފާނީ ގަދަ ވިއްސާރަގަނޑުގެ ތެރޭގައި އޭނާގެ ގެ، ފެނު އަޑިއަށް ޣަރަޤުވެގެން ދިޔަ ބިރުވެރި ރޭގެ ހަނދާންތަކުން މިންޖުވެވޭތޯ މަސައްކަތް ކުރަމުންނެވެ. އެ ގެއަކީ އޭނާގެ މާބަނޑު އަންހެނުންނާއި ދަރިންވެސް ދިރިއުޅެމުން ދިޔަ ހިޔާވައްސެވެ.

އެއީ ސެޕްޓެމްބަރ 10 ވީ އާދީއްތަ ދުވަހުގެ ދަންވަރުގެ ވަޤުތެކެވެ. ތޫފާނީ ގަދަވިއްސާރަގަނޑުގެ ތެރޭގައި، ޑޭމްތައް ފަޅަފަޅައިގެން ގޮސް، ރަށު ތެރެއަށް ފެންގަނޑު ބަންޑުންކޮށްލީއެވެ. ރަށު ތެރޭގެ ހާލަތު، އޮއެބާރު ކަނޑެއް ފަދައެވެ. އެތައް ފަންގިލާއަކަށް ހަދާފައި ވާ ގެތަށް، ކަނޑަށް ދަމައިގަތީ، އެ ގެތަކުގެ ތެރޭގައި ނިދާފައި ތިބި މީހުންނާވެސް އެކީގައެވެ.

ލީބިޔާއަށް ކުރިމަތިވި ގަދަވިއްސާރައާއި ފެންބޮޑުވުމުގެ ހިތްދަތި ކާރިޘާގައި މަރުވި މީހުންގެ ކަށަވަރު ޢަދަދެއް އަދިވެސް ލިބޭ ގޮތެއް ނުވެއެވެ. ރަސްމީ ތަފާސް ހިސާބުތަކުގައިވެސް ފަރަޤުތަކެއް އެބަ ހުއްޓެވެ. ނަމަވެސް، ކޮންމެ ޢަދަދެއްވެސް ހާހުން ގުނާލެވެއެވެ.

ކާރިޘާއަށް ހަފުތާއެއް ވާން ގާތްވެފައި ވާ އިރު، މަރުވި މީހުންގެ ޢަދަދު 11300 އަށް ވަނީ އަރާފައެވެ. ގެއްލިފައި ވާ މީހުންގެ ލިސްޓުގައިވެސް އިތުރު އެތައް ހާސް ބައެއްގެ ނަން އެބަ އޮތެވެ.

ހިޖުރަވެރިންނާ ބެހޭ ބައިނަލްއަޤުވާމީ ޖަމިއްޔާ (އައިއޯއެމް)އިން ހުކުރު ދުވަހު ހާމަ ކުރި ގޮތުގައި، ކާރިޘާގައި އެންމެ ބޮޑަށް އަސަރު ފޯރި އިރުއުތުރުގެ ސަރަޙައްދުތަކުގައި އެކަނިވެސް، 38640 އަށް ވުރެ ގިނަ މީހުންގެ ގެދޮރު ގެއްލިފައި އެބަ ތިބި ކަމަށެވެ.