މޮރޮކޯ ބިންހެލުން: "ކުރިއަށް އޮތީ ފިނި މޫސުން... އަތަކު ހަމަ އެކައްޗެއްވެސް ނެތް"

ސެޕްޓެމްބަރު 8 ވީ ހޮނިހިރު ވިލޭރޭ، މޮރޮކޯ ގަޑިން 11 ޖަހާ އެހާކަންހާއިރު އައި ވަރު ބާރުގަދަ ބިންހެލުމެއް އެ ޤައުމު ތަޖުރިބާ ނުކުރާތާ މިހާރު ޤަރުނަކަށްވުރެ ގިނަ ދުވަސް ވެއްޖެއެވެ. ރެކްޓަރ މިންގަނޑުން 6.8ގެ ބާރުމިނުގައި އައި ބާރުގަދަ އެ ބިންހެލުމުގައި ހާލުގައި ޖެހުނު އެތައް ހާސް ބަޔަކު އަދިވެސް ދިރިއުޅެމުން ދަނީ އިންތިހާ ދަތި ހާލުގައެވެ. ސެޕްޓެމްބަރ 12 ވީ އަންގާރަ ދުވަހުގެ ރެއަކީ ބިންހެލުމުގެ ކާރިޘާއަށް ފަހު މޮރޮކޯގެ އެތައް ހާސް ބަޔަކު މަގުތަކުގައި ނިދަން މަޖުބޫރުވި 4 ވަނަ ރެއެވެ. ބިންހެލުމުގައި އެންމެ ބޮޑަށް ގެއްލުންވި އެކަހެރި އަވަށްތަކަށް، ރެސްކިއު ޓީމުތަކަށް އަދި އުޅެނީ ރަނގަޅަށް ކައިރި ނުވެވިގެންނޭވެސް ދެންނެވިދާނެއެވެ.

ހައި އެޓްލަސް ފަރުބަދަތަކުގެ ސަރަޙައްދަށް އައި ބާރުގަދަ ބިންހެލުމުގެ ކާރިޘާގައި މަރުވި މީހުންގެ ޢަދަދު 2800 އަށް ވުރެ މައްޗަށް، އަދި ޒަޚަމްވީ މީހުންގެ ޢަދަދު 2500 އަށް ވުރެ މަތީގައި އުޅޭ އިރު، މި ޢަދަދުތައް އަދިވެސް މައްޗަށް އެރުން އެކަށީގެން ވާ ކަމަށް ބެލެވެއެވެ.

އަމިޒްމިޒްއަކީ ފަރުބަދަތަކުގެ ފެށޭ ހިސާބު ތިރީގައި އޮންނަ ބޮޑު އަވަށެކެވެ. މިއަދު އެއީ އެހީގެ މައި މަރުކަޒަކަށްވެސް ވެފައި އޮތް އަވަށެކެވެ. ބިންހެލުމުގެ ކާރިޘާގައި ގެދޮރު ގެއްލުނު ބައެއް މީހުންނަށް އެ ޤައުމުގެ ސަރުކާރުން ވަނީ ވަޤުތީ ޓެންޓުތަކެއް ފޯރުކޮށްދީފައެވެ. އަނެއް ބަޔަކަށް އަދިވެސް އޮތް ހަމަ އެކަނި ހިޔާވަހިކަމަކީ ރަޖާގަނޑެއްގެ މިންވަރެވެ. އެފަދަ އެކަކީ ވަޑާމުގެ މަސައްކަތުގައި އުޅެމުން ދިޔަ ނޫރައްދީން ބޫ ޔަޤީރުވާންއެވެ. ނޫރައްދީންގެ ދެމަފިރިންނާއި އޭނާގެ މައިދަތައާއި 2 ފިރިހެން ދަރިން މިވަޤުތު ހިޔާވަހިކަން ހޯދަމުން ދަނީ ރަޖާތަކުން ހަދާފައި ވާ ތަންކޮޅެއްގެ ތެރޭގައެވެ. ނޫރައްދީންގެ ފިރިހެން ދަރިންގެ ތެރެއިން އެއް ކުއްޖަކީ އޯޓިޒަމްވެސް ހުންނަ ކުއްޖެކެވެ.

ޓެންޓު ޖަހާފައި ވާ ކޭމްޕެއްގައި ދިރިއުޅެމުންދާ މަލީކާ ވަބީލާ ބުނި ގޮތުގައި ބިންހެލުމުގެ ކާރިޘާގައި އެމީހުންނަށް ހަމަ އެއްވެސް އެއްޗެއް ސަލާމަތް ކުރެވޭ ގޮތެއް ނުވިއެވެ.

މޮރޮކޯ ސިއްސުވާލި ވަރުގަދަ ބިންހެލުމުގެ ކާރިޘާއާ ގުޅިގެން ބައިނަލްއަޤުވާމީ ފެންވަރުގައި އެ ޤައުމަށް އެހީ ފޯރުކޮށްދިނުމުގެ މަސައްކަތް މިހާރުވެސް ދަނީ ކުރިއަށެވެ. އެގޮތުން ސްޕެއިން، އިނގިރޭސިވިލާތް އަދި ޤަޠަރުގެ ރެސްކިއު ޓީމުތަކުން ދަނީ މޮރޮކޯގައި މީހުން ސަލާމަތް ކުރުމުގެ މަސައްކަތުގައި ހަރަކާތްތެރި ވަމުންނެވެ. އިޓަލީވިލާތާއި ބެލްޖިއަމް އަދި ފަރަންސޭސިވިލާތާއި ޖަރުމަނުވިލާތުންވެސް ވަނީ ސްޕެޝަލިސްޓުން ފޮނުވަން ތައްޔާރަށް އޮތްކަން ހާމަކޮށްފައެވެ. އެކަމަށް ޢަމަލީ ސިފަ ލިބެނީ، މޮރޮކޯ ސަރުކާރުގެ ފެހި ސިގުނަލާއެކުގައެވެ.

ވަޤުތު ފާއިތުވަމުން ދާ ވަރަކަށް، އިތުރު ބަޔަކު ދިރި ތިއްބާ ފެނިދާނެ ކަމުގެ ޢުއްމީދުވެސް ދަނީ ފަނޑުވަމުންނެވެ. މޮރޮކޯގެ ފަރުބަދަމަތީ އަވަށްތަކުގައި ޢިމާރާތްތައް އާންމު ގޮތެއްގައި އަޅާފައި ހުންނަނީ އެންމެ އިހުގެ ކިސަޑު ގާ ބޭނުންކޮށްގެން ކަމުން، ޢިމާރާތްތައް ބިމާހަމަވެގެން ދާއިރު، ވައި ހިނގާނެ ކުޑަ ޖާގައެއް ނަމަވެސް ނޯވެއެވެ.