ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ހޮވާ އަހަރުގެ އެންމެ މޮޅު ކޯޗުންގެ ނޮމިނޭޝަންގައި ފަސް ކޯޗަކު ހިމެނިއްޖެ އެވެ.

ފީފާ އިން ހާމަކުރި ނޮމިނޭޝަންގައި ހިމެނެނީ، މެންޗެސްޓަރ ސިޓީ އަށް އިރުޝާދު ދެމުން އަންނަ ސްޕެއިންގެ ޕެޕް ގާޑިއޯލާ، ބާސެލޯނާ އަށް އިރުޝާދު ދެމުން އަންނަ ސްޕެއިންގެ ޒަވީ ހެނާންޑޭޒް، އިންޓަ މިލާނަށް އިރުޝާދު ދެމުން އަންނަ އިޓަލީގެ ސިމޯން އިންޒާގީ، ނަޕޯލީ އަށް ކުރި އިރުޝާދު ދިން އަދި މިހާރު އިޓަލީ ޤައުމީ ޓީމަށް އިރުޝާދު ދެމުން އަންނަ ލޫސިއާނޯ ސްޕަލެޓީ އަދި ޓޮޓެންހަމަށް އިރުޝާދު ދެމުން އަންނަ އޮސްޓްރޭލިއާގެ އެންޖް ޕޮސްޓެކޯގްލޫ އެވެ.

މީގެ ތެރެއިން އެންމެ ފާހަގަކޮށްލެވެނީ ގާޑިއޯލާ އަދި ޒަވީ އެވެ. ޒަވީ ބާސެލޯނާ އަށް ކުޅުނު ދުވަސްވަރު، ގާޑިއޯލާ ވަނީ އެ ޓީމުގައި އޭނާ އަށް އިރުޝާދު ދީފަ އެވެ. އޭގެ ކުރިން ގާޑިއޯލާ އާއި ޒަވީ ވަނީ، ކުޅުންތެރިންގެ ގޮތުގައި އެކުގައި ބާސެލޯނާ އަށް ކުޅެފަ އެވެ.

ގާޑިއޯލާ ވަނީ ސިޓީ އާއެކު ތިން ތައްޓެއް ކާމިޔާބުކޮށްފަ އެވެ. އެއީ އިނގިރޭސި ޕްރިމިއާ ލީގު، ޔުއެފާ ޗެމްޕިއަންސް ލީގު އަދި އެފްއޭ ކަޕް އެވެ. އެއީ ސިޓީން އެ ކުލަބުގެ ތާރީޚުގައި ވެސް ފުރަތަމަ ފަހަރަށް ޗެމްޕިއަންސް ލީގު ކާމިޔާބު ކުރި ފަހަރެވެ. މީގެ އިތުރުން މެންޗެސްޓަރ ޔުނައިޓެޑު ފިޔަވައި، އިނގިރޭސި ކުލަބަކުން ތިން ތަށި ކާމިޔާބު ކުރި ފުރަތަމަ ފަހަރެވެ. ބާސެލޯނާގެ ކޯޗުކަމާ ހަވާލުވެ، ޒަވީ ވެސް ވަނީ ކާމިޔާބު މަސައްކަތެއް ކޮށްފަ އެވެ. އޭނާ ވަނީ އެ ކުލަބާއެކު ސްޕެނިޝް ލީގު އަދި ސްޕެނިޝް ސުޕަ ކަޕް ކާމިޔާބު ކޮށްފަ އެވެ.

އިންޒާގީ ވަނީ އިންޓަ އާއެކު ޔުއެފާ ޗެމްޕިއަންސް ލީގުގެ ފައިނަލްގައި ވާދަކޮށްފަ އެވެ. ސްޕަލެޓީ ވަނީ 33 އަހަރަށްފަހު، ފުރަތަމަ ފަހަރަށް ނަޕޯލީ އަށް އިޓާލިއަން ލީގު ކާމިޔާބު ކޮށްދީފަ އެވެ.