ސައުދީ ޕްރޯ ލީގުގައި އަލް އަޚްދޫދާ ދެކޮޅަށް ކުޅުނު މެޗުން އަލް އިއްތިހާދު މޮޅޮވެއްޖެ އެވެ.

ބުރާސްފަތު ދުވަހުގެ ރޭ ކުޅުނު މެޗު އަލް އިއްތިހާދުން ކާމިޔާބު ކުރީ 1-0 އިންނެވެ. މެޗުން އަލް އިއްތިހާދު މޮޅުވީ 72 ވަނަ މިނެޓުގައި ފްރާންސްގެ ފޯވާޑް ކަރީމް ބެންޒެމާ ޖެހި ލަނޑުންނެވެ. މިއީ ސްޕެއިންގެ ރެއާލް މެޑްރިޑު ދޫކޮށް، އަލް އިއްތިހާދަށް ބަދަލުވި ބެންޒެމާ އެކުލަބަށް ކުޅެދިން 10 ވަނަ މެޗެވެ. މިހާތަނަށް ބެންޒެމާ ވަނީ އަލް އިއްތިހާދަށް ހަ ލަނޑު ޖަހައިދީފަ އެވެ. އޭގެ ތެރެއިން ތިން ލަނޑަކީ ސައުދީ ޕްރޯ ލީގުގައި އޭނާ ޖެހި ލަނޑެވެ. މެޗުގައި ބެންޒެމާގެ އިތުރުން އަލް އިއްތިހާދުގެ އެެހެން ކުޅުންތެރިންނަށް ވެސް ވަނީ ލަނޑު ޖަހާނެ ފުރުސަތު ލިބިފަ އެވެ. އެ ޓީމުގެ ފަބީނިއޯ އަށް ލަނޑު ޖަހާނެ ފުރުސަތު ލިބި ބޭކާރުވީއިރު، ރޮމާރީނޯ ފޮނުވާލި ބޯޅަ އެއް ވަނީ ގޯލުގެ ހުރަސް ދަނޑިއާ އަމާޒުވެފަ އެވެ.

މޮޅާއެކު އަލް އިއްތިހާދު ވަނީ ލީގު ތާވަލްގެ އެއް ވަނަ އަށް ޖެހިލައިފަ އެވެ. އެއީ މިހާތަނަށް އެ ޓީމު ކުޅުނު ހަ މެޗުން 15 ޕޮއިންޓެވެ. އަލް އިއްތިހާދު ވަނީ މި ސީޒަންގެ ލީގުގައި އެއް މެޗުން ބަލިވެފަ އެވެ. އަލް އިއްތިހާދުގެ ފަހަތުން ދެ ވަނައިގައި އޮތް އަލް ހިލާލަށް ލިބެނޫީ 13 ޕޮއިންޓެވެ. އެއީ އަލް އިއްތިހާދަށްވުރެ އެއް މެޗު މަދުން ކުޅެގެންނެވެ. މެޗުގެ އަދަދުން ހަމަކޮށްގެން، އެއް ވަނަ އަށް އެރުމުގެ ފުރުސަތު އަލް ހިލާލަށް އެބަ އޮތެވެ.