ޖެހުނު ހިސާބު ގޯސް، ކުރަންޖެހޭ ކަންކަން ސާފުވެއްޖެ: ފައްޔާޒު
ކެންޑިޑޭޓްގެ އިރުޝާދާ އެއްގޮތަށް ޓީމުތަކުން ގިއަރު އަދިވެސް މައްޗަށް ޖައްސާ
އެމްޑީޕީގެ ޗެއަރޕާސަން ފައްޔާޒު އިސްމާއިލް
ޖެހުނު ހިސާބު ގޯސް ކަމަށާއި ކުރަންޖެހޭ ކަންކަން ސާފުކުރެވިއްޖެ ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެއެވެ.
އާދިއްތަ ދުވަހު ފައްޔާޒު ކުރެއްވި ޓުވީޓެއްގައި ވިދާޅުވީ ޕާޓީން ކެމްޕޭން ރުކުރުވާލާ ނިކުންނަނީ ބުރަ މަސައްކަތާއެކު މި އިންތިހާބު ކާމިޔާބު ކުރުމަށް ކަމަށާއި މިރާއްޖެ އަނިޔާވެރިކަމާ ދިމާލަށް އަނބުރާ ދިޔަނުދިނުމަށް ކުރަންޖެހޭ ކަންކަން ކުރަން ކަމަށެވެ.
އުފާވެރި އަމާން ރާއްޖެ ހޯދުމަށް ދެންމިއޮތީ އެންމެ 18 ގަޑިއިރު ކަމަށް ވެސް ފައްޔާޒު ވިދާޅުވިއެވެ. އަދި ކެންޑިޑޭޓްގެ އިރުޝާދާ އެއްގޮތަށް ޓީމުތަކުން ގިއަރު އަދިވެސް މައްޗަށް ޖައްސާ، މި އިންތިހާބު ކާމިޔާބުކުރާނީ ބޮޑު ތަފާތަކުން ކަމަށް ވެސް ވިދާޅުވިއެވެ.
ފައްޔާޒު މިފަދައިން ވިދާޅުވެފައިވާއިރު އަނެއްކާވެސް ދެ ވަނަ ބުރަކަށް ޕްލޭންކުރައްވައިގެން ތައްޔާރުވެވަޑައިގަންނަވާނެ ކަމަށް ރައީސުލްޖުމްހޫރިއްޔާ އަދި ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ޞާލިހު ވަނީ ވިދާޅުވެފައެވެ.
ރައީސް ވަނީ ކުރިން ވިސްނިވަޑައިގެންފައިނުވާ ކަންތައްތަކެއް އިންތިޚާބުގައި ހިނގައި ގޮސްފައިވާ ކަމަށް ވިދާޅުވެފައެވެ. އަދި ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދުގެ ތާއީދު ހޯއްދަވަން މަސައްކަތް ކުރައްވާނަންތޯ ނޫސްވެރިއަކު ސުވާލެއް ދެންނެވުމުން ރައީސް ވިދާޅުވީ އިންތިޚާބުގެ ދެވަނަ ބުރުގައި ބަޔަކާއި ގުޅެން ޖެހޭ ކަމަށެވެ. ރައީސް ވިދާޅުވީ ކޯލިޝަން ހެދުމުގެ މަސައްކަތް ޕީޕީއެމް އާއި އެމްޑީޕީ އިން ވެސް ކުރަމުންދާނެ ކަަމަށެވެ. އަދި ކުރަން ޖެހޭ ހުރިހާ މަސައްކަތެއް ކުރައްވާނެ ކަމަށް ވެސް އެމަނިކުފާނު ވިދާޅުވިއެވެ.
މިފަހަރުގެ ރިޔާސީ އިންތިޚާބުގައި 101,180 ވޯޓާ އެކު ކުރި ހޯއްދަވާފައި ވަނީ މާލެ ސިޓީގެ މޭޔަރު އަދި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒުއެވެ. ދެވަނަ ލިބިވަޑައިގަތީ 85,935 ވޯޓާ އެކު ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓް އިބްރާހީމް މުހައްމަދު ޞާލިހެވެ.
