މިފަހަރުގެ ރިޔާސީ އިންތިޚާބުގައި ވޯޓްލާން ނުކުތީ 219843 މީހުން

ހޮނިހިރު ދުވަހު ކުރިއަށްގެންދިޔަ ރިޔާސީ އިންތިޚާބުގައި ވޯޓްލާން ނުކުތީ 219843 މީހުންކަން ހާމަވެއްޖެއެވެ.

މިފަހަރުގެ ރިޔާސީ އިންތިޚާބުގައި ވޯޓްލުމުގެ ހައްޤު ޖުމްލަ 282395 މީހުންނަށް ލިބިގެންވެއެވެ. ނަމަވެސް ވޯޓްލާން ނުކުތީ ޖުމްލަ 219843 މީހުންނެވެ. އެއީ ވޯޓްލީ މީހުންގެ 80 އިންސައްތައެވެ.

ރިޔާސީ އިންތިޚާބުގައި 101,180 ވޯޓާ އެކު ކުރި ހޯއްދަވާފައި ވަނީ މާލެ ސިޓީގެ މޭޔަރު އަދި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒުއެވެ. ދެވަނަ ލިބިވަޑައިގަތީ 85,935 ވޯޓާ އެކު ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓް އިބްރާހީމް މުހައްމަދު ޞާލިހެވެ.

ތިންވަނައިގައި އުޅުއްވަނީ 15,600 ވޯޓާއެކު ދަ ޑިމޮކްރެޓްސްގެ ކެންޑިޑޭޓު އިލްޔާސް ލަބީބެވެ. އުމަރު ނަސީރަށް 6،324 ވޯޓް ލިބިވަޑައިގެންނެވިއިރު ޖުމްހޫރީ ޕާޓީގެ ކެންޑިޑޭޓު ޤާސިމް އިބްރާހީމަށް ލިބިވަޑައިގަތީ 5،610 ވޯޓެވެ. އެމްއެންޕީގެ ކެންޑިޑޭޓު މުހައްމަދު ނާޒިމަށް 1،860 ވޯޓް ލިބިވަޑައިގެންނެވިއިރު އަމިއްލަގޮތުން ވާދަކުރެއްވި ފާރިސް މައުމޫނަށް ލިބިވަޑައިގަތީ 2،993 ވޯޓެވެ. އަދި އަމިއްލަ ގޮތުން ވާދަކުރެއްވި ހަސަން ޒަމީލަށް ލިބިވަޑައިގަތީ 341 ވޯޓެވެ.

ދެވަނަ ބުރަކަށް ރައީސް ސާލިހާއި މުއިއްޒު ވަޑައިގެންނެވިއިރު 2018 ގެ ރިޔާސީ އިންތިޚާބުގައި އެމްޑީޕީ އަށް 134,705 ވޯޓު ލިބުނެވެ. އެ އިންތިޚާބުގައި ޕީޕީއެމަށް 96,052 ވޯޓް ލިބުނެވެ.

ޕީޕީއެމް އިން ވަނީ މި ރިޔާސީ އިންތިޚާބުގައި ކުރީ އިންތިޚާބަށް ވުރެ 4000 ވަރަކަށް ވޯޓު އިތުރަށް ހޯދާފައެވެ. އަދި ސިޓީތަކުން ވެސް ކުރި ހޯދާފައި ވަނީ ވެސް ޕީޕީއެމްއިންނެވެ.