އަނެއްކާވެސް ދެ ވަނަ ބުރަކަށް ޕްލޭންކުރައްވައިގެން ތައްޔާރުވެވަޑައިގަންނަވާނެ ކަމަށް ރައީސުލްޖުމްހޫރިއްޔާ އަދި ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ރައީސް އެފަދައިން ވިދާޅުވީ އެމަނިކުފާނުގެ ރަސްމީ ކެމްޕެއިން އޮފީސް ސަރަހައްދުގައި ހުންނަވާ ބައެއް ނޫސްވެރިން ދެންނެވި ސުވާލުތަކަށް ޖަވާބުދެއްވަމުންނެވެ.

ރިޔާސީ އިންތިޚާބުގައި 101،180 ވޯޓާއެކު ކުރި ހޯއްދަވާފައި ވަނީ މާލެ ސިޓީގެ މޭޔަރު އަދި ޕީއެންސީގެ ކެންޑިޑޭޓް ޑރ.މުހައްމަދު މުއިއްޒުއެވެ. އެއީ ވޯޓުލީ މީހުންގެ 46.02 އިންސައްތައެވެ.

ދެވަނަ ލިބިވަޑައިގަތީ 85،935 ވޯޓާއެކު ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓް އިބްރާހީމް މުހައްމަދު ޞާލިހެވެ.

މިފަހަރުގެ ރިޔާސީ އިންތިޚާބުގައި ވޯޓުލުމުގެ ހައްޤު ލިބިގެންވާ މީހުންގެ އަދަދު 282،395އަށް އަރައެވެ.

މިއީ އުންމީދުކުރި ނަތީޖާ ތޯ ނޫސްވެރިޔަކު ސުވާލެއް ދެންނެވުމުން ރައީސް ވަނީ ކުރިން ވިސްނިވަޑައިގެންފައިނުވާ ކަންތައްތަކެއް އިންތިޚާބުގައި ހިނގައި ގޮސްފައިވާ ކަމަށް ވިދާޅުވެފައެވެ. އަދި ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދުގެ ތާއީދު ހޯއްދަވަން މަސައްކަތް ކުރައްވާނަންތޯ ނޫސްވެރިއަކު ސުވާލެއް ދެންނެވުމުން ރައީސް ވިދާޅުވީ އިންތިޚާބުގެ ދެވަނަ ބުރުގައި ބަޔަކާއި ގުޅެން ޖެހޭ ކަމަށެވެ. ރައީސް ވިދާޅުވީ ކޯލިޝަން ހެދުމުގެ މަސައްކަތް ޕީޕީއެމް އާއި އެމްޑީޕީ އިން ވެސް ކުރަމުންދާނެ ކަަމަށެވެ. އަދި ކުރަން ޖެހޭ ހުރިހާ މަސައްކަތެއް ކުރައްވާނެ ކަމަށް ވެސް އެމަނިކުފާނު ވިދާޅުވިއެވެ. އަދި އާދިއްތަ ދުވަހު އެކަމާމެދު އިތުރު ގޮތްތަކެއް ކަނޑައަޅުއްވާނެ ކަމަށް ވެސް ރައީސް ސާލިޙު ވިދާޅުވިއެވެ.