ޖަރުމަނުގެ ގޯލު ނޯޔާއަށް ދޭކަށް ބޭނުމެއްނޫން: ޓާސްޓެގަން
ނޯޔާ ހުރެގެން އެންމެ ފަހުގެ ދެ ވޯލްޑްކަޕުން ވެސް ވަނީ ފެއިލްވެފައި
ޓާސްޓެގަންއާއި ނޯޔާ - ގައުމީ ޓީމު އެއްވަނަ ކީޕަރުގެ ވާދަވެރިކަން ބޮޑު
ޖަރުމަނުގެ ގައުމީ ކީޕަރުކަން ކެޕްޓަން މެނުއަލް ނޯޔާއަށް ދޭން ބޭނުން ނުވާކަމަށް މިހާރުގެ, އެއްވަނަ ކީޕަރު މެނުއަލް މާކް އަންދްރޭ ޓާސްޓެގަން ބުނެފިއެވެ.
ބާސެލޯނާގެ ކީޕަރު ޓާސްޓެގަން ކުލަބުގައި މޮޅަށް ކުޅުނަސް އޭނާއަށް ގައުމީ ޓީމުގެ އެއްވަނަ ކީޕަރުކަން ލިބުނީ ނޯޔާއަށް އަނިޔާވެ ކުޅުމާ ދުރުގައި ހުންނަން ޖެހުމުންނެވެ. މިއީ މިގޮތަށް ޓާސްޓެގަންއަށް ގައުމީ ޖާޒީގައި ކުޅެން ލިބުނު ދެވަނަ ފަހަރެވެ.
ބައެއް ތަޖުރިބާކާރުން ދެކޭގޮތުގައި ނޯޔާއަށްވުރެ މޮޅަށް މިދިޔަ ހައެއްކަ އަހަރު ކުޅުނީ ޓާސްޓެގަންއެވެ. ނަމަވެސް ނޯޔާއަށް އެއްވަނަ ކީޕަރުކަން ލިބެނީ އޭނާގެ ކުލަބު ޖަރުމަނުގެ ބަޔާން މިއުނިކްގެ ނުފޫޒުންނެވެ. ގައުމީ ޓީމުގެ މިހާރުގެ ކޯޗު ހަންސީ ފްލިކަކީވެސް ބަޔާންގެ ކުރީގެ ކޯޗެވެ. އަދި ފެޑަރޭޝަނުގެ އިސްވެރިންގެ ތެރޭގައި ގިނައީވެސް ބަޔާންއަށް ނިސްބަތްވާ މީހުންނެވެ. ނޯޔާއަކީ ގައުމީ ޓީމާއި ބަޔާންގެވެސް ކީޕަރު އަދި ކެޕްޓަނެވެ.
އެއްވަނަ ކީޕަރުގެ މައްސަލާގައި ނޯޔާއާއި ޓާސްގެޓަންގެ ގުޅުންވެސް އެހާ ރަނގަޅެއްނޫނެވެ.
2014 ވަނަ އަހަރުގެ ވޯލްޑްކަޕް ޖަރުމަނަށް ހޯދައިދީ ވޯލްޑްކަޕުގެ މޮޅު ކީޕަރުކަން ހޯދިނަމަވެސް، ނޯޔާ ހުއްޓައި އެންމެ ފަހުގެ ދެ ވޯލްޑްކަޕުން ވެސް ޖަރުމަނު ވަނީ ކަޓާފައެވެ. މީގެ ތެރޭގައި އޭނާ ގިނަ ދުވަހު އަނިޔާގެ ސަބަބުން ނުކުޅެ ހުރުމަށްފަހު ފޯމަކަށް ނޭޅި ގައުމީ ކީޕަރުކަން ކުރުމުގެ ނަތީޖާ ގޯސްކަމަށް ގިނަ ބަޔަކު ދެކެއެވެ.
