އިނގިރޭސި ޕްރިމިއަރ ލީގުގައި ހޯމަދުވަހުގެ ރޭ، އެވަޓަން އާއި މެންޗެސްޓަރ ސިޓީ ބައްދަލުކުރި މެޗު އެއްވަރުވެގެން ނިމިއްޖެއެވެ.

މެންޗެސްޓާ ސިޓީގެ އަމިއްލަ ދަނޑު ކަމަށްވާ އިތިހާދު ސްޓޭޑިއަމްގައި ކުޅުނު މި މެޗު އެއްވަރުވެފައި ވަނީ 1-1 ގެ ނަތީޖާއިންނެވެ.

މި މެޗުގެ ކުރީކޮޅު ސިޓީން ރަނގަޅު ކުޅުމެއް ދެއްކިއިރު އެ ޓީމުން ވަނީ އެވަޓަންގެ ގޯލަށް ނުރައްކާތެރި ގިނަ ހަމަލާތަކެއް ފޮނުވާލާފައެވެ. އެގޮތުން ޑޭވިޑް ސިލްވާ ފޮނުވާލި ހަމަލާއެއް އެވަޓަންގެ ގޯލުގެ ދަނޑިއަށް އަމާޒުވެފައިވާއިރު، އަގުއެރޯ ފޮނުވާލި ބާރު ހަމަލާއެއް އެވަޓަންގެ ކީޕަރު ވަނީ ދިފާއުކޮށްފައެވެ.

ސިޓީން މެޗު ކޮންޓްރޯލް ކޮށްގެން ރަނގަޅަށް ކުޅެމުން ދަނިކޮށް މެޗުގެ 35 ވަނަ މިނެޓްގައި އެވަޓަންއިން ވަނީ ގޯލެއް ކާމިޔާބުކޮށް ލީޑުނަގާފައެވެ. މި ގޯލު އެޓީމަށް ކާމިޔާބުކޮށްދިނީ ތަޖުރިބާކާރު ފޯވާޑް ވޭން ރޫނީއެވެ. މީ މިފަހަރުގެ ސީޒަންގައި ރޫނީ ކާމިޔާބުކުރި ދެވަނަ ގޯލެވެ. އޭނާ ވަނީ އެންމެ ފުރަތަމަ ސްޓޯކްއާ ދެކޮޅަށް ކުޅުނު މެޗުގައި ގޯލެއް ޖަހައިދީފައެވެ.

މި ގޯލާއެކު ޕްރިމިއަރ ލީގުގައި ރޫނީ ކާމިޔާބުކުރި ޖުމްލަ ގޯލުގެ އަދަދު މިހާރު ވަނީ 200 އަށް އަރާފައެވެ.

މެޗުގެ ލީޑު އެވަޓަންއިން ނެގިއިރު ސިޓީއަށް އިތުރު މައްސަލަތަކެއް ދިމާވީ ފުރަތަމަ ހާފް ނިމެން ދަނިކޮށް އެޓީމުގެ ޑިފެންޑަރު ކައިލް ވޯކާއަށް ދެވަނަ ރީނދޫ ކާޑާއެކު ރަތް ކާޑު ދެއްކުމުންނެވެ.

އެއް ކުޅުންތެރިޔަކު މަދުކޮށް ފަހު ހާފުގެ 45 މިނެޓު ސިޓީން ފުރިހަމަކުރަން ޖެހުނުނަމަވެސް ދެވަނަ ހާފްގައި އެޓީމުން ދިޔައީ އެވަޓަންގެ ފަހަތަށް ބާރުބޮޑުކުރަމުންނެވެ. އެގޮތުން މެޗުގެ 82 ވަނަ މިނެޓްގައި ރަހީމް ސްޓާލިން ވަނީ ގޯލެއް ކާމިޔާބުކޮށްދީ އެޓީމަށް ނަތީޖާ އެއްވަރުކޮށްދީފައެވެ. ސްޓާލިން މި ގޯލު ކާމިޔާބުކުރީ އެވަޓަންގެ ޕެނަލްޓީއޭރިއާގެ ބޭރުގައި ހުރެ ފޮނުވާލި ބާރު ހަމަލާއަކުންނެވެ.

މި ގޯލަށްފަހު ވެސް ސިޓީން ރަނގަޅަށް ކުޅެމުންދިޔަނަމަވެސް މާ ރަނގަޅު ފުރުސަތެއް އެޓީމަށް ލިބިފައެއް ނުވެއެވެ. މެޗުގެ ފުރިހަމަ ވަގުތު ހަމަވާން ދަނިކޮށް މެޗުގެ 88 ވަނަ މިނެޓްގައި އެވަޓަންގެ މޯގަން ޝްނައިޑެލިންއަށް ވެސް ވަނީ ދެވަނަ ރީނދޫ ކާޑާއެކު ރަތްކާޑު ދައްކާ ދަނޑުން ފޮނުވާލާފައެވެ. އޭނާއަށް ދެވަނަ ރީނދޫކާޑު ދެއްކީ އަގުއޭރޯއަށް ފައުލްކުރިކަމަށް ބަލާފައެވެ.

ލީގުގައި ސިޓީން ދެން ބައްދަލުކުރާނީ ބޯންމަތްއާއެވެ. އެވަޓަން ނިކުންނާނީ ޗެލްސީއާ ދެކޮޅަށެވެ.