ނޯޔާއަށް އިންޖަރީވެ ކުޅުމާ ދުރަށް

ޖަރުމަނުގެ ބަޔާން މިއުނިކަށް ކުޅެމުން އަންނަ ގޯލްކީޕަރު މެނިއެލް ނޯޔާއަށް އިންޖަރީވެ ކުޅުމާ ދުރަށް ދާން ޖެހިއްޖެއެވެ.

އެ ކްލަބުން ނެރުނު ބަޔާނެއްގައި ބުނެފައިވަނީ ތަމްރީނުތަކުގައި އޭނާގެ ފަޔަށް ލިބުނު އަނިޔާއަކާ ގުޅިގެން އޭނާގެ ފައިގެ ޓެސްޓްތަކެއް ހެދުމަށް ނިންމާފައިވާ ކަމަށެވެ. ރިޕޯޓުތައް ބުނާ ގޮތުން ނޯޔާގެ ފައިގެ ކައްޓަށް ވަނީ ގެއްލުންވެފައެވެ. އޭނާވަނީ މިދިޔަ ސީޒަނުގައިވެސް ފައިގެ ކައްޓަކަށް ލިބުނު އަނިޔާއަކާ ގުޅިގެން ވަރަށް ގިނަ މެޗުތަކެއް ކުޅުމާ ދުރުގައި ހޭދަކޮށްފައެވެ. މިފަހަރުވެސް އޭނާއަށް ލިބުނު އަނިޔާއަކީ ހަމަ ކުރިން ސީޒަނުގައިވެސް އަނިޔާވި ފަޔަށް ލިބުނު އަނިޔާއެއް ކަމަށް ޖަރުމަނުގެ ނޫސްތަކުން އަންނަނީ ބުނަމުންނެވެ.

މި އަނިޔާއާ ގުޅިގެން ބަޔާންއިން ބުނެފައިވަނީ ޝާލްކޭއާ ދެކޮޅަށް ބުންޑަސްލީގާގައި ކުޅޭ މެޗުގެ ސްކޮޑުގައި އޭނާ ހިމަނާފައި ނުވާކަމަށެވެ. ބުންޑެސްލީގާގެ ތަށި ދިފާއު ކުރުމަށް ބަޔާންއިން މަސައްކަތް ފަށާފައިވާއިރު ނޯޔާއަށް އިންޖަރީ ވުމަކީ އެ ކްލަބަށް ދިމާވާނެ ވަރަށް ބޮޑު ގޮންޖެހުމެއް ކަމަށް ގިނަ ބަޔަކު ގަބޫލްކުރެއެވެ. ނޯޔާއަށް އެންމެ ފަހުން އިންޖަރީއާ ކުރިމަތިލާން ޖެހުނު ފަހަރުވެސް އޭނާ ވަނީ 133 ދުވަހު ކުޅުމާއި ދުރުގަ ހުރެފައެވެ.

ގިނަ ބަޔަކު ދެކޭ ގޮތުގައި ނޯޔާއަކީ ދުނިޔޭގައި މިވަގުތު ހުރި އެންމެ މޮޅު ކީޕަރެވެ. އޭނާ ވަނީ ބަޔާންއަށް 190 މެޗު ކުޅެދީ އެ ޓީމާއެކު 13 ތަށި ކާމިޔަބުކޮށްފައެވެ. 2014 ވަނަ އަހަރު ޖަރުމަނާއެކު ވޯލްޑްކަޕް ކާމިޔާބުކުރި ނޯޔާވަނީ ޔުއެފާގެ އެންމެ މޮޅު ގޯލްކީޕަރުގެ މަގާމް ހަތަރު ފަހަރު ހޯދާފައެވެ.