އިނގިރޭސިން އައްޑޫގައި ތިބެގެން އައި ތަރައްޤީ އަށް ވުރެ މާބޮޑު ތަރައްްޤީ މި ސަރުކާރުން ގެނެސްދީފައިވޭ - އަސްލަމް
މާޒީގެ އަނިޔާވެރިކަމަށް އައްޑޫ ދޫކޮށްލައިގެން ނުވާނެ ކަމަށް އަސްލަމް ވިދާޅުވި
އުފާވެރި އަމާން ރާއްޖެ - އުފާވެރި އައްޑޫ ޖަލްސާގައި އަސްލަމް ވާހަކަފުޅު ދައްކަވަނީ
އިނގިރޭސިން އައްޑޫގައި ތިބެގެން އައި ތަރައްޤީ އަށް ވުރެ މާ ބޮޑު ތަރައްޤީ އާއި ފުރިހަމަ ސްޓްރަކްޗަރ މި ސަރުކާރުން ގެނެސްދީފައިވާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ރަނިންމޭޓް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ވިދާޅުވެއްޖެއެވެ.
އަސްލަމް އެފަދައިން ވިދާޅުވީ އުފާވެރި އަމާން ރާއްޖެ - އުފާވެރި އައްޑޫ ކެމްޕެއިން ޖަލްސާގައި ވާހަކަފުޅު ދައްކަވަމުންނެވެ.
އަސްލަމް ވަނީ އައްޑޫގެ ތަރައްްޤީއަށްޓަކައި މި ސަރުކާރުން ކުރިއަށް ގެންދިޔަ މަޝްރޫޢުތަކާއި ވާދަކުރެވޭނެ އެހެން ސަރުކާރެއް ނެތް ކަމަށް ވިދާޅުވެފައެވެ. އެ ތަރައްޤީ އާއި އިންފްރާސްޓްރަކްޗަރާއި ކިރިޔާ ވެސް ވާދަކުރެވޭނީ އިނގިރޭސިން އައްޑޫގައި ތިބެގެން ގެނައި އިންފްރާސްޓްރަކްޗަރުގެ ކަންކަން ކަމަށް އަސްލަމް ވިދާޅުވިއެވެ. އަސްލަމް އިތުރަށް ވިދާޅުވީ ރައްޔިތުންގެ އިތުބާރަކީ ދޭ ފައިސާކޮޅަކުން ނުވަތަ ފަތުރާ ވާހަކައަކުން ލިބޭ އެއްޗެއް ނޫން ކަމަށެވެ. އަދި ރައްޔިތުންގެ އިތުބާރު ލިބެނީ ކަންކަން ކޮށްދީ އެ އިތުބާރު ހޯދަން އެނގިގެން ކަމަށް އަސްލަމް ވިދާޅުވިއެވެ.
މީގެ އިތުރުން ރައީސް އަކީ ފޮޓޯ އެއް ހޯދުމަށްޓަކައި ނުވަތަ އެފަދަ އެހެން މަގްސަދެެއް އޮވެގެން މަސައްކަތްކުރައްވާ ބޭފުޅެއް ނޫން ކަމަށް ވެސް އަސްލަމް ވިދާޅުވިއެވެ. އެކަމުގެ މިސާލެއްގެ ގޮތުން އަސްލަމް ދެއްކެވީ ދާދިފަހުން އައްޑޫގައި ކުނިން ހަކަތަ އުފެއްދުމުގެ މަސައްކަތް ފެށުމަށް ބޭއްވި ރަސްމިއްޔާތުގައި ރައީސް ވަޑައިނުގެން ކުރިއަށް ގެންދެވުމެވެ. އެތަން ހުޅުވީ ރައީސް އައްޑޫ އަށް ވަޑައިގަންނަވަން އޮތް ދުވަހު ކަމަށްވީ ނަމަވެސް ފޮޓޯއެއް ނަންގަވަން ރައީސް ވަޑައިގަންނަވަން ދެން އެފަދަ މަސައްކަތްތައް ނުކޮށް ނުތިއްބަވާނެ ކަމަށް އަސްލަމް ވިދާޅުވިއެވެ. ކަންދެއްކުމުގެ ބަަދަލުގައި އަބަދުވެސް ރައީސް ބައްލަވަނީ އާއްމުންނަށް ކަންކަން ކޮށްދެވޭތޯ ކަމަށް އަސްލަމް ވިދާޅުވިއެވެ.
މީގެއިތުރުން މި ސަރުކާރުން ރާއްޖޭގެ އެކި ހިސާބުތަކުގައި ތަރައްޤީގެ ގިނަ މަޝްރޫޢުތަކެއް ހިންގާ ކަމަށް އަސްލަމް ވިދާޅުވިއެވެ. އަސްލަމް ވިދާޅުވީ މި ސަރުކާރުން 125 ރަށުގައި ބަނދަރު ޤާއިމްކޮށްދީފައިވާ ކަމަށާއި އިތުރު އެތައް ރަށެއްގެ ބަނދަރުގެ މަސައްކަތް ކުރިއަށް ދާކަމަށް އަސްލަމް ވިދާޅުވިއެވެ. ހަމައެހެންމެ 1500 އަށް ވުރެ ގިނަ ކްލާސްރޫމާއި 78 ރަށުގައި ހޮސްޕިޓަލް ނުވަތަ ސިއްހީ މަރުކަޒު ތަރައްޤީ ކުރުން ކުރިއަށް ދާ ކަމަށާއި 30 އެނދުގެ 12 ހޮސްޕިޓަލް މި ދައުރުގައި ޤާއިމްކޮށްފައިވާ ކަމަށް އަސްލަމް ވިދާޅުވިއެވެ. އެހެންކަމުން މި ދަައުރަކީ އުފެއްދުންތެރި އަވަސް މަސައްކަތްތަކެއް ކުރި ދައުރެއް ކަމަށް އަސްލަމް ވިދާޅުވިއެވެ.
އަސްލަމް ވަނީ އައްޑޫ އަށް ރައީސް ޞާލިހު ނޫން ގޮތެއް ނެތްކަމަށާއި މާޒީގެ އަނިޔާވެރިކަމަށް އައްޑޫ ދޫކޮށްލައިގެން ނުވާނެ ކަމަށް ވިދާޅުވެފައެވެ.
