"އަހަރެމެންގެ ދަރިން ކިޔަވަމުން ދިޔައީ ބާ ގެގަނޑެއްގަ، އެއީވެސް ދޮށީ އުމުރުގެ މީހަކު ދެއްކި ތަންކޮޅެއް"

އެތައް އަހަރަކަށް ދިގުލައިގެން ދިޔަ ހަނގުރާމައާއި ކުރިމަތިލުންތަކުގެ ސަބަބުން ސުންނާފަތިވެ ހަފުސްވެފައި އޮތް ޔަމަނުން މިއަދު ފެންނަމުންދަނީ ތަފާތު މަންޒަރެކެވެ. އެންމެ ޒަމާނީ ފެންވަރުގައި ނޫންނަމަވެސް، ޔަމަނުގެ އެކި ހިސާބުތަކުން ފެންނަނީ އުޖާލާ ދިރިއުޅުމަކަށް ދެކެމުންދާ ފޮނި ހުވަފެންތަކެއްގައި ހަގީގީ ކުލަތައް ޖެހެމުންދާ މަންޒަރެވެ. ވެރިރަށް ސަންއާގެ ރަށްބޭރުގައި ދާދި ފަހުން އިމާރާތްކޮށް ހުޅުވި ސްކޫލަކީވެސް އެތައް އާއިލާއެއްގެ އުއްމީދުތަކާ ގުޅިފައި އޮތް ތަނެކެވެ.

ހަމަނުޖެހުންތަކުގެ ސަބަބުން، ސްކޫލަށް ހާޒިރުވެގެން ތަޢުލީމު ހާސިލުކުރުމަކީ އަދިވެސް ޔަމަނުގައި ދަތިކަމެކެވެ. ތައުލީމު ހާސިލު ކުރުމަށްޓަކައި ސްކޫލަކުން ޖާގަ ހޯދުމަކީވެސް ދަތި ކަމަކަށް ވެފައި އޮތް މި ދުވަސްވަރު، ހިލޭ އެހީދޭ އަމިއްލަ ޖަމިއްޔާއަކުން އަޅައިދިން ސްކޫލު ވެގެން ގޮސްފައި ވަނީ، އެތައް ދަރިވަރުންނެއްގެ މޫނުމަތިން ގެއްލިފައިވި ހިނިތުންވުން އަނބުރައި ގެނެސްދިން ތަނަކަށެވެ.

އަލަށް އިމާރާތްކޮށް ހުޅުވި ސްކޫލަށް ދަރިވަރުން އެންމެ ފުރަތަމަ ހާޒިރުވީ ސެޕްޓެމްބަރު 2 ވަނަ ދުވަހުއެވެ. 1200އެއްހާ ދަރިވަރުންގެ މޫނުމަތިންވެސް ފެންނަމުން ދިޔައީ އުފާވެރިކަމާއި ހިތްހަމަޖެހުމުގެ ޖަޒުބާތުތަކެވެ. އެ ދަރިވަރުންނަކީ މީގެ ކުރިން، ވީރާނާވެފައިވާ ފަޅު ގެގަނޑެއްގައި ތައުލީމު ހާސިލުކުރަމުންދިޔަ ދަރިވަރުންނެވެ. ސްކޫލެއްގެ ސިފަ ހުރި އިމާރާތަކަށް ވަދެވުނީ އެތައް އަހަރެއްގެ ދިގު އިންތިޒާރަކަށްފަހުއެވެ.

މޫނާ ރިލީފް ފަންޑުން ކުރިއަށް ގެންދިޔަ ސްކޫލް އިމާރާތްކުރުމުގެ މަޝްރޫއަށް ސަރަހައްދީ އަދި ބައިނަލްއަގުވާމީ ފެންވަރުގައި އެހީތައް ލިބިފައިވެއެވެ. އެތައް ބައެއްގެ ދީލަތި އެހީއާއެކު އިމާރާތްކުރި މި ސްކޫލަކީ، އިލްމު އުނގެނުމަށް އެންމެ އެކަށީގެންވާ ވަސީލަތްތަކާއެކު ފަރުމާކޮށްފައިވާ ސްކޫލެކެވެ. ވާރޭ ފޮދެއް ވެހިލައިފިނަމަ މީގެ ކުރިން އުޅެން ޖެހެނީ ސީލިންގުން ފެން ފައިބާތީއެވެ. ތޮއްޖެހިފައި އޮތް ކުލާސްތަކުގައި އޭރު ހުރި ކުޑަދޮރުތައް ހުރީ ހަލާކުވެފައެވެ.

ސްކޫލްގައި ތައުލީމު ހާސިލުކުރަމުންދާ ދަރިވަރުންގެ ތެރޭގައި ގިނައީ، ހަނގުރާމައިގެ ސަބަބުން އަމިއްލަ ގެދޮރު ގެއްލިގެން ސްކޫލު ހުރި ސަރަހައްދަށް ހިޖުރަކޮށްފައިވާ އާއިލާތަކަށް ނިސްބަތްވާ ކުދިންނެވެ. ޔަމަނުގައި ކުރި ވަރުގަދަ ހަނގުރާމައިގެ ތެރޭގައި ލިބިފައިވާ އުމްރާނީ ގެއްލުންތަކުގެ އަގު ބަޔާންކުރަން ދައްޗެވެ. އެތައް އިމާރާތެއް ވަނީ ސުންނާފަތި ކޮށްލާފައެވެ. އެތައް ސްކޫލަކަށް ވަނީ ގެއްލުން ދީ، ހަލާކުކޮށްލާފައެވެ. ނަތީޖާއެއްގެ ގޮތުން، ޔަމަނުގެ ބައެއް ސަރަހައްދުތަކުގެ ތައުލީމީ ނިޒާމަށް ވަނީ ނޭދެވޭ އަސަރު ފޯރާފައެވެ.

އދ.ގެ ތަފާސް ހިސާބުތައް ދައްކާގޮތުން، ތައުލީމު ހާސިލުކުރުމުގެ ފުރުސަތުން މަހްރޫމުވެފައިވާ 2 މިލިއަނަށްވުރެ ގިނަ ކުދިން ޔަމަނުގައި އެބަތިއްބެވެ. މިއީ ޔަމަނުގެ ތާރީޚަށް ބަލާއިރުވެސް ރެކޯޑް މިންވަރަކަށް މަތީ އަދަދެކެވެ. މުޅިން ސުންނާފަތިކޮށްލާފައިވާ ނުވަތަ ހަލާކުކޮށްލާފައިވާ ސްކޫލްތަކުގެ އަދަދު 2500އަށްވުރެ މައްޗަށް އަރައެވެ. އެއީ ޔަމަނުގައި ހުރި ހުރިހާ ސްކޫލަކަށް ބަލާއިރު ގާތްގަނޑަކަށް ވިއްސަކަށް ޕަސެންޓެވެ. ތައުލީމު ހާސިލު ކުރަންޖެހޭ އުމުރުފުރާގެ ކުދިންގެ އާބާދީއަށް ބަލާއިރު، ސްކޫލަށް ނުގޮސް ތިބި ކުދިންގެ 62 ޕަސެންޓަކީ އަންހެން ކުދިންނެވެ.