އިސްރާއީލަށް އަމާޒުކޮށް ޔަމަން އިން ފޮނުވާލި މިސައިލް ތަކެއް ނައްތާލާފައިވާ ކަމަށް، އިސްރާއީލްގެ އަސްކަރިއްޔާ އިން ހާމަކޮށްފި އެވެ.

އިސްރާއީލްގެ އަސްކަރިއްޔާ އިން ބުނެފައި ވަނީ ބުރާސްފަތި ދުވަހު ޔަމަން އިން އިސްރާއީލަށް އަމާޒުކޮށް މިސައިލްތަކެއް ފޮނުވާލުމާ އެކު، އެ ޤައުމުގެ އެކި ސަރަހައްދުތަކުގައި އެއާ ރެއިޑް ސައިރަން އިއްވާފައިވާ ކަމަށެވެ. އަދި އެއަށް ފަހު، ރައްކާތެރިކަމާ އެކު އެ މިސައިލްތައް ނައްތާލަފައިވާ ކަމަށް ވެސް ބުނެފައިވެ އެވެ. 

އީރާނާ ގުޅިފައި އޮންނަ، އަދި ޔަމަނުގެ އެންމެ އާބާދީ ބޮޑު ސަރަހައްދުތައް ކޮންޓްރޯލް ކުރާ ހޫތީ ހަނގުރާމަވެރިން ގެންދަނީ އިސްރާއީލަށް ހަމަލާދީ، ކަނޑު ދަތުރު ކުރާ ބޯޓު ފަހަރުތަކަށް ވެސް ހަމަލާ ދެމުންނެވެ. 

ހޫތީ ޖަމާއަތުން ބުނެފައި ވަނީ، އެ ޖަމާއަތުން އެ ހަމަލާތައް ދެމުން ގެންދަނީ އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގައި، ޣައްޒާގެ ރައްޔިތުންނާ އެއްބައިވުމުގެ ގޮތުން ކަމަށެވެ. އަދި އިސްރާއީލް އިން ޣައްޒާ ހަނގުރާމަ ކުރިއަށް ގެންދާހާ ދުވަހަކު، އިސްރާއީލަށް އަމާުޒުކޮށް ހަމަލާ ދޭނެ ކަމުގެ އިންޒާރު މީގެ ކުރިން ވެސް އެ ޖަމާއަތުން ވަނީ ދީފަ އެވެ.

އިސްރާއީލަށް އަމާޒުކޮށް މިހާތަނަށް ހޫތީ ޖަމާއަތުން ދީފައިވާ ހަމަލާތަކުގެ ތެރެއިން، ގިނަ ޑްރޯންތަކާއި، މިސައިލްތައް އިސްރާއީލްގެ އަސްކަރިއްޔާ އިން ވަނީ ނައްތާލައިފަ އެވެ. އިސްރާއީލް އިން އަންނަނީ އެކަމުގެ ބަދަލު ހަމަލާތަކެއް ވެސް ދެމުންނެވެ. 

މި ހަމަލާތަކުގެ ސަބަބުން ސަރަހައްދުގެ ކަނޑުގެ ދަތުރު ފަތުރަށް ބޮޑެތި އަސަރު ތަކެއް ކުރަމުން ދާއިރު، މި ހަމަލާތައް ހުއްޓުވުމަށް ބައިނަލްއަޤުވާމީ މުޖުތަމައުން މަސައްކަތް ތަކެއް ކުރަމުންދެ އެވެ.