ފްރާންސް ފުޓުބޯޅަ އިން ހޮވާ ދުނިޔޭގެ އެންމެ މޮޅު ކުޅުންތެރިޔާ އަށް ދޭ، ބެލެންޑޯ އެވޯޑުގެ ނޮމިނޭޝަންތައް އިއުލާންކޮށްފި އެވެ.

މިއަހަރުގެ އެވޯޑަށް ނޮމިނޭޓުވި 30 ކުޅުންތެރިންނަކީ އެންމެ ފަހުން އެ އެވޯޑު ކާމިޔާބު ކުރި ކަރީމް ބެންޒެމާގެ އިތުރުން، އެންމެ ގިނައިން ބެލެންޑޯ ކާމިޔާބު ކުރި އާޖެންޓީނާގެ ލިއޮނަލް މެސީ އަދި ހޫލިއަން އަލްވާރޭޒް، ނިކޮލޯ ބަރެއްލާ، ޖޫޑް ބެލިންހަމް، ޔަސިން ބޯނޯ، ކެވިން ޑިބްރޭނާ، ރުބެން ޑިއާޒް، އެންޓޮއިން ގްރީޒްމަން، އިލްކާއީ ގުންޑޮގާން، ޖޮސްކޯ ގްވާޑިއޯލް، އާލިން ހާލަންޑް، ހެރީ ކޭން، ރަންޑަލް ކޯލޯ މުއާނީ، ޚަވިޗާ ކްވާރަތުސްކޭލިއާ، ރޮބާޓް ލެވަންޑޯސްކީ، އެމިލިއާނޯ މާޓިނޭޒް، ލައުޓާރޯ މާޓިނޭޒް، ކީލިއަން އެމްބާޕޭ، ލޫކާ މޮޑްރިޗް، ޖަމާލް މުސިއާލާ، މާޓިން އޮޑެގާޑް، އަންދްރޭ އޮނާނާ، ވިކްޓާ އޮސީމެން، ރޮޑްރީ، ބުކަޔޯ ސަކާ، މުޙައްމަދު ޞަލާޙު ބެނާޑޯ ސިލްވާ އަދި ވިނީޝިއަސް ޖޫނިއާ އެވެ.

މިއަހަރުގެ އެވޯޑަށް ނޮމިނޭޓުނުވާ އެންމެ ފާހަގަކޮށްލެވޭ ކުޅުންތެރިޔަކީ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އެވެ. މިއީ 2003 ވަނަ އަހަރުގެ ފަހުން ރޮނާލްޑޯ މި އެވޯޑަށް ނޮމިނޭޓު ނުވި ފުރަތަމަ ފަހަރެވެ. ރޮނާލްޑޯ އަކީ ދެ ވަނަ އަށް އެންމެ ގިނަ ބެލެންޑޯ ހޯދާފައިވާ ކުޅުންތެރިޔާ އެވެ. އޭނާ ވަނީ ފަސް ފަހަރު ބެލެންޑޯ ހޯދައިފަ އެވެ. ދެން އެންމެ ފާހަގަކޮށްލެވޭ ކުޅުންތެރިޔަކީ މެންޗެސްޓަރ ޔުނައިޓެޑަށް ކުޅެމުން އަންނަ އިންގްލެންޑުގެ މާކަސް ރަޝްފޯޑު އެވެ. މިދިޔަ ސީޒަނުގައި ރަޝްފޯޑުގެ ފަރާތުން މޮޅު ކުޅުމެއް ފެނުނުއިރު، އެވޯޑުގެ ގަދަ 30 ގައި އޭނާ ނެތުމުން ގިނަ ބަޔަކު ވަނީ އެކަމަށް ފާޑު ވެސް ކިޔައިފަ އެވެ.

މީގެ ތެރެއިން ގަދަ ތިން ކުޅުންތެރިންނަށް ލިސްޓު ކުޑަކުރާނެ އެވެ. އެއަށްފަހު ބެލެންޑޯ ލިބޭ ކުޅުންތެރިޔާ އިއުލާން ކުރުން އޮންނާނީ އަންނަ އޮކްޓޫބަރު މަހުގެ 30 ވަނަ ދުވަހު އޮންނަ ބެލެންޑޯ އެވޯޑު ހަފްލާގަ އެވެ.