މުއިއްޒު ގަވާއިދާ ޚިލާފަށް މާލެއިން ބިންތައް ދޫކުރޭ: އަކްރަމް
6 ސެޕްޓެމްބަރު 2023 | ބުދަ 10:24ވޯޓާ ގާތްކޮށް، މުއިއްޒު ދިގު މުއްދަތަކަށް ބިން ދޫކުރައްވާކަމުގެ މައުލޫމާތު ލިބޭ
ޕްލޭނިންގ މިނިސްޓްރީގެ ސްޓޭޓް މިނިސްޓަރު، އަކްރަމް ކަމާލުއްދީން ރާއްޖެޓީވީއަށް އިންޓަވިއު ދެއްވަނީ
މާލެ ސިޓީގެ މޭޔަރު ޑރ. މުހައްމަދު މުއިއްޒު މިހާރުވެސް ގަވާއިދާ ޚިލާފަށް މާލެއިން ބިންތައް ދޫކުރައްވާ ކަމަށް، ޕްލޭނިންގ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެއެވެ.
"ރާއްޖެ ޓީވީ"އާ ވާހަކަފުޅު ދައްކަވަމުން އަކްރަމް ވިދާޅުވީ، މުއިއްޒު ހައުސިންގ މިނިސްޓަރުގެ މަގާމުގައި ހުންނެވިއިރުވެސް ގަވާއިދާ ޚިލާފަށް ބިންތައް ދޫކުރެއްވި ކަމަށެވެ. އަދި އެކަން މިހާރުވެސް ކުރައްވާ ކަން ފާހަގަކުރައްވައި އޭނާ ވިދާޅުވީ، ލާމަރުކަޒީ އުސޫލުގެ ދަށުން ކައުންސިލްތަކަށް ބިންތައް ދޫކުރެވޭނީ ލޭންޑްޔޫސް ޕްލޭން ހެދުމަށްފަހު ކަމަށެވެ. ނަަމަވެސް ވޯޓާ ގާތްކޮށް ބައެއް ފަރާތްތަކަށް ބިންތައް ދޫކޮށްފައިވާކަމުގެ ރިޕޯޓް ލިބެމުން އަންނަ ކަމަށާއި، އެ ބިންތަކަކީ ކައުންސިލްގެ ބިންތައް ނޫންކަން ވެސް އޭނާ ފާހަގަކުރެއްވިއެވެ.
އަކްރަމް ވިދާޅުވީ ޕްލޭނިންގ މިނިސްޓްރީއަށް ލިބެމުން އަންނަ މި ރިޕޯޓުތަކާ ގުޅިގެން މާލެ ސިޓީ ކައުންސިލަށް އެ މިނިސްޓްރީން ދެ ސިޓީ ފޮނުވާފައިވާ ކަމަށެވެ. ނަމަވެސް އަދިވެސް އެއަށް ޖަވާބު ނުދޭ ކަމަށާއި މުއިއްޒު ކަންކަން ކުރައްވަނީ ގާނޫނާއި ގަވާއިދާ ޚިލާފަށް ކަމަށް އޭނާ ވިދާޅުވިއެވެ.
ރިޔާސީ އިންތިޚާބަށް ކެމްޕޭން ބެނާތައް ހަރުކުރުމަށް ބޭނުންވާ ހޮޅި ޖެހުމަށް މާލޭގެ މަގުތަކުގެ ދުވާރުގެ ބައެއް ތަންތަނަށް ގެއްލުންދިން ވާހަކަތައް ވެސް މުއިއްޒު ދޮގުކުރެއްވިކަން ފާހަގަކުރައްވައި އަކްރަމް ވިދާޅުވީ، އެފަދަ ބޭފުޅަކު ކޮންމެ ފަދަ ކަމެއް ވެސް ކުރައްވަފާނެ ކަމަށެވެ.
މީގެ އިތުރުން މުއިއްޒު މިނިސްޓަރު ކަމުގައިވެސް މޭޔަރުކަމުގައި ހުންނަވައިގެން ކަންކަން ކުރައްވަމުން ގެންދަވަނީ އުސޫލުތަކާއި ގަވާއިދުތަކާ ޚިލާފަށް ކަމަށްވާއިރު، ކުރިއަށް އޮތްތަނުގައި އެފަދަ ބޭފުޅަކު ކުރައްވަފާނެ ކަމަކާމެދު ވިސްނަންޖެހޭ ކަމަށްވެސް އަކްރަމް ވިދާޅުވިއެވެ.
