ރޮޒެއިނާ އާއި ފަލާހުއަށް ގޯތި ލިބުނީ ހުޅުމާލެއަކުން ނޫން: އަކްރަމް
ދޮގު މައުލޫމާތު ނުފެތުރުމަށް އަކްރަމް އިލްތިމާސްކުރެއްވި
ޕްލޭނިންގ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން
ބިންވެރިޔާ ސްކީމުގެ ދަށުން ރައްޔިތުންގެ މަޖިލީހުގެ މެމްބަރުންތަކަކާއި އެ މެމްބަރުންގެ އާއިލާތަކަށް ހުޅުމާލެއިން ކައިރިކައިރިން ގޯތި ދީފައިވާ ކަމަށްބުނެ ފަތުރަމުންދާ ވާހަކަތައް މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗާއިން ދޮގުކޮށްފިއެވެ.
މާލެ ރައްޔިތުންނަށް ބޯހިޔާވަހިކަން ހޯދައިދިނުމަށް މިސަރުކާރުން ކުރިއަށްގެންދިޔަ ބިންވެރިޔާ ސްކީމުގެ ދަށުން ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެމްބަރު މުޙައްމަދު ފަލާހު އާއި އައްޑޫ މީދޫ ދާއިރާގެ މެމްބަރު ރޮޒައިނާ އާދަމް އާއި އެ ދެ ބޭފުޅުންގެ އާއިލާ ބޭފުޅުން އަދި ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސައިން)ގެ އާއިލީ ބޭފުޅުންނަށް ކައިރިކައިރިން ގޯތި ދޫކޮށްފައިވާ ކަމަށްބުނެ އިދިކޮޅު ފަރާތްތަކުން ދަނީ ޚަބަރުތައް ފަތުރަމުންނެވެ. މިއީ އިއްތިފާގެއްތޯ ސުވާލުކޮށް އެ ހުރިހާ ބޭފުޅުންނަށް ވެސް ބިން ދީފައިވަނީ ހުޅުމާލެއިން ކަމަށާއި މެމްބަރުން ގުރުނެގުމަށް ވަޑައިނުގަންނަވާ ކަމަށް ވެސް ބުނެ ދަނީ ޚަބަރުތައް ފަތުރަމުންނެވެ.
މިކަމާ ގުޅިގެން "ރާއްޖެ ޓީވީ" އަށް މައުލޫމާތު ދެއްވަމުން ޕްލޭނިންގ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ ފަލާހު އާއި ރޮޒައިނާއަށް ވެސް ގޯތި ލިބިލެއްވީ ހުޅުމާލެއިން ނޫން ކަމަށެވެ. އެ ދެ ބޭފުޅުންނަށް ވެސް ގުޅީފަޅުން ގޯތި ލިބިވަޑައިގެންފައިވާއިރު އެ ބޭފުޅުންގެ އާއިލާގެ ބޭފުޅުންނަށް ބިން ލިބިފައިވަނީ ގުޅިީފަޅާއި ގިރާވަރުފަޅުން ކަމަށް އޭނާ ވިދާޅުވިއެވެ.
އަކްރަމް ވިދާޅުވީ ގޯތި ދޫކުރުމުގެ ހުރިހާ ކަމެއް ވެސް މި ސަރުކާރުން ކުރިއަށްގެންދިޔައީ ވަރަށް ހާމަކަންބޮޑު ގޮތެއްގައި ކަމަށާއި މިފަދަ ޚަބަރުތައް ފަތުރަނީ ރައްޔިތުންނަށް އޮޅުވާލުމުގެ ބޭނުމުގައި ކަމަށެވެ. އަދި ގޯތިތައް ބެހުމުގެ ކަންކަން ކުރިއަށްގެންދިޔަ ގޮތް ފުރިހަމަކަމުގެ ސަބަބުން އިދިކޮޅުގެ ފަރާތްތަކުން ވެސް ގުޅައި އެކަން ފާހަގަކުރާކަމަށް ވިދާޅުވިއެވެ.
އަކްރަމް ވިދާޅުވީ އެއްވެސް ބޭފުޅަކު ގުރުނެގުމަށް ވަޑައިނުގަންނަވާކަމަށް ޝައްކުވާނަމަ އެކަން ހާމަކޮށް އެނގެން އޮންނާނެ ކަމަށެވެ. އެގޮތުން ގުރުނެގުމުގެ ހުރިހާ ކަމެއް ރެކޯޑު ކުރެވިފައިވާއިރު ގޯތި ލިބުނު ފަރާތްތަކަށް ބަދަލުގައި ބޭފުޅަކު ފޮނުވުމުގެ ފުރުސަތު ވެސް ހުޅުވާލިކަން އޭނާ ފާހަގަކުރެއްވިއެވެ.
އަކްރަމް މިފަދައިން ވިދާޅުވެފައިވާއިރު މެމްބަރު ފަލާހު ވެސް ވަނީ އޭނާއަށް ގޯތި ލިބިވަޑައިގެންނެވީ ހުޅުމާލެއިން ނޫންކަން ހާމަކުރައްވާފައެވެ. އެގޮތުން ގުރުނެގުމަށް ވަޑައިގެންނެވިއިރުގެ ވީޑިއޯއަކާއި ގޯތި ލިބުނީ ގުޅީފަޅުންކަން އަންގަދޭ ގަނޑުކޮޅު ހިއްސާ ކުރައްވައި އޭނާ ވިދާޅުވީ އާއިލާގެ އެއްވެސް ބޭފުޅަކަށް ހުޅުމާލެއިން ގޯތި ނުލިބޭ ކަމަށެވެ. އަދި ޖެހިޖެހިގެން ވެސް އެއްވެސް ބޭފުޅަކަށް ގޯތި ލިބިފައިނުވާ ކަމަށް ފަލާހު ވިދާޅުވިއެވެ.
އަކްރަމް ވަނީ ގިނަ ބައެއްގެ މަސްލަހަތާ ގުޅުންހުރި މިފަދަ ކަންކަމުގައި ދޮގު މައުލޫމާތު ނުފެތުރުމަށް އިލްތިމާސްކުރައްވާފައެވެ.
