ރައީސް އިބްރާހީމް މުހައްމަދު ސާލިހު ދެވަނަ ދައުރަކަށް ހޮވަން ލިބޭ ފުރުސަތަކީ އެމްޑީޕީގެ ފުރިހަމަ ސަރުކާރެއް ގާއިމްކުރަން ލިބޭ ފުރަތަމަ ފުރުސަތު ކަމަށް، ރައްޔިތުންގެ މަޖިލީހުގެ ބިލެއްދޫ ދާއިރާގެ މެމްބަރު އަހުމަދު ހަލީމް (ދޮންބިލެތް) ވިދާޅުވެއްޖެއެވެ.
ކުޅުދުއްފުށީގައި ބޭއްވި އުފާވެރި އަމާން ރާއްޖެ ޖަލްސާގައި އޭނާ ވިދާޅުވީ، މީގެ ކުރިން ފުރިހަމަ އެމްޑީޕިގެ ސަރުކާރެއް ގާއިމްކުރުމަށް ފުރުސަތު ނުލިބޭ ކަމަށެވެ. ސަބަބަކީ އެމްޑީޕީން ނައިބު ރައީސަކު އިޚުތިޔާރުކުރަން ޖެހެނީ ކޮންމެވެސް ސައުދާގަރެއް ކައިރިން ސަލާން ޖަހައިގެން ކަމަށް ވުމުން ކަމަށް އޭނާ ވިދާޅުވިއެވެ. އެހެންނަމަވެސް މިފަހަރު އެކަން ވަރަށް ބޮޑަށް ތަފާތު ކަމަށް އޭނާ ވަނީ ވިދާޅުވެފައެވެ. މިއަދު ރަނިންމޭޓަކު ހޮވާފައި ވަނީ އެމްޑީޕީގައި އެންމެ އިސްކޮށް އުޅުނު މީހުންގެ ތެރެއިންކަމަށް އޭނާ ވިދާޅުވިއެވެ. އެހެންކަމުން ކުރިއަށް އޮތް ރިޔާސީ އިންތިޚާބުގައި ވަރަށް ބޮޑަށް ވިސްނަން ޖެހޭ ކަމަށް އޭނާ ވިދާޅުވިއެވެ.
އެގޮތުން އެމްޑީޕީ އެމްޑީޕީއަށް ވުމަށް އެންމެ ބޮޑަށް ހިތްވަރު ދިންތަނަކީ އައްޑޫ ސިޓީކަމަށް އޭނާ ވިދާޅުވިއެވެ. އައްޑޫގައި އެމްޑީޕީގެ ކަންކަމުގައި އެންމެ ކުރީގައި ހުންނެވި އާރުކާޓީއަކީ މިހާރުގެ ރަނިންމޭޓް މެމްބަރު މުހައްމަދު އަސްލަމްކަމަށާއި، އެއީ އުފާކުރައްވާ ކަމެއް ކަމަށް އޭނާ ވިދާޅުވިއެވެ. އަސްލަމް ނައިބު ރައީސަކަށް ހޮވިވަޑައިގަތުމަކީ ދެކުނަށް ލިބޭނެ އުފަލެއް ކަމަށްވެސް ދޮންބިލެތް ވަނީ ވިދާޅުވެފައެވެ.
އޭނާ އިތުރަށް ވިދާޅުވީ ކުޅުދުއްފުށި އެމްޑީޕީގެ ނިޒާމާއި ޕާޓީއަށް ރަނގަަޅަށް ފައްކާވެފައިވާ ކަަމަށެވެ. އަދި ކުޅުދުއްފުށި ސިޓީއަކަށްވީ ހިސާބުން އެ ސިޓީ އޮތީ އެމްޑީޕީއާ އެކުގައި ކަަމަށް ވިދާޅުވިއެވެ. މީގެ އިތުރުން އޭނާ ވަނީ އިދިކޮޅު ކެނޑިޑޭޓް މުހައްމަދު މުއިއްޒަށް ފާޑު ވިދާޅުވެފައެވެ. މުއިއްޒަކީ ޕީއެންސީގެ ކެނޑިޑޭޓްކަމަށް ވީނަމަވެސް ޕީޕީއެމްގެ ދިދައާއި ކުލަ ބޭނުންކުރައްވައިގެން އޮޅުވާލައްވަމުން ގެންދަވާކަމަށް ތުހުމަތުކުރެއްވިއެވެ. އަދި މުއިއްޒަކީ އިންތިހާއަށް ކޮރަޕްޓް ބޭފުޅެއް ކަމަށާއި، މުއިއްޒަށް ތާއީދު ނުކުރާ ޕީޕީއެމް މެމްބަރުންވެސް ތިބި ކަމަށް އޭނާ ވިދާޅުވިއެވެ. އަދި މުއިއްޒު ވެރިކަމަށް ވަޑައިގެންފިނަމަ ވަޒީފާތަކުން %40 މީހުން ވަކިކުރައްވާނެ ކަމަށް އޭނާ ވިދާޅުވިއެވެ. އަދި މުއިއްޒަށް ވެރިކަން ލިބިވަޑައިގެންފިނަމަ މި ސަރުކާރުން ބޮޑުކޮށްފައިވާ މުސާރަވެސް ކުޑަކުރައްވާނެ ކަމަށް ވިދާޅުވިއެވެ.
