އައިއޯއައިޖީގެ މެޑަލިސްޓުންނަށް ކުލަގަދަ މަރުހަބާއެއް

މިހާތަނަށް އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގައި ރާއްޖޭގެ އެންމެ ކާމިޔާބު ކޮންޓިންޖެންޓަށް ކުލަގަދަ މަރުހަބާއެއް ކިޔުމަށް ތައްޔާރުވެއްޖެއެވެ.

ފުރިހަމަ ކާމިޔާބެއް ހޯދައި، ގައުމީ ކޮންޓިންޖެންޓުން އަންގާރަ ދުވަހުގެ ރޭ ރާއްޖެ އައުމަށް ހަމަޖެހިފައިވާއިރު، ގައުމީ ޓީމަށް މަރުހަބާ ކިޔުމަށް ވީހާވެސް ގިނަ ދިވެހިން ރޭގަނޑު 9:00ށް ޖުމްހޫރީ މައިދާނަށް ދިއުމަށް ޔޫތު މިނިސްޓްރީން ވަނީ އެދިފައެވެ. މިގޮތުން ހަވާ އެރުވުމާއެކު ކުލަގަދަ މަރުހަބާ އެއް ކިޔުމުގެ ތައްޔާރީތައް ކުރިއަށްދާ ކަމަށް ޔޫތު މިނިސްޓަރު އަހުމަދު މަޚްލޫފް ވަނީ ވިދާޅުވެފައެވެ.

މީގެ ކުރިން ރާއްޖެއަށް އައިއޯއައިޖީގައި އެންމެ ގިނަ މެޑަލް ހޯދައިދީފައިވަނީ 2019 ވަނަ އަހަރުއެވެ. އެ އަހަރުގެ މުބާރާތުގައި ގައުމީ ޓީމުތަކުން ވަނީ ޖުމްލަ 15 މެޑަލް ހޯދާފައެވެ. މިއަހަރުގެ މުބާރާތުގައި ގައުމީ ޓީމުތަކުން ވަނީ ޖުމްލަ 28 މެޑަލް ހޯދައި، ކުރީގެ ރެކޯޑް ބޮޑުތަނުން މުގުރާލާފައެވެ.

މިއަހަރުގެ މުބާރާތުގައި ރާއްޖޭގެ ޓީމުން ވަނީ ފަސް ރަން މެޑަލާއި ނުވަ ރިހި މެޑަލްގެ އިތުރުން 14 ލޯ މެޑަލް ހޯދާފައެވެ. ފަސް ރަން މެޑަލްގެ ތެރެއިން ހަތަރު މެޑަލް ޓީޓީން ހޯދިއިރު، ބެޑްމިންޓަނުން ވަނީ އެއް ރަން މެޑަލް ހޯދާފައެވެ. ޓީޓީއާއި ބެޑްމިންޓަންގެ އިތުރުން ރާއްޖެއަށް މެޑަލް ހޯދައިދިނީ ޓައެކްވަންޑޯ، ބާސްކެޓްބޯޅަ ތުރީ އޮން ތުރީ، އެތުލެޓިކްސް، އަދި ޕެރަ އެތުލެޓިކްސްއިންނެވެ،

މަޑަގަސްކަރައިގައި ކުރިޔަށް ގެންދާ އައިއޯއައިޖީގައި ޖުމްލަ 17 ކުޅިވަރު ހިމެނޭއިރު ރާއްޖެއިން ވަނީ ނުވަ ކުޅިވަރުގައި ވާދަކޮށްފައެވެ. މި ނުވަ ކުޅިވަރުގައި ރާއްޖޭގެ 172 އެތުލީޓުން ވަނީ ވާދަކޮށްފައެވެ.