ކުލަގަދަ ރަސްމިއްޔާތަކަށްފަހު މަހިބަދޫގައި އެޅި ފުޓުބޯޅަ ދަނޑު ރަސްމީކޮށް ހުޅުވައިފިއެވެ.
މަހިބަދޫ ދަނޑު ހުޅުވާފައިވަނީ ޓީސީ ސްޕޯޓްސް ކްލަބް އާއި މަހިބަދޫ އިން ހޮވާލެވޭ ޓީމެއް ބައްދަލުކުރި މެޗަކުންނެވެ. މި މެޗު މަހިބަދޫ ޓީމާ ވާދަކޮށް ޓީސީން ކާމިޔާބުކުރީ 0-6 ގެ ތަފާތު ބޮޑު ނަތީޖާއަކުންނެވެ.
މި މެޗުގައި އިބްރާހިމް މަހުދީ (ފޭދޫ އިއްބެ) ހެޓްރިކް ހަދާފައިވާއިރު، އިބްރާހިމް ވަހީދު ހަސަން އަދި އަލީ އަޝްފާގު (ދަގަނޑޭ) ވެސް ވަނީ ލަނޑު ޖަހާފައެވެ.
ޓީސީން މަހިބަދޫ އަށް ކުރާ ދަތުރު ހުކުރު ދުވަހު ފަށާފައިވާއިރު، ޓީސީ އެނބުރި މާލެ އަންނާނީ ހޮނިހިރު އަދި އާދީއްތަ ދުވަހު އެ ރަށުގައި ފަރިތަކުރުންތައް ކުރިޔަށް ގެންދިޔުމަށް ފަހު ހޯމަ ދުވަހު ކަމަށް އެ ކްލަބުން މައުލޫމާތު ދެއެވެ.
މަހިބަދޫ ސްޕޯޓްސް ކްލަބުން އިސް ނަގައިގެން ޓޫރިޒަމް ދާއިރާގެ އެހީއާ އެކު މަހިބަދޫގައި އެޅި މި ފުޓުބޯޅަ ދަނޑުގައި އޭއެފްސީ ކަޕްގެ މެޗުތައްވެސް ކުޅެވޭއިރު، މި ދަނޑާ ގުޅޭ އިތުރު ޕްރޮޖެކްޓްތައް މަހިބަދޫ ސްޕޯޓްސް އިން އަންނަނީ ރާވަމުންނެވެ. އެގޮތުން ލައިޓިން ސިސްޓަމް ހަރުކުރުމާއި، ސިޑި ބަރި އާއި ޗޭންޖިން ރޫމްތައް ހެދުން ހިމެނެއެވެ.
