އޭޝިއާގެ އެއްވަނަ ހޯދި ޝާންޓެ ރަން މެޑަލާއެކު ރާއްޖެ އައުމުން ހޫނު މަރުހަބާއެއް ކިޔައިފި

51 ވަނަ އޭޝިއަން ބޮޑީ ބިލްޑިން ޗެމްޕިއަންޝިޕްގައި 55 ކޭޖީ ކެޓަގަރީން ރަން މެޑަލް ހޯދި ރާއްޖޭގެ ޝާހީން އިބްރާހިމް ދީދީ (ޝާންޓެ) ރާއްޖެ އައުމާއެކު ހޫނު މަރުހަބާއެއް ކިޔައިފި އެވެ.

ޝާންޓެ އާއި މުބާރާތުގައި ވާދަކުރި ބޮޑީބިލްޑަރުން ރާއްޖެ އައުމާއެކު ވީއައިޕީ ލައުންޖުން ސަރުކާރުގެ އިސްވެރިންތަކެއް ވަނީ މަރުހަބާ ކިޔާފައެވެ. މީގެއިތުރުން ޝާންޓޭ އަށް ރަސްމީ ފާލަމުން އޭނާ ނިސްބަތްވާ ގއ.ކޮނޑޭގެ ގިނަ ރައްޔަތުން ވަނީ މަރުހަބާ ކިޔާފައެވެ.

މާލެ އައުމަށް ފަހު ނޫސްވެރިންނަށް މައުލޫމާތު ދެމުން ޝާންޓެ ބުނީ މިލިބުނު ކާމިޔާބީ އަކީ ހަޔާތުގައި މިހާތަނަށް ލިބުނު އެންމެ ބޮޑު އެއް ކާމިޔާބީ ކަމަށާއި މިއީ ރާއްޖެއަށް ވެސް ހޯދައިދެވުނު ރީތި ނަމެއް ކަމަށް ދެކޭ ކަމަށެވެ.

ޖުމްލަ 8 ގައުމު ވާދަކުރި މި މުބާރާތުގައި ޝާންޓެ އެއްވަނަ ހޯދީ މޮންގޯލިއާ އާއި ނޭޕާލް އަދި ތައިލޭންޑްގެ އެތްލީޓުންނާ ވާދަކޮށްގެންނެވެ. މި ކެޓަގަރީން ދެވަނަ މޮންގޯލިއާގެ އެތްލީޓް ހޯދިއިރު، ނޭޕާލްގެ އެތްލީޓް ވަނީ ތިންވަނަ ހޯދާފައެވެ. ހަތަރުވަނަ ހޯދީ ތައިލޭންޑްގެ އެތްލީޓެވެ.

މުބާރާތުގައި ވާދަކުރީ ކޮރެއާ، އިންޑިއާ، ނޭޕާލް، ޗައިނާ، ތައިލޭންޑް، ވިއެޓްނާމް، މޮންގޯލިއާ އަދި ރާއްޖެއެވެ. ޖުމްލަ ނުވަ އެތްލީޓުން ވަނީ މުބާރާތުގައި ވާދަކޮށްފައެވެ.

ޝާހީން އަކީ ނިމިގެންދިޔަ މިސްޓަ މޯލްޑިވްސް މުބާރާތުގެ ދެވަނަ ހޯދި އެތްލީޓެވެ. އޭނާ މިސްޓަ މޯލްޑިވްސް އިން ބަލިވީ މުހައްމަދު ޔާމީން (ޔާމްބެ) އާ ވާދަކޮށްގެންނެވެ.