ކޮމަންވެލްތުގެ މެމްބަރުގެ ގައުމުތަކުގެ މެދުގައި ކޮންމެ ހަތަރު އަހަރަކުން އެއް އަހަރު ބާއްވާ ކޮމަންވެލްތު ގޭމްސް ކުލަގަދަ ރަސްމިއްޔާތަކާ އެކު އޮސްޓްރޭލިއާގައި ފަށައިފިއެވެ.

މިއަހަރުގެ ކޮމަންވެލްތު ގޭމްސް ކުރިޔަށްދާނީ އޮސްޓްރޭލިއާގެ ކުއީންސްލޭންޑްގެ ގޯލްޑް ކޯސްޓްގައެވެ. މިއަހަރުގެ ގޭމްސް ހުޅުވުމަށް ބޭއްވި ރަސްމިއްޔާތުގައި ޕްރިންސް ޗާލްސްގެ ދެ ކަނބަލުން ބައިވެރިވެވަޑައިގެންނެވިއެވެ. ޕްރިންސް ޗާލްސް މި ރަސްމިއްޔާތުގައި ބައިވެރިވެވަޑައިގެންނެވީ އެމަނިކުފާނުގެ މަންމާފުޅު ކުއީން އެލިޒަބަތަށް މި ރަސްމިއްޔާތުގައި ބައިވެރިވެވަޑައި ނުގެންނެވުނީމައެވެ. ހަމައެހެންމެ އޮސްޓްރޭލިއާގެ ބޮޑު ވަޒީރު މެލްކޮމް ޓާންބުލް ވެސް މި ރަސްމިއްޔާތުގައި ބައިވެރިވެވަޑައިގެންނެވިއެވެ. މި ރަސްމިއްޔާތު ބަލާލުމަށް 35000 މީހުން ކެރޭރާ ސްޓޭޑިއަމްއަށް ވަދެފައިވެއެވެ.

އެ ޖަމިއްޔާގެ މެމްބަރު 71 ގައުމުން 4500 އެތުލީޓުން މި މުބާރާތުގައި ބައިވެރިވާއިރު ޖުމްލަ 275 ކުޅިވަރެއްގައި މި އެތުލީޓުން ވާދަކުރާނެއެވެ. މިއަހަރުގެ ގޭމްސް ވެގެންދާނީ ބައިނަލްއަގްވާމީ ބޮޑު ކުޅިވަރު މުބާރާތެއްގައި އަންހެން އަދި ފިރިހެން އެތުލީޓުންނަށް އެއްވަރަކަށް ކުޅިވަރު އިވެންޓް ބޭއްވިގެންދާނެ ފުރަތަމަ ފަހަރަށެވެ. މިއަހަރުގެ ގޭމްސް 12 ދުވަހަށް ދެމިގެންދާއިރު އެ 12 ދުވަހުގެ ތެރޭގައި ދުނިޔޭގެ 2.4 ބިލިއަން މީހުން ތަމްސީލު ކުރެވިގެންދާނެއެވެ. ހަމައެހެންމެ އެކި އިވެންޓްތައް 17 ސްޓޭޑިއަމެއްގައި ކުރިޔަށްދާނެއެވެ.

މިއަހަރުގެ ގޭމްސްގައި އަނެއްކާ ވެސް ބާސެކެޓްބޯލް ހިމަނާފައިވާއިރު ބީޗް ވޮލީ ހިމެނުމުގެ ގޮތުން ޖޫޑޯ ނުބާއްވާނެއެވެ. ހަމައެހެންމެ ކޮމަންވެލްތު ގޭމްސްގެ ތާރީހުގައި ވެސް ފުރަތަމަ ފަހަރަށް މިއަހަރު އަންހެނުންގެ ރަގްބީ ޔޫނިއަން ކުރިޔަށްދާނެއެވެ.

ޖުމްލަ 1600 މީހުންގެ އާބާދީއެއް އޮންނަ ކޮމަންވެލްތުގެ އެންމެ ކުޑަ ގައުމު ކަމަށްވާ ނިއުއޭ އިން މި ގޭމްސްގައި 19 އެތުލީޓުން ބައިވެރިވާނެއެވެ. ހަމައެހެންމެ 2013 ވަނަ އަހަރު އެ ޖަމިއްޔާއިން ވަކިވުމަށް ފަހު މިއަހަރުގެ ފެބްރުއަރީ މަހުގެ ތެރޭގައި އަލަށް ގުޅުނު ގެމްބިއާ ވެގެންދާނީ ހަ އެތުލީޓުންނާ އެކު މި ގޭމްސްއަށް އެންމެ ކުޑަ ކޮންޓިންޖެންޓެއް ފޮނުވާ ގައުމަށެވެ.

މިއަހަރުގެ ކޮމަންވެލްތު ގޭމްސްއާ އެކު ނުކުޅެދޭ މީހުންނަށް ބާއްވާ އެންމެ ބޮޑު އެއް ކުޅިވަރު އިވެންޓް ކަމަށްވާ ޕެރަ ސްޕޯޓް ޕްރޮގްރާމް ވެސް ވަނީ ފަށާފައެވެ. ޖުމްލަ 38 އިވެންޓް މި ބައިގައި ކުރިޔަށްދާއިރު އޭގެ ތެރޭގައި އެތުލެޓިކްސް، ސްވިމިންގ، ޓޭބަލް ޓެނިސް އަދި ޓްރެކް ސައިކްލިންގްގެ އިތުރުން ޕަވަރލިފްޓިން ވެސް ކުރިޔަށްދާނެއެވެ. މި އިވެންޓުތަކުގައި 300 އެތުލީޓުން ވާދަކުރާއިރު މިއީ 2014 ވަނަ އަހަރު ސްކޮޓްލޭންޑްގެ ގްލާސްގޯގައި ބޭއްވި ގޭމްސްގައި ވާދަކުރި އެތުލީޓުންނަށް ވުރެ 73 އިންސައްތަ އިތުރު އަދަދެކެވެ.

މިއަހަރުގެ ގޭމްސްއަށް 474 އެތުލީޓުންނާ އެކު އެންމެ ބޮޑު ކޮންޓިންޖެންޓެއް ފޮނުވާނީ މުބާރާތް ބާއްވާ ގައުމު ކަމަށްވާ އޮސްޓްރޭލިއާއެވެ. މިއަހަރުގެ ގޭމްސްގެ ޝިއާރެއްގެ ގޮތުގައި ކަނޑައަޅާފައިވަނީ "ޝެއާ ދަ ޑްރީމް" އެވެ. ހަމައެހެންމެ މި ގޭމްސްގެ މެސްކޮޓަށް ދީފައިވާ ނަމަކީ "ބޮރޯބީ" އެވެ.

މިއަހަރުގެ ގޭމްސްގައި ރާއްޖެ ވާދަކުރަން އޮތް ނަމަވެސް 2016 ވަނަ އަހަރުގެ އޮކްޓޯބަރު މަހުގެ ތެރޭގައި ކޮމަންވެލްތުން ރާއްޖެ ވަކިވުމާ އެކު މިއަހަރުގެ ގޭމްސްގައި ރާއްޖެ ފެނިގެން ނުދާނެއެވެ. 2014 ވަނަ އަހަރުގެ ކޮމަންވެލްތު ގޭމްސްގައި ފަސް ކުޅިވަރެއްގައި ރާއްޖޭގެ 23 އެތުލީޓުން ވާދަކުރިއެވެ.