ލާޒިއޯ އިން ނަޕޯލީ ބަލިކޮށްފި

އިޓާލިއަން ލީގުގައި އެންމެ ފަހުގެ ޗެމްޕިއަން ނަޕޯލީއާ ދެކޮޅަށް ކުޅުނު މެޗުން ލާޒިއޯ މޮޅުވެއްޖެ އެވެ.

ނަޕޯލީގެ ޑިއޭގޯ އާމަންޑޯ މަރަޑޯނާ ސްޓޭޑިއަމްގައި ކުޅުނު މެޗު ލާޒިއޯ އިން ކާމިޔާބު ކުރީ 2-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ލާޒިއޯ އިންނެވެ. ފުރަތަމަ ހާފުގެ 30 ވަނަ މިނެޓުގައި އެ ޓީމަސް ލީޑު ނަގައިދިނީ ލުއިސް އަލްބާޓޯ އެވެ. އޭނާ އެ ލަނޑު ޖެހީ ފެލިޕޭ އެންޑަސަން ތަނަވަސްކޮށްދިން ފުރުސަތެއްގަ އެވެ. ނަމަވެސް އޭގެ ދެ މިނެޓު ފަހުން ނަޕޯލީން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ޓީމަށް ނަތީޖާ ހަމަހަމަ ކޮށްދިނީ ޕިއޯޓް ޒިއެލިންސްކީ އެވެ. މެޗުން ލާޒިއޯ މޮޅުވީ ދެ ހާފުގައި ޖެހި ލަނޑުންނެވެ. ދެ ވަނަ ހާފު ފަށައިގެން ހަތް ވަނަ މިނެޓުގައި އެންޑަސަން ތަނަވަސްކޮށްދިން ފުރުސަތެއްގައި އެ ލަނޑު ޖެހީ ޑައިޗީ ކަމަޑާ އެވެ. އޭގެ ފަހުން ވެސް ލާޒިއޯ އިން ވަނީ ދެ ލަނޑު ޖަހައިފަ އެވެ. ނަމަވެސް، ވީއޭއާރު ބެލުމަށްފަހު ރެފްރީ ވަނީ އެ ދެ ލަނޑު ވެސް ބަލައި ނުގަންނަން ނިންމައިފަ އެވެ.

މިއީ މި ސީޒަންގެ ލީގުގައި ލާޒިއޯ އިން ހޯދި ފުރަތަމަ މޮޅެވެ. މިހާތަނަށް ތިން މެޗު ކުޅުނުއިރު، އެ ޓީމު ކުޅުނު ފުރަތަމަ ދެ މެޗުން ވަނީ ބަލިވެފަ އެވެ. އަނެއްކޮޅުން މިއީ މި ސީޒަނުގައި ނަޕޯލީ ބަލިވި ފުރަތަމަ މެޗެވެ. ލީގުގައި ކުރިން ކުޅުނު ދެ މެޗުން ވެސް ނަޕޯލީ ވަނީ މޮޅުވެފަ އެވެ. ނަޕޯލީ ކައިރިން ހޯދި ތިން ޕޮއިންޓާއެކު ލާޒިއޯ އޮތީ 12 ވަނައިގަ އެވެ. ނަޕޯލީ އޮތީ ހަ ޕޮއިންޓާއެކު ހަތަރު ވަނައިގަ އެވެ.