ރޮޒައިނާ ވިދާޅުވެދެއްވީ އެމްޑީޕީގެ މެނިފެސްޓޯގައި އަންހެނުންނަށް ހުރި ފުރުސަތުތައް
2 ސެޕްޓެމްބަރު 2023 | ހޮނިހިރު 02:50މިސަރުކާރުން އަންހެނުންނަށް މަތީ ތައުލީމުގެ ފުރުސަތު ފަހިކޮށްދީފިކަމަށާއި ވިޔަފާރިކުރުމުގެ ފުރުސަތާއި ސިޔާސީ ދާއިރާއަށް ނިކުތުމުގެ ފުރުސަތު ފަހިކޮށްދީފިކަމަށް ރޮޒައިނާ ވިދާޅުވި
އެމްޑީޕީގެ އަންހެނުންގެ ރޫހުގެ ރައީސާ ރޮޒައިނާ އާދަމް
އަންހެނުންނަށް މި ސަރުކާރުގެ ފަސް އަހަރު ތެރޭގައި ގިނަ ފުރުސަތުތަކެއް ފަހިވެގެންގޮސްފައިވާކަމަށާއި ކުރިޔަށް އޮތް ފަސް އަހަރަށް އެކުލަވާލާފައިވާ މެނިފެސްޓޯގައި އަންހެނުންނަށް ހިމަނާފައިވަނީ އަންހެނުން އެދުނު ކަންކަމަށް އެމްޑީޕީގެ އަންހެނުންގެ ރޫހުގެ ރައީސް އަދި ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރ ރޮޒައިނާ އާދަމް ވިދާޅުވެއްޖެއެވެ.
ހުކުރު ދުވަހުގެ ރޭ ބޭއްވި އުފާވެރި މާލެ ޖަލްސާގައި ވާހަކަދައްކަވަމުން ރޮޒައިނާ ވިދާޅުވީ މިސަރުކާރުން އަންހެނުންނަށް މަތީ ތައުލީމުގެ ފުރުސަތު ފަހިކޮށްދީފިކަމަށާއި ވިޔަފާރިކުރުމުގެ ފުރުސަތާއި ސިޔާސީ ދާއިރާއަށް ނިކުތުމުގެ ފުރުސަތު ފަހިކޮށްދީފިކަމަށެވެ. އަދި ވިހެއުމުން މުސާރައާއެކު ހަމަސް ދުވަހުގެ ޗުއްޓީ ހަމަޖައްސައިދީފިކަމަށް ރޮޒައިނާ ވިދާޅުވިއެވެ.
ނަމަވެސް އޭގެކުރީގެ ސަރުކާރުގައި އަންހެނުންނަށް ދިނީ އަނިޔާކަމަށާއި އެކަންކަން ހަދާން ނުނެތޭކަމަށް ރޮޒައިނާ ވިދާޅުވިއެވެ.
ރޮޒައިނާ ވިދާޅުވީ ހިނގަމުންދާ ފަސް އަހަރަށްވުރެ ކުރިޔަށް އޮތް ފަސް އަހަރަށް އެކުލަވާލާފައިވާ މެނިފެސްޓޯ ރަނގަޅުވާނެކަމަށެވެ. އެމެނިފެސްޓޯގައި އަންހެނުންނަށް ހިމަނާފައިވަނީ އަންހެނުން ބޭނުންވެގެން ބުނި ކަންތައްތައްކަމަށް ރޮޒައިނާ ވިދާޅުވިއެވެ.
އެގޮތުން ދަރިމައިވުމުގެ މައްސަލަ ތަހައްމަލުކުރަމުންދާ މީހުންނަށް އާސަންދައިން ބޭސްފަރުވާ ކުރެވޭނެ އިންތިޒާމު ހަމަޖެއްސުމަށް އެދުމުން އެކަން މެނިފެސްޓޯގައި ހިމަނާފައިވާނެކަމަށާއި ސްކޫލުކުދިންގެ ދަބަސް ބަރުކަމަށް ބުނުމުން އެކަމަށްވެސް މެނިފެސްޓޯގައި ހައްލު ގެނެސްދީފައިވާނެކަމަށް ރޮޒައިނާ ވިދާޅުވިއެވެ. އަދި އަންހެނުން ކުޅޭނެ ދަނޑުތައް ނެތްކަމަށް ބުނުމުން އެކަންވެސް މެނިފެސްޓޯގައި ހިމަނާފައިވާނެކަމަށް ރޮޒައިނާ ވިދާޅުވިއެވެ.
ކުދިންގެ ޓިޔުޝަނަށް ކުރަންޖެހޭ ޚަރަދު ބޮޑުކަމަށް ބުނުމުން އެކަންވެސް ސްކޫލްގެ ތެރެއިން ހަމަޖެހޭނެ ގޮތަށް މެނިފެސްޓޯގައި ހިމަނާފައިވާނެކަމަށް ރޮޒައިނާ ވިދާޅުވިއެވެ.
ރޮޒައިނާ ވިދާޅުވީ ރައީސް ޞާލިހަކީ ރައްޔިތުންގެ އިހުސާސްތައް އެނގޭ އޯގާތެރި ވެރިއެއްކަމަށެވެ. އެއީ ޓެސްޓްކޮށްފައިވާ ޕްރޮޑަކްޓެއްކަމަށް ރޮޒައިނާ ވިދާޅުވިއެވެ. އެހެންކަމުން ރައްޔިތުންގެ ވޯޓު ރައީސް ޞާލިހަށް ދިނުމަށް ރޮޒައިނާ އެދިވަޑައިގެންނެވިއެވެ.
