ރާއްޖޭގެ އިގްތިސާދު ދެގުނަ ކުރައްވައި، ތިންގުނަ ކުރެއްވޭނެ ހަމައެކަނި ވެރިއަކީ ރައީސް ސާލިހު: ސިޔާމް

ރާއްޖޭގެ އިގްތިސާދު ދެގުނަކުރައްވައި، ތިންގުނަ ކުރެއްވޭނެ ހަމައެކަނި ރައީސަކީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުކަމަށް، އެމްޑީއޭގެ ރައީސް އަހުމަދު ސިޔާމް މުހައްމަދު ވިދާޅުވެއްޖެއެވެ.

އެމްޑީޕީއާ ގުޅިފައިވާ ކޯލިޝަނުން ހުކުރު ދުވަހުގެ ރޭ ބޭއްވި އުފާވެރި ޖަލްސާގައި ވާހަކަފުޅުދައްވަމުން، ކޯލިޝަންގައި ހިމެނޭ އެމްޑީއޭގެ ރައީސް ސިޔާމް ވިދާޅުވީ، ކޮވިޑް-19އާއެކު ވިޔަފާރިތައް އެއްކޮށް ހަލާކުވެގެންދާނެކަމަށް ރާއްޖޭގެ ފުންނާބު އުސް ބައެއް ވިޔަފާރިވެރިންނަށް ހީވިކަމަށެވެ. ކޮވިޑްގެ އާލަމީ ވަބާއާއެކު ރާއްޖޭގެ ފުންނާބު އުސް ވިޔަފާރިވެރިންނާ ބައްދަލުކުރައްވައި ކަންކަމާމެދު މަޝްވަރާކުރެއްވި ކަމަށް ސިޔާމް ވިދާޅުވިއެވެ.

އަދި އެކަމާ ގުޅިގެން ރައީސާވެސް ބައްދަލުކުރެއްވި ކަމަށާއި ރައީސް ދެއްކެވީ ރާއްޖޭގެ އިގްތިސާދު ކޮޅަށް ޖަހާނެ ގޮތްކަމަށް ސިޔާމް ވިދާޅުވިއެވެ.

ސިޔާމް ވިދާޅުވީ އޭގެ ތިން މަސްފަހުން ރާއްޖޭގެ ބޯޑަރު ހުޅުވައި، އޭގެ ފަހުން މަޑުމަޑުން ރާއްޖޭގެ އިގްތިސާދު ކޮޅަށް ޖެހެމުން އަންނަކަމަށެވެ. އެދުވަހު އެކި ގައުމުތަކުގެ މީހުން ރާއްޖެ އައިސް ރާއްޖޭގެ އިގްތިސާދު ކޮޅަށް ޖެހުނު ގޮތް އަހަމުން ދިޔަކަމަށާއި، އެގޮތް ހޯދަން ބޭނުންވިކަމަށެވެ.

ސިޔާމް ވިދާޅުވީ ރާއްޖޭގެ އިގްތިސާދު ދެގުނަކޮށް ތިންގުނަ ކުރާނެ ގޮތް ސަރުކާރު ކޯލިޝަނަށް އެނގޭކަމަށާއި އެކަމުގެ ގާބިލުކަންވެސް އެބަހުރިކަމަށެވެ. ރައީސް ސާލިހު ބޭނުންފުޅުވަނީ ރާއްޖޭގެ ރައްޔިތުން އެދޭ ގޮތަށް އޯގާތެރިކަމާއި ކުލުނާއެކު ރައްޔިތުން މުއްސަނދިކޮށްދެއްވުމަށް ކަމަށް ސިޔާމް ވިދާޅުވިއެވެ.