މި ސީޒަންގެ ޔުއެފާ ޗެމްޕިއަންސް ލީގުގެ ގުރު ބުރާސްފަތި ދުވަހުގެ ރޭ ނެގިއިރު، ޕީއެސްޖީ އަށް ވަރުގަދަ ގުރޫޕެއް ލައްވާލައިފިއެވެ.

ފްރާންސްގެ ޗެމްޕިއަން ޕީއެސްޖީ ލައްވާލާފައިވަނީ ޖަރުމަނުގެ ވަރުގަދަ އެއް ބާރު ކަމަށްވާ ބޮރޫޝިއާ ޑޯޓްމަންޑް އާއި އިޓަލީގެ އޭސީ މިލާންގެ އިތުރުން އިންގިރޭސި ޕްރިމިއަރ ލީގުގެ ނިއުކާސަލް ޔުނައިޓެޑާ އެކު ގުރޫޕު އެފް ގައެވެ. އޭސީ މިލާން އަކީ މިދިޔަ ސީޒަނުގައި ޗެމްޕިއަންސް ލީގު ސެމީ ފައިނަލް ކުޅެފައިވާ ޓީމެކެވެ. ހަމައެއާއެކު، ނިއުކާސަލް އިންވަނީ މިދިޔަ ސީޒަނުގެ ޕްރިމިއަރ ލީގުގައި މޮޅު ކުޅުމެއް ދައްކާފައެވެ. މީގެއިތުރުން، 20 އަހަރަށްފަހު ޗެމްޕިއަންސް ލީގަށް އެނބުރި އަންނަ އިރު، އެ ޓީމަށް ވަނީ ކުޅުންތެރިން ގެނެސް، ވަރަށް ބޮޑަށް ރަނގަޅުކޮށްފައެވެ.

ދެން އެންމެ ފާހަގަކޮށްލެވޭ ގުރޫޕަކަށް ވެފައިވަނީ ގުރޫޕު އޭ އެވެ. މި ގުރޫޕުގައި ޗެމްޕިއަންސް ލީގު ކާމިޔާބުކޮށްފައިވާ ދެ ޓީމު ކަމަށްވާ ބަޔާން މިއުނިކާއި މެންޗެސްޓަރ ޔުނައިޓެޑް ހިމެނެއެވެ. މީގެއިތުރުން އެ ގުރޫޕުގައި ހިމެނެނީ ޑެންމާކްގެ އެފްސީ ކޯޕަންހޭގަން އާއި ތުރުކީގެ ޗެމްޕިއަން ގަލަޓަސަރާއީ އެވެ.

ގުރޫޕު ބީ ގައި ހިމެނެނީ ޔުރޮޕާ ލީގު ޗެމްޕިއަން ސެވިއްޔާ، އާސެނަލް، ޕީއެސްވީ އަދި ލެންސް އެވެ. ގުރޫޕު ސީގައި ހިމެނެނީ އިޓަލީގެ ޗެމްޕިއަން ނަޕޯލީ، މުބާރާތުގެ އެންމެ ކާމިޔާބު ޓީމު ރެއާލް މެޑްރިޑް، ބްރާގާ އަދި ޔޫނިއަން ބާލިން އެވެ. މީގެއިތުރުން ގުރޫޕު ޑީ ގައި ހިމެނިފައިވަނީ ޕޯޗުގަލްގެ ޗެމްޕިއަން ބެންފީކާ، މިދިޔަ އަހަރުގެ ރަނަރަޕް އިންޓަ މިލާން، ސަލްޒްބާގް އަދި ރެއާލް ސޮސިއެޑާޑް އެވެ.

އެންމެ ފަހުގެ ޗެމްޕިއަން މެންޗެސްޓަރ ސިޓީ ހިމެނިފައިވަނީ ލައިޕްޒިގް އާއި ރެޑް ސްޓާ ބެލްގްރޭޑްގެ އިތުރުން ޔަންގް ބޯއީސް އާއެކު ގުރޫޕު ޖީ ގައެވެ. ގުރޫޕު އީ ގައި ހިމެނެނީ ފެޔެނޫޑް، އެތުލެޓިކޯ މެޑްރިޑް، ލާޒިއޯ އަދި ސެލްޓިކް އެވެ. ގުރޫޕު އެޗް ގައި ހިމެނެނީ ސްޕެއިންގެ ޗެމްޕިއަން ބާސެލޯނާ، ޕޯޓޯ، ޝަޚްތަރު ޑޮނެސްކް އަދި އެންޓްވާޕް އެވެ.

ޔުއެފާ ޗެމްޕިއަންސް ލީގު ގުރޫޕް ސްޓޭޖު މެޗުތައް ފެށުމަށް ހަމަޖެހިފައިވަނީ މި މަހުގެ 19 ވަނަ ދުވަހުއެވެ.