ވިމްބްލެޑަން ބަލިކޮށް ޗެލްސީ، ކަރަބޯ ކަޕްގެ ތިން ވަނަ ބުރަށް

ކަރަބޯ ކަޕްގެ ދެ ވަނަ ބުރުގައި އޭއެފްސީ ވިމްބްލެޑަން ބަލިކޮށް، ޗެލްސީން ތިން ވަނަ ބުރުން ޖާގަ ހޯދައިފި އެވެ.

ޗެލްސީގެ އަމިއްލަ ދަނޑު، ސްޓެމްފޯޑް ބްރިޖުގައި ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވިމްބްލެޑަން އިންނެވެ. އެއީ ޗެލްސީގެ އޭރިޔާ ތެރެއިން އެ ޓީމުގެ ކުޅުންތެރިޔަކަށް ކީޕަރު ކުރި ފައުލަކަށް ދިން ޕެނަލްޓީ އެއް ކާމިޔާބުކޮށް، 19 ވަނަ މިނެޓުގައި ޓިލޭ ޖެހި ލަނޑުންނެވެ. ފުރަތަމަ ހާފުގެ އިތުރު ވަގުތުގައި ޗެލްސީން ނަތީޖާ ހަމަހަމަ ކުރީ ލިބުނު ޕެނަލްޓީއަކުންނެވެ. އެއީ ވިމްބްލެޑަންގެ އޭރިޔާ ތެރެއިން ޗެލްސީގެ ނޯނީ މަޑުއޭކޭ އަށް ކުރި ފައުލަކަށް ދިން ޕެނަލްޓީއެކެވެ. ޕެނަލްޓީ ކާމިޔާބުކޮށް ނަތީޖާ ހަމަހަމަ ކުރީ ވެސް އޭނާ އެވެ. މެޗުން ޗެލްސީ މޮޅު ކޮށްދިން ލަނޑު 72 ވަނަ މިނެޓުގައި ޖެހީ އެންޒޯ ފެނާންޑޭޒް އެވެ. އެއީ ވިމްބްލެޑަންގެ ގޯލް ކީޕަރަށް ހެދުނު ގޯހެއްގައި ލިބުނު ބޯޅަ އެއްބުރުން ގޯލަށް ވައްދާލައިގެންނެވެ.

ކަރަބޯ ކަޕްގެ ތިން ވަނަ ބުރުގައި ސެޕްޓެމްބަރު މަހުގެ 26 ވަނަ ދުވަހު ޗެލްސީ ނުކުންނާނީ ބްރައިޓަނާ ދެކޮޅަށެވެ.