މެންޗެސްޓަރ ޔުނައިޓެޑުގެ ޑިފެންޑަރު، ރަފައެލް ވަރާންއަށް އަނިޔާވެ، އެ ޓީމަށް އަނެއްކާވެސް ހާސްކަން އިތުރުވެއްޖެއެވެ.

އައު ސީޒަން ފެށުނު ފަހުން، ޔުނައިޓެޑުގެ މުހިންމު ގިނަ ކުޅުންތެރިންތަކެއް ވަނީ އަނިޔާގެ ސަބަބުން ކުޅުމާ ދުރަށް ދާން ޖެހިފައެވެ. މި ހޫނު މޫސުމުގައި ޓީމަށް ގެނައި މޭސަން މައުންޓާއި ރަސްމުސް ހޮއިލުންޑްވެސް ކުޅުމާ ދުރުގައި ހުރިއިރު، މިދިޔަ ހަފުތާގައި ލޫކް ޝޯއަށްވެސް ވަނީ އަނިޔާވެފައެވެ.

ވަރާންއަށް އަނިޔާވެފައިވަނީ މިދިޔަ ހޮނިހިރު ދުވަހު ނޮޓިންހަމް ފޮރެސްޓް ކައިރިން 3-2ން ޔުނައިޓެޑު މޮޅުވި މެޗުގައެވެ. އަނިޔާވުމާއެކު އޭނާ ވަނީ ހާފު ގަޑީގައި ބަދަލުކޮށްފައެވެ. ރިޕޯޓުތައް ބުނާގޮތުން، ވަރާންއަށް ދެން ކުޅެވޭނީ ހަ ހަފުތާ ފަހުންނެވެ.

ވަރާން ކުޅުމާ ދުރަށް ދާން ޖެހުމާއެކު ހެރީ މެގުއާއަށް ފުރުސަތު ލިބޭނެކަމަށް ބެލެވެއެވެ. ނަމަވެސްް، ހުކުރު ދުވަހު ޓްރާންސްފާ މާކެޓް ނިމުމުގެ ކުރިން އޭނާ އެހެން ޓީމަކަށް ބަދަލުވުމުގެ ފުރުސަތުވެސް އެބައޮތެވެ. މެގުއާ ހޯދުމަށް ކުރިން މަސައްކަތްކުރި ވެސްޓް ހޭމްއިން ވަނީ އޭނާއަށް ބިޑް ނުކުރަން ނިންމާފައެވެ.

މިވަގުތު ޔުނައިޓެޑުގެ ސީނިއަރ ސެންޓަރ ބެކުންގެ ތެރޭގައި ހިމެނެނީ ލިސަންޑްރޯ މާޓިނޭޒްއާއި ވިކްޓާ ލިންޑެލޮފްގެ އިތުރުން މެގުއާއެވެ. ޔުނައިޓެޑުގެ ކުރީގެ ޑިފެންޑަރު ޖޯނީ އިވާންސް އޭނާގެ މިހާރު ހަދާފައިވާ ވަގުތީ ކޮންޓްރެކްޓް ދާއިމީ ކޮންޓްރެކްޓަކަށް ބަދަލުކުރާނެ ކަމަށްވެސް ރިޕޯޓުތަކުން ބުނެފައިވެއެވެ.

މިހާތަނަށް ޔުނައިޓެޑުން މި ސީޒަނުގައި ތިން މެޗު ކުޅެފައިވާއިރު، ހަ ޕޮއިންޓާއެކު އެ ޓީމު އޮތީ ތާވަލުގެ އަށްވަނާގައެވެ. ކުރިޔަށް ދެން އޮންނާނީ އާދިއްތަ ދުވަހު އާސެނަލްއާ ދެކޮޅަށް ކުޅޭ މެޗެވެ.