ޕްރޮފެޝަނަލް ފުޓްބޯލާސް އެސޯސިއޭޝަން (ޕީއެފްއޭ)އިން ހޮވާ އަހަރުގެ އެންމެ މޮޅު ކުޅުންތެރިޔާގެ އެވޯޑް، މެންޗެސްޓަރ ސިޓީގެ އާލިން ބްރައުޓް ހާލަންޑް ހޯދިއިރު، އެންމެ މޮޅު ޒުވާން ކުޅުންތެރިޔާގެ އެވޯޑް އާސެނަލްގެ ބުކަޔޯ ސަކާ ހޯދައިފިއެވެ.

އުމުރުން 23 އަހަރުގެ ހާލަންޑް ވަނީ އޭނާ ސިޓީއަށް ކުޅުނު ފުރަތަމަ ސީޒަނުގައި 52 ލަނޑު ޖަހާފައެވެ. މީގެއިތުރުން، ސިޓީން އިނގިރޭސި ޕްރިމިއަރ ލީގާއި ޗެމްޕިއަންސް ލީގު އަދި އެފްއޭ ކަޕް ކާމިޔާބުކުރުމުގައި ހާލަންޑުގެ ދައުރު ބޮޑެވެ. އޭނާގެ އިތުރުން މި އެވޯޑަށް ވާދަކުރީ ސިޓީގެ ކެވިން ޑި ބްރޭނާއާއި ޖޯން ސްޓޯންސްގެ އިތުރުން އާސެނަލްގެ މާޓިން އެޑެގާޑާއި ބުކަޔޯ ސަކާ އަދި ކުރިން ޓޮޓެންހަމަށް ކުޅުނު ހެރީ ކޭންއެވެ.

ހާލަންޑް ބުނީ މޮޅު ކުޅުންތެރިޔާގެ އެވޯޑް ލިބުމަކީ ބޮޑު ޝަރަފެއް ކަމަށެވެ. އަދި، ވާދަވެރިން އޭނާގެ މަސައްކަތް ބަލައިގަތުމަކީ ލިބުނު ވަރަށް ބޮޑު ހިތްހަމަޖެހުމެއް ކަމަށް ބުންޏެވެ. މީގެއިތުރުން އޭނާ ބުނީ، ސިޓީގައި ހޭދަކުރި ފުރަތަމަ ސީޒަނަކީ ހަނދާނުން ނުފިލާނެ ސީޒަނެއް ކަމަށެވެ. އަދި މި ސީޒަނުގައިވެސް މަސައްކަތްކުރާނީ އެ ކާމިޔާބީތައް ތަކުރާރުކުރަން ކަމަށެވެ.

އެންމެ މޮޅު ޒުވާން ކުޅުންތެރިޔާގެ އެވޯޑް ސަކާ ހޯދިއިރު، އޭނާ ވަނީ އާސެނަލަށް 14 ލަނޑު ޖަހައިދީ، 11 ލަނޑު ޖެހުމަށް އެހީތެރިވެދީފައެވެ. މި އެވޯޑަށް ހާލަންޑްވެސް ވަނީ ވާދަކޮށްފައެވެ. މި ދެ ކުޅުންތެރިންގެ އިތުރުން މި އެވޯޑަށް ވާދަކުރީ ކުރިން ބްރައިޓަނަށް ކުޅުނު މޮއިސެސް ކައިސޭޑޯ، އެސްޓަން ވިލާގެ ޖެކޮބް ރަމްސޭ، ބްރައިޓަންގެ އިވާން ފާގަސަން އަދި އާސެނަލްގެ ގަބްރިއެލް މާޓިނެލީއެވެ.

ޕީއެފްއޭއިން ހޮވާ "ޓީމް އޮފް ދަ އިޔާ"ގައި ސިޓީގެ ފަސް ކުޅުންތެރިންނާއި އާސެނަލްގެ ހަތަރު ކުޅުންތެރިން ހިމެނިފައިވެއެވެ. ސިޓީން ހިމެނިފައިވަނީ ހާލަންޑްގެ އިތުރުން ޑި ބްރޭނާ، ސްޓޯންސް، ރުބެން ޑިއާސް އަދި ރޮޑްރީއެވެ. އާސެނަލްއިން ސަކާގެ އިތުރުން ހޮވިފަައިވަނީ އޮޑެގާޑް، ވިލިއަމް ސަލީބާ އަދި އާރޮން ރަމްސްޑޭލްއެވެ. މީގެއިތުރުން ޓީމުގައި ހިމެނިފައިވަނީ ކޭންއާއި ނިއުކާސަލްގެ ކެއިރެން ޓްރިޕިއާއެވެ.

2021/2022 ވަނަ ސީޒަނުގައި އެންމެ މޮޅު ކުޅުންތެރިޔާގެ އެވޯޑް ލިބިފައިވަނީ ލިވަޕޫލްގެ މުހައްމަދު ސަލާހަށެވެ. އެންމެ މޮޅު ޒުވާން ކުޅުންތެރިޔަކަށް ހޮވުނީ ސިޓީގެ ފިލް ފޯޑެންއެވެ.