ސައުދީ ޕްރޯ ލީގުގައި އަލް ޝަބާބާ ދެކޮޅަށް ކުޅުނު މެޗުން އަލް ނަސްރު މޮޅުވެއްޖެ އެވެ.

އަންގާރަ ދުވަހުގެ ރޭ ކުޅުނު މެޗު އަލް ނަސްރުން ކާމިޔާބު ކުރީ 4-0 އިންނެވެ. މިއީ މި ސީޒަންގެ ލީގުގައި އަލް ނަސްރުން ހޯދި ދެ ވަނަ މޮޅެވެ. ފުރަތަމަ ދެ މެޗުން އެ ޓީމު ވަނީ ބަލިވެފަ އެވެ. ތިން ވަނަ މެޗުން ބޮޑު މޮޅެއް ހޯދީ ކެޕްޓަން ކްރިސްޓިއާނޯ ރޮނާލްޑޯ އާއި ފޯވާޑް ސަޑިއޯ މާނޭގެ ލަނޑުތަކުންނެވެ. ހަތަރު ވަނަ މެޗުގައި ވެސް ރޮނާލްޑޯ އާއި މާނޭ ވަނީ މޮޅަށް ކުޅެފަ އެވެ.

މެޗު ފަށައިގެން 13 ވަނަ މިނެޓުގައި އަލް ނަސްރުން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލިބުނު ޕެނަލްޓީއެއް ކާމިޔާބުކޮށް، ލީޑު ނަގައިދިނީ ރޮނާލްޑޯ އެވެ. އޭގެ ފަހުން ރޮނާލްޑޯ އޭނާގެ ދެ ވަނަ ލަނޑު ޖަހައި، އަލް ނަސްރަށް ލީޑު ފުޅާ ކޮށްދިނީ ވެސް ލިބުނު ޕެނަލްޓީއެއް ކާމިޔާބުކޮށްގެންނެވެ. ފުރަތަމަ ހާފުގެ 40 ވަނަ މިނެޓުގައި އަލް ނަސްރުގެ ތިން ވަނަ ލަނޑު ޖަހައި، އިތުރަށް ލީޑު ފުޅާކޮށްދިނީ މާނޭ އެވެ. މެޗުގައި އަލް ނަސްރުގެ ހަތަރު ވަނަ ލަނޑު އެ ޓީމުން ޖެހީ ދެ ވަނަ ހާފުގަ އެވެ. 80 ވަނަ މިނެޓުގައި އެ ލަނޑު ޖަހައިދިނީ ސުލްތާން އަލް ޣަންނާމް އެވެ.

މޮޅާއެކު އަލް ނަސްރު ވަނީ ލީގު ތާވަލްގެ ހަ ވަނަ އަށް ޖެހިލައިފަ އެވެ. އެއީ ކުޅުނު ހަތަރު މެޗުން ހަ ޕޮއިންޓު ހޯދައިގެންނެވެ. ލީގުގައި އެ ޓީމަށް ދެން އޮންނާނީ ސެޕްޓެމްބަރު މަހުގެ ދެ ވަނަ ދުވަހު އަލް ހަޒަމާ ދެކޮޅަށް ކުޅޭ މެޗެވެ.