މަޑަގަސްކަރާގައި ފިތި ބާރުވެގެން 12 މީހުން މަރުވެއްޖެ، ދިވެހި ކޮންޓިންޖެންޓުންގެ ހާލު ރަނގަޅު
26 އޯގަސްޓު 2023 | ހޮނިހިރު 11:08ހުޅުވުމުގެ ރަސްމިއްޔާތު ބެލުމަށް 50،000ށްވުރެ ގިނަ ބެލުންތެރިން ހާޒިރުވެފައިވޭ
އައިއޯއައިޖީ ހުޅުވުމުގެ ރަސްމިއްޔާތުގެ ތެރެއިން
މަޑަގަސްކަރާގައި ހުކުރު ދުވަހުގެރޭ ފެށި އިންޑިއަން އޯޝަން އައިލެންޑް ގޭމްސް (އައިއޯއައިޖީ) ފެށުމުގެ ރަސްމިއްޔާތަށް، ސްޓޭޑިއަމަށް ވަންނަން އުޅުމުގެ ތެރޭގައި 12 މީހުން މަރުވެ، 80 މީހުން ޒަހަމްވެއްޖެއެވެ.
މި ހާދިސާގައި ދިވެހި ކޮންޓިންޖެންޓުން ސަލާމަތުން ތިބި ކަމަށާއި، ހާލު ރަނގަޅުކަމަށް މޯލްޑިވްސް އޮލިމްޕިކްސް ކޮމިޓީގެ ޓީމުން ވަނީ ކަށަވަރުކޮށްދީފައެވެ. މަޑަގަސްކަރައިގެ މަހާމަސީނާ މުނިސިޕަލް ސްޓޭޑިއަމްގައި ރޭ ބޭއްވި ހުޅުވުމުގެ ރަސްމިއްޔާތު ބެލުމަށް 50،000ށްވުރެ ގިނަ ބެލުންތެރިން ހާޒިރުވެފައިވެއެވެ.
މަޑަގަސްކަރައިގެ ބޮޑުވަޒީރު ކްރިސްޓިއަން އެންޓްސޭ ނޫސްވެރިންނަށް މައުލޫމާތު ދެއްވަމުން، އެންޓަނާނާރިވޯގެ ހޮސްޕިޓަލަކަށް ހަވާލާތީ ވިދާޅުވީ ވަގުތީ އަދަދުން ފެންނަނީ 12 މީހުން މަރުވެ 80 ވަރަކަށް މީހުން ޒަޚަމްވެފައި ވާކަމަށެވެ.
މިއަހަރުގެ މުބާރާތުގައި ރާއްޖޭގެ އިތުރުން ވާދަކުރަނީ މޮރިޝަސް، ކޮމޮރޮސް، މަޔޮޓޭ، ރިޔޫނިއަން، މަޑަގަސްކަރަ އަދި ސީޝެލްސްއެވެ. މި މުބާރާގައި ޖުމްލަ 2000ށްވުރެ ގިނަ އެތުލީޓުން، 17 ކުޅިވަރެއްގައި ވާދަކުރާނެއެވެ.
އިންޑިއަން އޯޝަން އައިލެންޑް ގޭމްސްގެ ކުޅިވަރުތައް ކުރިޔަށް ގެންދިޔުމަށް ހަމަޖެހިފައިވަނީ އޮގަސްޓު މަހުގެ 26 ވަނަ ދުވަހުން ސެޕްޓެންބަރު މަހުގެ ތިންވަނަ ދުވަހުގެ ނިޔަލަށެވެ.
