އެމެރިކާ ފަހަތަށް ޖައްސާލުމަށްފަހު، ފުރަތަމަ ފަހަރަށް ސްވިޑްން ދުނިޔޭގެ އެއްވަނަ އަށް

ފީފާގެ އަންހެން ދުނިޔޭގެ ރޭންކިންގެ އެއް ވަނައިގައި އޮތް އެމެރިކާ ފަހަތަށް ޖައްސާލައި، ސްވިޑަން ފުރަތަމަ ފަހަރަށް ދެ ދަރަޖައިގެ ކުރިއެރުމަކާ އެކު އެއްވަނައަށް ޖެހިލައިފި އެވެ.

މިއީ 2017 ވަނަ އަހަރުގެ ޖޫން މަހުގެ ފަހުން ދުނިޔޭގެ އެންމެ މޮޅު އަންހެން ގައުމީ ޓީމުގެ ގޮތުގައި އެމެރިކާ ނުހިމެނުނު ފުރަތަމަ ފަހަރެވެ. އެމެރިކާ މިހާރު ހިމެނެނީ ތިންވަނައިގައެވެ. އަންހެނުންގެ ވޯލްޑް ކަޕް މި މަހުގެ ކުރީކޮޅު ފުރަތަމަ ފަހަރަށް ކާމިޔާބުކޮށް، ސްޕެއިން މިހާރު ވަނީ ހަތަރު ދަރަޖައިގެ ކުރިއެރުމެއް ހޯދައި ދެ ވަނައަށް ޖެހިލާފަ އެވެ. މުބާރާތުގެ ރަނަރަޕް އަދި ޔޫރޯގެ ޗެމްޕިއަން އިންގްލެންޑް އަދިވެސް އޮތީ ހަތަރު ވަނައިގައެވެ.

ގަދަ 16 ގައި ޕެނަލްޓީ ޖަހައިގެން އެމެރިކާ އަތުން ސްވިޑްން މޮޅުވި ނަމަވެސް ސެމީ ފައިނަލުން ވަނީ ސްޕެއިން އަތުން 2-1 އިން ބަލިވެފައެވެ. އެޔަށްފަހު، ސްވިޑްން އިންވަނީ މުބާރާތް ބޭއްވި އެއް ގައުމުކަމަށްވާ އޮސްޓްރޭލިއާ 2-0 ން ބަލިކޮށް، މުބާރާތުގެ ތިންވަނަ ހޯދާފައެވެ.

އޮސްޓްރޭލިއާ ވަނީ އެއް ދަރަޖަ ފަހަތަށް ގޮސް، 11 ވަނައަށް ވެއްޓިފައެވެ. ގަދަ 10 ގައި އޮސްޓްރޭލިއާގެ ޖާގަ ހޯދީ މުބާރާތުގެ ކުއާޓަރ ފައިނަލް ކުޅުނު ޖަޕާނެވެ. ޖަޕާނު ވަނީ ހަތަރު ދަރަޖައިގެ ކުރިއެރުމަކާއެކު އަށްވަނައަށް ޖެހިލާފައެވެ.

2017 ވަނަ އަހަރު އެމެރިކާ އެއްވަނައަށް އެރީ ޖަރުމަނު ފަހަތަށް ޖައްސާލުމަށްފަހުއެވެ. މިއަހަރުގެ ވޯލްޑް ކަޕް ފެށިއިރު، ޖަރުމަނު އޮތީ ދެވަނައިގައެވެ. ނަމަވެސް، ގުރޫޕް ސްޓޭޖުން ކެޓުމާއެކު އެ ޓީމު ވަނީ ހަވަނައަށް ވެއްޓިފައެވެ.