ސައުދީ ޕްރޯ ލީގުގައި ކަރީމް ބެންޒެމާ ޖެހި ފުރަތަމަ ލަނޑާއެކު އަލް އިއްތިހާދުން ބޮޑު މޮޅެއް ހޯދައިފިއެވެ.
ބުރާސްފަތި ދުވަހުގެރޭ އަލް ރިޔާދާ ދެކޮޅަށް ކުޅުނު މެޗު އިއްތިހާދުން ކާމިޔާބުކުރީ 4-0 ގެ ނަތީޖާއަކުންނެވެ. މި މެޗުގައި ޓީމުގެ ކެޕްޓަންކަން ކޮށްފައިވަނީވެސް ބެންޒެމާ އެވެ. އޭނާގެ އިތުރުން، ފަބީނިއޯ އާއި ކާންޓޭވެސް ވަނީ ފުރަތަމަ 11 ގައި މެޗު ފަށާފައެވެ. ޔޮޓާ ކުޅެން އަރުވާފައިވަނީ ދެވަނަ ހާފުގައެވެ.
މެޗުގެ 17 ވަނަ މިނެޓުގައި ބެންޒެމާ ވަނީ އިއްތިހާދަށް ފުރަތަމަ ލަނޑު ޖަހައިދީފައެވެ. އޭގެ އަށް މިނެޓު ފަހުން ލިބުނު ޕެނަލްޓީއެއް ކާމިޔާބުކޮށް ހަމްދުﷲ ވަނީ ލީޑު ފުޅާކޮށްދީފައެވެ. ފުރަތަމަ ހާފުގެ އިތުރު ވަގުތުގައި އެ ޓީމުގެ ތިންވަނަ ލަނޑު ޖަހައިދިނީވެސް ހަމްދުﷲ އެވެ.
މެޗުގެ 89 ވަނަ މިނެޓުގައި ރިޔާދަށް ވަނީ ޕެނަލްޓީއެއްވެސް ލިބިފައެވެ. ނަމަވެސް އެ ޓީމުގެ ސަލާހް އަލް އައްބާސް އަށް ޕެނަލްޓި ކާމިޔާބުކުރެވޭ ގޮތެއް ނުވިއެވެ. އޭގެ ހަތަރު މިނެޓު ފަހުން ބެންޒެމާ ތަނަވަސްކޮށްދިން ފުރުސަތަކުން، އިއްތިހާދުގެ ހަތަރުވަނަ ލަނޑު ޖަހައިދިނީ ބަދަލު ކުޅުނެތެރިއެއްގެ ގޮތުގައި ކުޅެން ނިކުތް ސަލެހް މުހައްމަދު އަލް ޖަމާން އެވެ.
ބުރާސްފަތި ދުވަހުގެރޭ މިޓްރޮވިޗްގެ ފުރަތަމަ ލަނޑާއެކު އަލް ހިލާލުންވެސް ވަނީ 4-0 ން އަލް ރާއިދު ބަލިކޮށްފައެވެ. މިޓްރޮވިޗް ލަނޑު ޖަހާފައިވަނީ ނެވޭސް ތަނަވަސްކޮށްދިން ފުރުސަތަކުންނެވެ. އެ ޓީމުގެ ދެވަނަ ލަނޑާއި ތިންވަނަ ލަނޑު ޖަހާފައިވަނީ ސަލީމް އެވެ. ފަހު ލަނޑު ޖެހީ އަބްދުﷲ އަލް ހަމްދާން އެވެ. މި މެޗަކީ ދާދި ފަހުން އެ ޓީމަށް ގެނައި މޮރޮކޯގެ ކީޕަރު ބޯނޯ ގެ ވެސް ފުރަތަމަ މެޗެވެ. މި މެޗުގައި އަލް ހިލާލްގެ މިލިންކޮވިޗް-ސަވިޗް އަށާއި އަލް ރާއިދުގެ އުމަރު ގޮންޒާލެޒް އަށް ވަނީ ރަތް ކާޑު ދައްކާފައެވެ.
ފަހުވަގުތު ފްރޭންކް ކެސީ ކާމިޔާބުކުރި ލަނޑާއެކު އަލް އަހްލީ އިންވެސް ވަނީ އަލް އުޚްދޫދު ކައިރިން 1-0 ން މޮޅުވެފައެވެ. ކެސީ ލަނޑު ޖަހާފައިވަނީ ރޮބާޓޯ ފިރްމީނޯ ތަނަވަސްކޮށްދިން ފުރުސަތަކުންނެވެ. މި ދެ ކުޅުންތެރިންގެ އިތުރުން ރިޔާދު މާރޭޒް އާއި އެޑުއާޑް މެންޑީ އާއި އެލިއޯސްކީ އަދި ސެއިންޓް-މެކްސިމިން ފުރަތަމަ 11 ގައި ހިމަނާފައިވެއެވެ. މި މޮޅާއެކު އަލް އަހްލީން ވަނީ ކުޅުނު ތިން މެޗުވެސް ކާމިޔާބުކޮށްފައެވެ.
ލީގުގައި މިހާތަނަށް ތިން ބުރު ނިމުނުއިރު، ނުވަ ޕޮއިންޓާއެކު އެއްވަނައިގައި އޮތީ އަލް އިއްތިހާދެވެ. ދެވަނައިގައިވާ އަލް އަހްލީއަށްވެސް ވަނީ ނުވަ ޕޮއިންޓު ލިބިފައެވެ. ތިންވަނައިގައި އަލް ހިލާލް އަށް ލިބިފައިވަނީ ހަތް ޕޮއިންޓެވެ.
