ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު، ރ. ރަސްމާދޫގައި ސަރުކާރުން ހިންގާފައިވާ ބައެއް މަޝްރޫއުތަކުގެ ނިމުން ފާހަގަކޮށްދެއްވައިފިއެވެ.

ރައީސް މި މަޝްރޫއުތަކުގެ ނިމުން ފާހަގަކޮށްދެއްވާފައި ވަނީ މިހާރު އެމަނިކުފާނު ރ އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ބުރާސްފަތި ދުވަހު އެރަށަށް ވަޑައިގެންނެވެ.

ރަސްމާދުއަށް ވަޑައިގެން އެމަނިކުފާނު ވަނީ އެރަށުގެ ބަނދަރު ހުޅުއްވައިދެއްވައި، އެރަށުގެ ގޮނޑުދޮށް ހިމާޔަތްކުރުމުގެ މަޝްރޫއުގެ ނިމުން ފާހަގަކޮށްދެއްވާފައެވެ. ރަސްމާދޫ ބަނދަރު އަޕްގްރޭޑްކުރުމުގެ މަސައްކަތާއި ގޮނޑުދޮށް ހިމާޔަތްކުރުމުގެ މަޝްރޫއުގެ މަސައްކަތް ކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ)އާ ހަވާލުކޮށްގެންނެވެ. ބަނދަރު އަޕްގްރޭޑްކުރުމުގެ މަޝްރޫއުގެ ދަށުން ނެރާއި ފަޅު ފުންކޮށް، 36 މީޓަރުގެ ގްރޯއިން ޖަހައި، 181 މީޓަރުގެ ރިވެޓްމަންޓް ޖަހައި އަދި 272 މީޓަރުގެ އެއްގަމުތޮށިލައި، 84 މީޓަރުގެ ކޮންކްރީޓް ޖެޓީ ހަދައި، އަދި ބަނދަރާގުޅޭ އެހެން މަސައްކަތްތައް ކޮށްފައިވެއެވެ.

ރަސްމާދޫ ގޮނޑުދޮށް ހިމާޔަތްކުރުމުގެ މަޝްރޫއުގެ ދަށުން 195 މީޓަރުގެ ޓީ-ގްރޮއިން އަދި 186 މީޓަރުގެ ބޮޑުހިލައިގެ ބޭރުތޮށި ލާފައިވެއެވެ.

މީގެ އިތުރުން ރައީސް ވަނީ ރަސްމާދޫ އިންޖީނުގެއާއި ފެނަކަ އޮފީސްވެސް ހުޅުއްވައިދެއްވާފައެވެ. ރަސްމާދޫ އައު އިންޖީނުގެއަކީ މީހުން ދިރިއުޅޭ ސަރަހައްދާ ދުރުގައި އިމާރާތްކޮށްފައިވާ، ކުރިޔަށްވުރެ ޖާގައިގެ ގޮތުން ތަނަވަސް، އަދި ބޭނުންވާ އިތުރު ވަސީލަތްތަކާއެކު އިމާރާތްކޮށްފައިވާ އިންޖީނުގެއެކެވެ. އަދި ކުރީގެ އިންޖީނުގޭގެ ކެޕޭސިޓީއަކީ 653 ކިލޯވޮޓް ނަމަވެސް އައު އިންޖީނުގޭގެ ކެޕޭސިޓީއަކީ 795 ކިލޯވޮޓެވެ.

އަތޮޅުތަކުގެ ރަށްރަށުގައި އަސާސީ ޚިދުމަތްތައް ގާއިމްކޮށް، ރައްޔިތުންގެ ދިރިއުޅުމުގެ ފެންވަރު މަތިކުރުމަށްޓަކައި، ސަރުކާރުން ވަނީ، އަތޮޅުތަކުގެ ރަށްރަށުގައި އުމްރާނީ ތަރައްގީގެ ވަރަށް ގިނަ މަޝްރޫއުތައް ހިންގާފައެވެ.