އިންނަމާދޫ އާއި އިނގުރައިދޫގެ ފެނުގެ ނިޒާމް އިފްތިތާހުކޮށްދެއްވައިފި
24 އޯގަސްޓު 2023 | ބުރާސްފަތި 07:26ސަރުކާރުގެ އަމާޒަކީ މި ދައުރު ނިމުމުގެ ކުރިން ރާއްޖޭގެ ހުރިހާ ރަށެއްގައި ފެނާއި ނަރުދަމާ ޚިދުމަތް ގާއިމްކުރުން
ރައީސުލްޖުމްހޫރިއްޔާ، ރ. އިނގުރައިދޫ ފެނާއި ނަރުދަމާގެ ނިޒާމްގެ ޚިދުމަތާއި ރ. އިންނަމާދޫ ފެނުގެ ނިޒާމްގެ ޚިދުމަތް ރަސްމީކޮށް ފަށްޓަވައިދެއްވުން
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އިންނަމާދޫ އާއި އިނގުރައިދޫގެ ފެނުގެ ނިޒާމް އިފްތިތާހުކޮށްދެއްވައިފިއެވެ.
އިންނަމާދޫ އާއި އިނގުރައިދޫގެ ފެނުގެ ނިޒާމް އިފްތިތާހުކޮށްދެއްވީ މިހާރު އެމަނިކުފާނު މާޅޮސްމަޑުލު އުތުރުބުރި އަށް ކުރައްވަމުންދާ ދަތުރުފުޅުގެ ތެރެއިން ބުރާސްފަތި ދުވަހުއެވެ.
ރ. އިނގުރައިދޫ ފެނާއި ނަރުދަމާ ނިޒާމް ޤާއިމްކުރުމުގެ މަސައްކަތް ކޮށްފައި ވަނީ އަލްޓެކް މޯލްޑިވްސް ޕްރައިވެޓް ލިމިޓެޑުންނެވެ. އަދި، އިންނަމާދޫ ފެނުގެ ނިޒާމް ޤާއިމްކޮށްފައި ވަނީ، މާލޭ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބުލިޔު.އެސް.ސީ)އިންނެވެ.
ރާއްޖޭގެ އެކި ކަންކޮޅުތަކުގައި ފެނާއި ނަރުދަމާގެ ގިނަ މަސައްކަތްތަކެއް ދަނީ ކުރަމުންނެވެ. މީހުން ދިރިއުޅޭ ކޮންމެ ރަށެއްގައި އަސާސީ ޚިދުމަތްތައް ގާއިމްކުރުމަކީ މި ސަރުކާރުން ޚާއްސަ އިސްކަމެއްދޭ އެއް ކަންތަކެވެ. މިގޮތުން މި ޚިދުމަތް ނެތް ރަށްރަށުގައި މި ޚިދުމަތް ގާއިމްކުރުމުގެ މަސައްކަތް އަދިވެސް ދަނީ ކުރަމުންނެވެ. ސަރުކާރުގެ އަމާޒަކީ މި ދައުރު ނިމުމުގެ ކުރިން ރާއްޖޭގެ ހުރިހާ ރަށެއްގައި ފެނާއި ނަރުދަމާ ޚިދުމަތް ގާއިމްކުރުމެވެ.
