ބާސްކެޓް ތަރިންގެ އަމާޒު، ގައުމީ ޖޯޝުގައި މެޑަލް ހޯދުމަށް!

އިންޑިއަން އޯޝަން އައިލެންޑް ގޭމްސް (އައިއޯއައިޖީ) ފެށެން ކުޑަ ދުވަސްކޮޅަކަށް ވެއްޖެ އެވެ. މި މަހުގެ 25 ވަނަ ދުވަހު މަޑަގަސްކަރައިގައި ފެށުމަށް ތައްޔާރުވެފައިވާ އައިއޯއައިޖީ އަށް ދާ ދިވެހި ޓީމުތަކުން ވެސް އެންމެފަހުގެ ތައްޔާރީތަށް ކުރިއަށް ގެންގޮސްފައިވާއިރު، ހުރިހާ އެތުލީޓުންގެވެސް އުންމީދަކީ 2019 ވަނަ އަހަރުގެ މެޑަލް ޓެލީ އިތުރުކޮށް، ގައުމު ހެއްވާލުމެވެ.

ބާސްކެޓް ޓީމުތަކުގެ ވެސް އުންމީދަކީ އެއީ އެވެ. މި ފަހަރުގެ އަންހެން ޓީމާއި ތުރީ އޮން ތުރީ ޓީމުތައް ވެސް އައިއޯއައިޖީން ފެންނާނެ އެވެ. މިއީ، ތުރީ އޮން ތުރީ އަށް މި ގޭމްސްގައި ތާރީހީ ފެށުމެކެވެ.

އެ ތަޖުރިބާ އަށް ފިރިހެން ތުރީ އޮން ތުރީ ބާސްކެޓް ޓީމުގެ ތަރިން ފުރިހަމައަށް ތައްޔާރެވެ. ކުޅުންތެރިންގެ ވިސްނުމުގައި މެޑަލް ނޫން އެހެން އެއްޗެއް ނެތެވެ. އައިއޯއައިޖީގައި ވާދަކުރާ އެހެން ޓީމުތަކުގެ މާ ބޮޑު މައުލޫމާތެއް ލިބިފައި ނުވާ ނަމަވެސް، ތުރީ އޮން ތުރީއަށް ދިވެހި އެތުލީޓުންގެ އުންމީދު ބޮޑެވެ. އެއް ސަބަބަކީ ޓެކްނިކަލީ އަމިއްލަ ނަފްސަށް އޮންނަ އިތުބާރެވެ.

އަމްޒަރުގެ އިތުރުން ޓީމުގައި ހިމެނޭ ހުވައިލިދު އަލީ (ހުވޭ)އާއި އަލަށް އައިއޯއައިޖީގެ ތަޖުރިބާއަކަށް ނުކުންނަ އިސްމާއިލް ވިލްދާނަށް ވެސް މިފަހަރު ތުރީ އޮން ތުރީގެ މެޑަލްއެއް ގައުމަށް ގެނެވޭނެ ކަމުގެ އުންމީދު ބޮޑެވެ.

ވިލްދާން ބުނީ އައިއޯއައިޖީ އަށް އަލަށް ދާ ނަމަވެސް، މެޑަލްއެއް ހިފައިގެން އާދެވެނޭ ކަމަށް ވަރަށް ބޮޑަށް ޔަގީންކުރެވޭ ކަމަށެވެ. އަންހެން ޓީމުން ވެސް ވޭތުވެދިޔަ މަދު އަހަރުތަކެއްގައި މުހިއްމު ކުރިއެރުންތަކެއް ހޯދާފައިވާ އިރު، ޓީމުގެ ތަރިންގެ ނަޒަރުގައި މިފަހަރުވީ ލޯ މެޑަލް ރަނަށް ބަދަލު ކޮށްލަން ލިބޭނެ ފުރުސަތެވެ. މިދިޔަ އަހަރު ރާއްޖޭގައި ބޭއްވި ސާބާ މުބާރާތުން އަންހެން ޓީމަށް ލޯ މެޑަލް ލިބިފައިވާ އިރު، އެ ލޯ މެޑަލް ރަނަށް ބަދަލުކޮށްލަން ޓީމު ތައްޔާރެވެ.

ޒުވާން ކުޅުންތެރިޔާ ރާއީ ހަމްޒާގެ ނަޒަރުގައި ވެސް ޓީމަށް އުންމީދު އެބައޮތެވެ. އޭނާ ބުނީ ފަރިތަކުރުންތައް ވަރަށް ވަރުގަދަކޮށް ކުރިއަށް ގެންދިޔަ ކަމަށާއި، އައިއޯއައިޖީއަށް ވަރަށް ބޮޑު އުންމީދެއް އެބައޮތް ކަމަށެވެ. ހާއްސަކޮށް ސާބާގެ ލޯ މެޑަލް އަކީ ޓީމަށް އިތުބާރު ލިބުމަށް މަގުފަހިވި މެޑަލް އެއް ކަމަށް ވެސް ރާއީ ފާހަގަކުރިއެވެ.