ރާއްޖޭގެ ބާސްކެޓު އަންހެން ޓީމުން ލޯ މެޑަލް ހޯދައިފި

ރާއްޖޭގައި ކުރިއަށް ދިޔަ 16 އަހަރުން ދަށުގެ އޭޝިއާ ކަޕް ސާބާ ކޮލިފިކޭޝަންގައި ދިވެހި ރާއްޖޭގެ އަންހެން ޓީމުން ލޯ މެޑަލް ހޯދައިފި އެވެ.

ރާއްޖެ އިން ލޯ މެޑަލް ހޯދީ ރޭންކިން މެޗުގައި ބަންގްލަދޭޝްގެ މައްޗަށް ކުރި ހޯދައިގެންނެވެ. ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު މެޗުގައި ރާއްޖެ އިން ބަންގްލަދޭޝްގެ މައްޗަށް ކުރި ހޯދީ، 86-22 އިންނެވެ.

މުބާރާތުގައި ރާއްޖެ އިން ކުޅުނު ފުރަތަމަ މެޗުގައި ވެސް ވަނީ ބަންގްލަދޭޝްގެ މައްޗަށް ކުރި ހޯދައިފަ އެވެ. ނަމަވެސް ދެ ވަނަ މެޗުގައި ސްރީ ލަންކާ އަތުން، އަދި ތިން ވަނަ މެޗުގައި އިންޑިއާ އަތުން ވަނީ ބަލިވެފަ އެވެ.

ބަންގްލަދޭޝްއާ ދެކޮޅަށް ކުޅުނު ރޭންކިން މެޗުގެ ހަތަރު ކުއާޓަރުގައި ވެސް ރާއްޖެ އިން ވަނީ ލީޑުގައި އޮވެ ކުޅެފަ އެވެ. އެގޮތުން މެޗުގެ ފުރަތަމަ ކުއާޓަރު ނިމުނުއިރު ރާއްޖެ އިން ލީޑުގައި އޮތީ 23-00 އިންނެވެ.

މެޗުގެ ދެ ވަނަ ކުއާޓަރު ނިމުނުއިރު ރާއްޖެ އިން ލީޑުގައި އޮތީ 15-01 އިންނެވެ. މީގެ އިތުރުން ތިން ވަނަ ކުއާޓަރު ނިންމާލިއިރު ރާއްޖެ އިން 18-08 އިން ލީޑު ކުރިއިރު، ހަތަރު ވަނަ ކުއާޓަރު ނިމުނުއިރު ލީޑު ކުރީ 30-13 އިންނެވެ.

މުބާރާތުގެ ފައިނަލަށް ދިޔުމުގެ ފުރުސަތު ރާއްޖެ އަށް އޮތެވެ. ނަމަވެސް ސްރީ ލަންކާ އާއި އިންޑިއާ އަތުން ބަލިވުމާ އެކު، ރާއްޖެ އަށް ވަނީ ފައިނަލްގެ ފުރުސަތު ގެއްލިފަ އެވެ.