ރާއްޖޭގައި މިހާރު ކުރިއަށްދާ، 16 އަހަރުން ދަށުގެ އޭޝިއާ ކަޕް ސާބާ ކޮލިފިކޭޝަންގައި ދިވެހި ރާއްޖޭގެ އަންހެން ޓީމުން ކުޅުނު ދެ ވަނަ މެޗުގައި ސްރީ ލަންކާ އަތުން ބަލިވެއްޖެ އެވެ.

ހުކުރު ދުވަހުގެ ރޭ ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު މެޗުގައި ލަންކާ އަތުން ރާއްޖެ ބަލިވެފައި ވަނީ 71-45 އިންނެވެ. މުބާރާތުގައި ރާއްޖޭގެ ފުރަތަމަ މެޗުގައި ވަނީ ބަންގްލަދޭޝް އަތުން ތާރީޚީ ކާމިޔާބެއް ހޯދައިފަ އެވެ.

ލަންކާއާ ދެކޮޅަށް ކުޅުނު މެޗު ފަށައިގެން ފުރަތަމަ ކުއާޓަރުގައި ރާއްޖެ އިން ދިޔައީ ރަނގަޅަށް ކުޅެމުންނެވެ. މި ކުއާޓަރުގައި ރާއްޖެ އިން ލީޑު ވެސް ކުރި އެވެ. އެހެން ނަމަވެސް، ފުރަތަމަ ކުއާޓަރުގެ ފަހު ވަގުތުގައި ލަންކާ އިން ވަނީ ކުރި ހޯދައިފަ އެވެ. މެޗުގެ ފުރަތަމަ ކުއާޓަރު ނިމުނުއިރު ލަންކާ ލީޑު ކުރަމުން ދިޔައީ، 15-13 އިންނެވެ.

ދެން ކުޅުނު ތިން ކުއާޓަރުގައި ވެސް ލީޑު ކުރީ ލަންކާ އިންނެވެ. އެގޮތުން ދެ ވަނަ ކުއާޓަރު ނިމުނުއިރު ލަންކާ އިން ލީޑު އޮތީ ތަފާތު ބޮޑު ނަތީޖާ އަކުންނެވެ. އެއީ 15-03 އިންނެވެ. ތިން ވަނަ ކުއާޓަރު ނިމުނުއިރު ލަންކާ އިން ލީޑު ގައި އޮތީ 20-18 އިންނެވެ. އަދި ހަތަރު ވަނަ ކުއާޓަރު ނިމުނުއިރު ލަންކާ އިން ލީޑުގައި އޮތީ 21-11 އިންނެވެ.

މުބާރާތުގައި ލަންކާ އަތުން ބަލިވި ނަމަވެސް، މުބާރާތުގެ ފައިނަލްގެ ފުރުސަތު ރާއްޖެ އަށް އެބަ އޮތެވެ. އެގޮތުން ހޮނިހިރު ދުވަހު އިންޑިއާއާ ދެކޮޅަށް ކުޅޭ މެޗުން މޮޅުވެ، ފައިނަލަށް ދިޔުމުގެ ފުރުސަތު ރާއްޖެ އަށް އޮންނާނެ އެވެ.