ރާއްޖޭގައި މިހާރު ކުރިއަށްދާ، 16 އަހަރުން ދަށުގެ އޭޝިއާ ކަޕް ސާބާ ކޮލިފިކޭޝަންގައި ދިވެހި ރާއްޖޭގެ އަންހެން ޓީމުން ކުޅުނު ތިން ވަނަ މެޗުގައި ވަރުގަދަ އިންޑިއާ އަތުން ނާކާމިޔާބު ވެއްޖެ އެވެ.

ޒުވާނުންގެ މަރުކަޒުގެ އެތެރޭ ކޯޓުގައި ހޮނިހިރު ދުވަހުގެ ހަވީރު އިންޑިއާއާ ދެކޮޅަށް ކުޅުނު މެޗުން ރާއްޖެ ބަލިވެފައި ވަނީ 136-21 އިންނެވެ. މި މެޗުން މޮޅުވެ މުބާރާތުގެ ފައިނަލަށް ދިޔުމުގެ ފުރުސަތު ރާއްޖެ އަށް އޮތެވެ.

މުބާރާތުގައި ރާއްޖެ އިން ކުޅުނު ފުރަތަމަ މެޗުގައި ވަނީ ބަންގްލަދޭޝް އަތުން ތާރީޚީ ކާމިޔާބެއް ހޯދައިފަ އެވެ. ނަމަވެސް މުބާރާތުގެ ދެ ވަނަ މެޗުގައި ސްރީ ލަންކާ އަތުން ރާއްޖެ ވަނީ ބަލިވެފަ އެވެ.

ރާއްޖެއާ ދެކޮޅަށް ކުޅުނު މެޗުގައި އިންޑިއާގެ ފަރާތުން ވަނީ މޮޅު ކުޅުމެއް ފެނިފަ އެވެ. މެޗުގެ ހަތަރު ކުއާޓާރުގައި ވެސް އިންޑިއާ އިން ވަނީ ލީޑުގައި އޮވެ ކުޅެފަ އެވެ.

މެޗުގެ ފުރަތަމަ ކުއާޓަރު ނިމުނުއިރު އިންޑިއާ އިން ލީޑު ގައި އޮތީ 36-02 އިންނެވެ. ދެ ވަނަ ކުއާޓަރު އިންޑިއާ އިން ނިންމާލީ 38-05 އިންނެވެ. މީގެ އިތުރުން ތިން ވަނަ ކުއާޓަރު އިންޑިއާ އިން 31-06 އިން ނިންމާލިއިރު، ހަތަރު ވަނަ ކުއާޓަރު އިންޑިއާ އިން ނިންމާލީ 31-08 އިންނެވެ.

އިންޑިއާ އަތުން ބަލިވެ ރާއްޖެ އަށް ވަނީ މުބާރާތުގެ ފައިނަލްގެ ފުރުސަތު ގެއްލިފަ އެވެ. އެއާ އެކު ދެން ރާއްޖެ ވާދަ ކުރަން ޖެހޭނީ ތިން ވަނަ ހޮވަން ކުޅޭ މެޗުގަ އެވެ.