"މަޖިލިސް ރަނގަޅަށް ހިނގަން ބޭނުންވޭ، ނަމަވެސް މި ސަރުކާރުން މަޖިލިސްތެރެއަކަށް ނުވަންނާނެ"
21 އޯގަސްޓު 2023 | ހޯމަ 11:40މާރިޔާ ވަނީ ރައީސް ސާލިހުގެ ސިޔާސަތުތަކަށް ތައުރީފްކުރައްވާފައި
ރައީސް ސާލިހުގެ ރިޔާސީ ކެމްޕެއިންގެ ތަރުޖަމާނު މާރިޔާ އަހުމަދު ދީދީ
މަޖިލިސް މިނިވަންކަމާއެކު ހިނގާތަން ދެކެވަޑައިގަތުމަކީ ބޭނުންފުޅުވާ ގޮތް ކަމަށާއި، ނަމަވެސް މި ސަރުކާރުން މަޖިލިސް ތެރެއަށް ނުވަންނާނެ ކަމަށް، ރައީސް ސާލިހުގެ ރިޔާސީ ކެމްޕެއިނުގެ ތަރުޖަމާނު މާރިޔާ އަހުމަދު ދީދީ ވިދާޅުވެއްޖެއެވެ.
ހޯމަ ދުވަހަށް އެޖެންޑާކުރި މަޖިލީހުގެ ޖަލްސާގައި އޮތީ ކޮމިޓީތައް އެކުލަވާލުމުގެ މަސައްކަތެވެ. ނަމަވެސް އެ މަސައްކަތް ކުރިއަށް ގެންދަވާފައެއް ނުވެއެވެ. އެކަމާ ގުޅޭގޮތުން ނޫސްވެރިއަކު ދެންނެވި ސުވާލަކަށް ޖަވާބުދެއްވަމުން، ސޯލްޓް ކެފޭގައި ބޭއްވި ނޫސްވެރިންގެ ބައްދަލުވުމެއްގައި މާރިޔާ ވިދާޅުވީ، މަޖިލިސް ރަނގަޅަށް ހިނގާތަން ދެކެވަޑައިގަންނަވަން ބޭނުންފުޅުވާކަމަށެވެ. ތިން ބާރު ވަކިވެފައިވާ ނިޒާމެއްގައި އާއްމު ރައްޔިތުން ބޭނުންވާނީ ތިން ބާރު ވަކިން ހިނގަން ކަމަށް މާރިޔާ ވިދާޅުވިއެވެ. ސަރުކާރުން ވެސް އަބަދުވެސް ބޭނުންވާ ގޮތަކީ އެއީ ކަމަށް މާރިޔާ ވިދާޅުވިއެވެ. މި ސަރުކާރުން މަޖިލީސް ތެރެއަށް ވަދެ، މަޖިލީހުގެ މެމްބަރުން އެތަނުން އުކުންފަދަ ކަންކަން ނުކުރާނެ ކަމަށް މާރިޔާ ވިދާޅުވިއެވެ. މަޖިލީހުގެ މެމްބަރުން ބޭނުންފުޅުވާ ގޮތަކަށް މަޖިލިސް ކުރިއަށްދާނެ ކަމަށް މާރިޔާ ވިދާޅުވިއެވެ. މިނިވަންކަމާއެކު މަޖިލިސް ކުރިއަށް ގެންދަވައި، ހުއްޓިފައިވާ ކަންކަން ކުރިއަށް ގެންދެވުން އެއީ ބޭނުންފުޅުވާ ގޮތް ކަމަށް މާރިޔާ ވިދާޅުވިއެވެ.
މާރިޔާ ވަނީ ރައީސް ސާލިހުގެ ސިޔާސަތުތަކަށް ތައުރީފްކުރައްވާފައެވެ. އެގޮތުން އިދިކޮޅު ކެނޑިޑޭޓުންނާ ޚިލާފަށް، ރައީސް ސާލިހަކީ އިދާރާތަކާއި މުއައްސަސާތައް މިނިވަންކަމާއެކު މަސައްކަތްކުރުމަށް ޖާގަދެއްވާ ބޭފުޅެއް ކަމަށް ވިދާޅުވިއެވެ. އެގޮތުން ކައުންސިލްތައް މިނިވަންކުރެއްވުމަށް ރައީސް ދެއްވާ އިސްކަން އޭނާ ވަނީ ފާހަގަކުރައްވާފައެވެ. ކައުންސިލްތައް ބާރުވެރިކުރުވައި، ކަންކަން ނިންމުމުގެ ބާރު ކައުންސިލްތަކަށް ހޯދައިދިނީ މި ސަރުކާރުން ކަމަށްވެސް މާރިޔާ ވިދާޅުވިއެވެ. މީގެ އިތުރުން މާރިޔާ ވަނީ، މިހާރު ސިޔާސީ މީހުންނަށް ޚިޔާލުފާޅުކުރުމަށް ވަރަށް ފުޅާ ދާއިރާއެއްގައި ފުރުސަތު ހޯދައިދީފައި ވާކަމަށް ވިދާޅުވެފައެވެ. އެއާ ޚިލާފަށް 2018ގެ ރިޔާސީ އިންތިޚާބު އައިއިރު، އޭރުގެ ސަރުކާރުން އިދިކޮޅު މީހުންނަށް ކެމްޕެއިން ކުރަން ފުރުސަތު ނުދޭކަމަށް މާރިޔާ ވިދާޅުވިއެވެ. އޭރު ދިދައެއް ނުވަތަ ބެނާއެއް ދެމިއަަސް އެ އެއްޗެއްވެސް ނަގަމުން ދިޔަކަމަށް މާރިޔާ ވިދާޅުވިއެވެ.
