ރައީސް ސާލިހު، އޭދަފުށީގައި އިސްލާމީ މަރުކަޒެއް އަޅުއްވައިދެއްވާނެކަމުގެ ވައުދުފުޅާއެކު މުހިންމު ގިނަ ވައުދުފުޅުތަކެއް ވެވަޑައިގެންފި
ކުރިއަށް އޮތް ދައުރުގައި ހައުސިންގެ ބޮޑު މަޝްރޫއެއް ކުރިއަށްގެންދާނެ
ރައީސް އިބްރާހީމް މުހައްމަދު ސާލިހު ވާހަކަފުޅުދައްކަވަނީ
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ބ. އޭދަފުށީގައި އިސްލާމީ މަރުކަޒެއް އަޅުއްވައިދެއްވާނެ ކަމުގެ ވައުދުފުޅާއެކު, މުހިންމު ގިނަ ވައުދުފުޅުތަކެއް ވެވަޑައިގެންފިއެވެ.
ބ. އޭދަފުއްޓަށް ވަޑައިގަންނަވައި ބޭއްވެވި ބަނދަރު ބައްދަލުކުރެއްވުމުގައި ރައީސް ވިދާޅުވީ، ކުރިއަށް އޮތް ދައުރަށް އިންތިޚާބު ވެވަޑައިގެންފިނަމަ އޭދަފުށީގެ ހުރިހާ މަގެއް ޒާމާނީ ފެންވަރަށް ތަރައްގީ ކޮށްދެއްވާނެ ކަމަށެވެ. މިހާރު ވެސް ހޮސްޕިޓަލަށް ބޮޑެތި ބަދަލުތަކެއް ގެނެސްފައިވާކަން ފާހަގަކުރައްވައި ރައީސް ވިދާޅުވީ، އަދިވެސް އިތުރަށް ހޮސްޕިޓަލް ތަރައްގީ ކޮށްދެއްވާނެ ކަމަށެވެ.
ބަނދަރަށް އިޝާރާތް ކުރައްވައި ރައީސް ވިދާޅުވީ، މިހާރު އޮތް ބަނދަރު ކުޑަކަމަށާއި، މިމަހުގެ ފަހުކޮޅު ނުވަތަ އަންނަ މަހުގެ ކުރީކޮޅު ހުޅަނގުދެކުނު ފަރާތުގައި އައު ބަނދަރުގެ އަމަލީ މަސައްކަތް ފެށޭނެކަމަށެވެ. އަދި ވިދާޅުވީ އެސަރަހައްދު ތަރައްގީކުރެވިގެންދާނީ ރައްޔިތުން މޫދަށް އެރޭނެ ރީތި ބީޗަކާއެކު ކަމަށެވެ.
މީގެ އިތުރުން ރައީސް ވިދާޅުވީ، ބޯހިޔާވަހިކަމަށް ދިމާވެފައިވާ މައްސަލަވެސް ހައްލު ކޮށްދެއްވާނެ ކަމަށާއި، ކުރިއަށް އޮތް ދައުރުގައި ހައުސިންގެ ބޮޑު މަޝްރޫއެއް ކުރިއަށް ގެންދަވާނެ ކަމަށެވެ.
އޭދަފުށި އެއްކޮށް ބަދަލުކޮށްދެއްވާނެ ކަމުގެ ޔަގީންކަމާއެކު ރައީސް ވިދާޅުވީ އިސްލާމީ މަރުކަޒެއް އަޅުއްވައިދެއްވާނެ ކަމަށާއި, އަދި ޒުވާނުން ބޭނުންވާ ސްޕޯޓްސް ކޮންޕްލެކްސް ގާއިމްކޮށްދެއްވާނެ ކަމަށެވެ.
ރައީސް ވިދާޅުވީ ކުރިއަށް އޮތް ރިޔާސީ އިންތިޚާބަށް ނިކުންނެވީ ރާއްޖޭގެ ހުރިހާ ރައްޔިތުންނަށް ވަކި ރަށެއް ތަފާތު ނުކޮށް އުފާވެރި އަމާން ރާއްޖެއެއް ހޯއްދަވައިދެއްވުމަށް ކަމަށެވެ. އެގޮތުން އޭދަފުށީގެ ރައްޔިތުން ވެސް އެރަށަށް ފައިދާވާނެ ގޮތަށް އަމަލުކުރުމަށް ރައީސް އެދިވަޑައިގެންނެވިއެވެ.
ރައީސް ސާލިހު ވިދާޅުވީ އޭދަފުށީގެ ރައްޔިތުން އަބަދުވެސް ރަށުގެ ތަރައްގީއާ ދޭތެރޭގައި ވިސްނާނެ ކަމަށާއި، އެއީ އެކުވެރިކަމާއި އެއްބައިވަންތަކަން ބޮޑު ރަށެއް ކަމަށެވެ. އެއީ، އަބަދުވެސް ރަށުގެ ތަރައްގީއަށްޓަކައި ކޮންމެ ސަރުކާރަކުން ކަމެއް ކުރިއަސް އެއްބާރުލުންދޭ ރައްޔިތުންތަކެއް ދިރިއުޅޭ ރަށެއްގެ ގޮތުގައި ރައީސް ފާހަގަކުރެއްވިއެވެ.
