މެމްބަރު ސިރާޖު އެމްޑީޕީން ވަކިވެވަޑައިގެންފި
21 އޯގަސްޓު 2023 | ހޯމަ 08:51ނަމަވެސް ޕާޓީން ވަކިވުމާއި ގުޅޭ އިތުރު ތަފްސީލެއް ހާމައެއް ނުކުރައްވާ
ސިރާޖު
ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު މޫސާ ސިރާޖު މޯލްޑިވިއަން ޑިމޮކްރެޓިކް ޕާޓީ (އެމްޑީން) ވަކިވެވަޑައިގެންފިއެވެ.
ސިރާޖު އެ ޕާޓީން ވަކިވެވަޑައިގެންފައި ވަނީ ހޯމަ ދުވަހުއެވެ. އޭނާ އެކަން ހާމަކުރެއްވީ އެމްޑީޕީގެ ޕާލިމެންޓްރީ ގްރޫޕަށް ފޮނުއްވި މެސެޖެއްގައެވެ.
ސިރާޖު މަޖިލީހަށް ހޮވިވަޑައިގަތީ ވެސް އެމްޑީޕީގެ ޓިކެޓުގައެވެ.
ސިރާޖު ކުރެއްވި ޓްވީޓެއްގައި ވިދާޅުވީ ދިވެހި ރައްޔިތުންގެ ޑިމޮކްރަޓިކް ޕާޓީގެ މެންބަރެއްގެ ގޮތުގައި އިތުރަށް ހުންނަން ބޭނުން ނުވާތީ، ހޯމަ ދުވަހުން ފެށިގެން އޭނާ އެމްޑީޕީން ވަކިވެވަޑައިގެންފައިވާ ކަމަށެވެ. އެހެންކަމުން ޕާޓީގެ ދަފްތަރުން އޭނާގެ ނަން އުނިކޮށްދެއްވުމަށް ވަނީ އެދިވަޑައިގެންފައެވެ. ނަމަވެސް ޕާޓީން ވަކިވުމާއި ގުޅޭ އިތުރު ތަފްސީލެއް ހާމައެއް ނުކުރައްވައެވެ.
އެމްޑީޕީ އިން އޭނާ ވަކިވެވަޑައިގަންނަވާފައި ވާއިރު އެމްޑީޕި އަށް ނިސްބަތްވާ ރައްޔިތުންގެ މަޖިލީހުގެ ބައެއް އެހެން މެމްބަރުން ވެސް ވަނީ ދާދިފަހުން އެމްޑީޕީން ވަކިވެވަޑައިގަންނަވާފައެވެ. އެއާއި އެކު މަޖިލީހުގެ ކޮމިޓީތައް އެކުލަވާނުލެވި ދިގުދެމިގެން ދިއުމުގެ ސަބަބުން މަޖިލިސް ވަނީ އެކަށީގެންވާ ގޮތެއްގައި ކުރިއަށް ނުގެންދެވިއެވެ.
