ވޯލްޑް ޓުއާގެ މުބާރާތެއްގައި ވާދަކުރުމަށް އާމިން، ފްރާންސަށް

އިންޓަނޭޝަނަލް ބޮޑީބޯޑިން ކޯޕަރޭޝަން (އައިބީސީ) ވޯލްޑް ޓުއާގެ ފްރާންސް މުބާރާތް ކަމަށްވާ ލެ ސަލީ ޕްރޯ 2023ގައި ވާދަކުރުމަށް, ރާއްޖޭގެ ޒުވާން އެތުލީޓު، އާމިން އުމަރު މޫސާ ފްރާންސަށް ދަތުރުކޮށްފިއެވެ.

ރާއްޖޭގެ ޖޫނިއާ ޗެމްޕިއަން އާމިން ވަނީ، ދާދި ފަހުން ރާއްޖޭގައި ކުރިޔަށްދިޔަ ވޯލްޑް ޓުއާގެ މުބާރާތެއް ކަމަށްވާ ވިޒިޓް މޯލްޑިވްސް ޕްރޯގެ ޖޫނިއާ ބައިގެ ސެމީގައި ވާދަކޮށްފައެވެ. އަދި މިދިޔަ އަހަރުގެ މުބާރާތުގެ ފައިނަލުގައިވެސް އާމިން ވާދަކޮށްފައިވެއެވެ.

ފްރާންސްގައި ކުރިޔަށްދާ މި މުބާރާތަކީ ޖޫނިއާ ފިރިހެން އަދި ޖޫނިއާ އަންހެން ބައި ހިމެނޭ މުބާރާތެކެވެ. މި މުބާރާތް ކުރިޔަށް ގެންދިޔުމަށް ހަމަޖެހިފައިވަނީ މި މަހުގެ 23 ވަނަ ދުވަހުން 27 ވަނަ ދުވަހުގެ ނިޔަލަށެވެ.

މިއަހަރުގެ ވޯލްޑް ޓުއާގައި ހިމެނޭ މުބާރާތްތަކުގެ ތެރެއިން ޖޫނިއާ ފިރިހެން ބައި ހިމެނެނީ ހަ މުބާރާތެއްގައެވެ. އޭގެތެރެއިން މިހާތަނަށް ނިމިފައިވަނީ ދެ މުބާރާތެކެވެ. ވިޒިޓް މޯލްޑިވްސް ޕްރޯގައި އާމިން ވާދަކޮށްފައިވާއިރު، ޗިލީގައި ކުރިޔަށްދިޔަ މުބާރާތުގައި އާމިންއަށް ވާދަކުރެވިފައެއް ނުވެއެވެ. ކުރިޔަށް ދެން އޮންނާނީ ލެ ސަލީ ޕްރޯގެ އިތުރުން ޕޯޗުގަލްގައި ކުރިޔަށްދާ ސިންތާރާ ޕްރޯއާއި މޮރޮކޯ މުބާރާތުގެ އިތުރުން، ސްޕެއިންގައި ކުރިޔަށްދާ މުބާރާތެވެ. މި މުބާރާތްތަކުން ރަނގަޅު ނަތީޖާއެއް ހޯދައިގެން، ދުނިޔޭގެ ޗެމްޕިއަނަކަށް ވުމުގެ ފުރުސަތު އާމިންއަށް އެބައޮތެވެ.