އަންހެނުންގެ ކުޅިވަރުތަކަށް ޚާއްސަކޮށްގެން އޮސްޓްރޭލިއާ އިން މިލިއަން ޑޮލަރު ޚަރަދު ކުރާނެ ކަމަށް އެ ޤައުމުގެ ބޮޑު ވަޒީރު އެންތަނީ އަލްބަނީޒް ވިދާޅުވެއްޖެ އެވެ.
އޭނާ މިހެން ވިދާޅުވީ، އޮސްޓްރޭލިއާގައި އޮތް ކުޅިވަރު އިވެންޓެއްގައި ބައިވެރިވެ ވަޑައިގެން ވާހަކަ ދައްކަވަމުންނެވެ. އޭނާ ވިދާޅުވީ، އަންހެނުންގެ ވޯލްޑް ކަޕްގެ ސަބަބުން އޮސްޓްރޭލިއާގެ މުޅި ކުޅިވަރު ބަދަލުވެއްޖެ ކަމަށެވެ. ޚާއްސަކޮށް އަންހެނުންގެ ކުޅިވަރުތަކާ މެދު ދެކޭ ގޮތް ބަދަލު ކުރަން މަޖުބޫރުވެފައިވާ ކަމަށް ވިދާޅުވި އެވެ. އޭނާ ވިދާޅުވީ އޮސްޓްރޭލިއާގެ ޤައުމީ އަންހެން ފުޓުބޯޅަ ޓީމު ވޯލްޑް ކަޕްގައި ވާދަކުރަމުން ދިޔައިރު، ކުޑަކުދިންނާއި ބޮޑެތި މީހުން ހިމެނޭހެން މުޅި ޤައުމުން ފެނުނީ ކުޅިވަރުގެ އައު ޖޯޝެއް ކަމަށެވެ.
އަންހެނުންގެ ކުޅިވަރަށް ސަރުކާރުގެ ސިޔާސަތުތައް ވެސް ޚާއްސަކުރަން ޖެހޭ ކަމަށް އަލްބަނީޒް ވަނީ ފާހަގަ ކުރައްވައިފަ އެވެ. އަލްބަނީޒް ވަނީ އަންހެނުންގެ ކުޅިވަރު ކުރިއެރުވުމަށް އެ ޤައުމުގެ ސަރުކާރުން ނިންމާފައިވާ ނިންމުން ހާމަކޮށްފަ އެވެ. އެގޮތުން 200 މިލިއަން ޑޮލަރު ޚަރަދު ކުރަން ނިންމާފައިވާ ކަމަށް ވިދާޅުވި އެވެ. އޭގެ ތެރޭގައި ހިމެނޭނީ ކުދިންގެ ކިބައިގައި ހުރި ހުނަރުތައް ދެނެގަތުމާއެކު، އެ ހުނަރުތައް ފުޅާކޮށް، މަތީ ފަންތީގައި ފައިތިލަ ސާބިތުކުރުމަށް އެހީވުން ކަމަށް އަލްބަނީޒް ވިދާޅުވި އެވެ. އިތުރަށް އޭނާ ވިދާޅުވީ އުންމީދަކީ ވީހާ ވެސް ގިނަ ޒުވާނުން ކުޅިވަރުގެ ތެރެއަށް ނިކުތުން ކަމަށާއި، މުސްތަޤުބަލު އުޖާލާ ވާނީ އެމަގުން ކަމަށެވެ.
މިއަހަރުގެ އަންހެނުންގެ ވޯލްޑް ކަޕް ހޯސްޓު ކުރަނީ އޮސްޓްރޭލިއާ އަދި ނިއުޒިލެންޑު ގުޅިގެންނެވެ. އަމިއްލަ ޤައުމުގައި އޮތް މުބާރާތުގައި އޮސްޓްރޭލިއާ ވަނީ ތިން ވަނަ ހޮވާ މެޗުގައި ވާދަކޮށްފަ އެވެ. ތިން ވަނަ ހޮވާ މެޗުން ބަލިވެ، އޮސްޓްރޭލިއާ އަށް ލިބުނީ ހަތަރު ވަނަ އެވެ.
