ޕީއެސްޖީތެރޭގައި އުފެދިފައިވާ ނުތަވަސްކަން ނިމުމަކަށް އައިސް ފޯވަޑް ކީލިއަން އެމްބާޕާ ޕްރެކްޓިހަށް ނުކުތީ ބްރެޒިލްގެ ފޯވަޑް ނޭމާ ވިއްކާލުމުން ކަމަށް ފްރާންސްގެ ނޫސްތަކުން ބުނަން ފަށައިފި އެވެ.
ދުނިޔޭގެ އެންމެ މޮޅު ދެ ކުޅުންތެރިންގެ ތެރޭގައި ހިމެނޭ މި ދެ ކުޅުންތެރިންގެ ގުޅުން ވެސް ކުރިން އެހާ ރަނގަޅެއްނޫނެވެ. ފްރާންސްގެ ނޫސްތަކުން ބުނަނީ އެމްބާޕޭ ޕީއެސްޖީގެ ކޮންޓްރެކްޓް އައުކޮށް ޕްރެކްޓިހަށް ނުކުންނަން ފެށީ ނޭމާ ވިއްކާލުމުން ކަމަށެވެ. އަދި ޕީއެސްޖީގައި މަޑުނުކޮށް، ސްޕޭނުގެ ރެއާލް މެޑްރިޑަށް ބަދަލުވާން އެމްބާޕޭ ގަދަހަދާލައިގެން އުޅުނު އެއް ސަބަބަކީ ވެސް ނޭމާއާއެކު ކުޅެން ބޭނުންނުވުން ކަމަށެވެ.
އަދި ޕީއެސްޖީ އާއި އެމްބާޕޭއާ ދެމެދު އުފެދުނު އަލިފާންގަނޑު ފިނިވީ މި ސީޒަނުގައި އެމްބާޕޭއާއެކު ކުޅެން ނޭމާ ނުހުންނާނެކަން ކަށަވަރުވެ، ފްރާންސްގެ ވިންގަރ އޮސްމާނޭ ޑެމްބެލޭ ޕީއެސްޖީ އަށް ގަތުމުންނެވެ. ޑެމްބެލޭއަކީ އެމްބާޕޭގެ ރަހުމަތްތެރިއެކެވެ. އޭނާ ޕީއެސްޖީ އަށް ބަދަލުވުމުން އެންމެ ފުރަތަމަ މަރުހަބާ ކިޔައި ހެދި ކުޅުންތެރިއަކީ ވެސް އެމްބާޕޭ އެވެ.
އެމްބާޕޭއާއެކު ޕީއެސްޖީން އެންމެ ފަހުން ހެދި ކޮންޓްރެކްޓްގައިބުނާ ގޮތުން ކުލަބަށް ގެންނާނެ ކުޅުންތެރިންނާއި ވިއްކާލަންވީ ކުޅުންތެރިން ކަނޑައެޅުމުގައި އޭނާ އަށް ބަސް ބުނެވެ އެވެ. އަދި ނޭމާ ވިއްކާލުމަކީ އޭނާ މާކުރިން ވެސް ފެށިގެން ކުލަބަށް ޕްރެޝަރުކުރަމުންދިޔަ ކަމެއް ކަމަށް ވެސް ފްރާންސްގެ ނޫސްތަކުން ބުނެ އެވެ.
ދުނިޔޭގެ އެންމެ މޮޅު ފޯވަޑް ލައިން މިދިޔަ ދެ ސީޒަނުގައި އޮތީ ޕީއެސްޖީގަ އެވެ. ނޭމާ އާއި އެމްބާޕޭ އަކީ އާޖެންޓީނާގެ ކެޕްޓަން ލަޔޮނަލް މެސީ ހިމެނުނު ފޯވަޑް ލައިނަށް ފްރާންސް ލީގު ހޯދައިދިނުން ފިޔަވައި އިތުރު ކާމިޔާބީއެއް ނުހޯދުނެވެ. މިއަށްވުރެ ބޮޑަށް ފެނިގެންދިޔައީ ކުޅުންތެރިންގެ މެދުގައި ކޯޅުން ބޮޑުކޮށެވެ.
މެސީ ކުލަބު ދޫކޮށްލީ ސަޕޯޓަރުންނާމެދު އުފެދުނު ނުތަނަވަސްކަމެއްގަ އެވެ. ނޭމާ ޕީއެސްޖީ ދޫކޮށްލީ އޭނާ އެކުލަބުން ދިއުމަށް ސަޕޯޓަރުން ހަޅުތާލު ކޮށްފައިވަނިކޮށެވެ. އަދި އޭނާގެ ފުށުން އެކަށީގެންވާ ކުޅުމެއް ނުދެއްކުމާއި އަނިޔާގައި ހޭދަވާ ދުވަސްތައް ގިނަކަމުން ޕީއެސްޖީން ވެސް އޮތީ ނޭމާ ވިއްކާލަން ތައްޔާރަށެވެ. އޭނާ ބަދަލުވީ ސައޫދީ އަރަބިއްޔާގެ އަލް ހިލާލަށެވެ. އެމްބާޕޭ މިވަގުތުހުރީ ކޮންޓްރެކްޓް 2025އަށް އައުކުރާގޮތަށެވެ. އެކަމަކު ސްޕޭނުގެ ރެއާލް މެޑްރިޑަށް ދާން އޭނާ ބޭނުންވެ އެވެ.
