ނޭމާ ޖޫނިއާސް ފައިވް މުބާރާތުގައި ވަރުގަދަ ސްޕެއިން އަދި އިންޑިއާ ކަޓުވާލުމަށްފަހު، ރާއްޖޭގެ ކްލަބް ޓީނޭޖް ދެވަނަ ބުރަށް ދަތުރުކޮށްފި އެވެ.

ހުކުރު ދުވަހުގެ ރޭ ފެށި މި މުބާރާތުގައި ރާއްޖެ ހަތަރު މެޗެއް ވަނީ ކުޅެފައެވެ. އޭގެ ތެރެއިން ދެ މެޗުން ރާއްޖެ މޮޅުވިއިރު، އަނެއް ދެ މެޗުން ރާއްޖެ ވަނީ ބަލިވެފައެވެ.

ރާއްޖެ ބަލިވީ މެލޭޝިއާ އަދި ސްވިޑެން އަތުންނެވެ. މެލޭޝިއާ އަތުން 0-5 ގެ ނަތީޖާއަކުން ރާއްޖެ ބަލިވިއިރު، ސްވިޑެން އަތުން ރާއްޖެ ބަލިވީ ފަހުވަގުތު 2-3 ގެ ނަތީޖާއަކުންނެވެ.

ރާއްޖެ މޮޅުވީ ސްޕެއިން އަދި އިންޑިއާ އަތުންނެވެ. އިންޑިއާ އަތުން 1-5 ގެ ނަތީޖާއިން ރާއްޖެ މޮޅުވިއިރު، ސްޕެއިން އަތުން ރާއްޖެ މޮޅުވީ 2-5 ގެ ނަތީޖާއަކުންނެވެ.

ރާއްޖެ ހިމެނޭ ގްރޫޕް އައިގެ އެއްވަނަ 10 ޕޮއިންޓާއެކު ލަނޑުގެ ތަފާތުން މެލޭޝިއާ ހޯދިއިރު، ދެވަނަ ލިބުނީ 10 ޕޮއިންޓާއެކު ލަނޑުގެ ތަފާތުން ސްވިޑެންއަށެވެ. ތިންވަނަ ހަ ޕޮއިންޓާއެކު ރާއްޖެ ހޯދާފައިވާއިރު، ހަތަރުވަނަ ތިން ޕޮއިންޓާއެކު ލިބުނީ ސްޕެއިން އަށެވެ. އަދި ގްރޫޕްގެ ފުލަށް އެއްވެސް ޕޮއިންޓެއް ނުލިބި ދިޔައީ އިންޑިއާއެވެ.

ޖުމްލަ 53 ގައުމަކުން 104،228 ކުޅުންތެރިން ބައިވެރިވާ މި މުބާރާތުގެ ދެވަނަ ބުރުގައި ރާއްޖެ ނިކުންނާނީ ޖަޕާނާ ދެކޮޅަށެވެ. މި މެޗު ކުޅޭނީ ހޮނިހިރު ދުވަހު އެވެ.

ޓީނޭޖުގައި ހިމެނޭ ކުޅުންތެރިންނަކީ އިސްމާއިލް ފާތިހް، ޔޫސުފް އުމަރު، މުހައްމަދު ރިއްފަތު (ރިއްޕެ)، އަހްމަދު އަޔާޒް (އަޔާ)، ރިހާމް އަބްދުލް ގާނީ (ބޮބީ)، ހުސެން ޝަރީފް (އޮންލީ) އަދި އިސްމާއިލް މުބީން (މުއްކި) އެވެ.

ވޭތުވެދިޔަ އަހަރު މިމުބާރާތުގެ ޗެމްޕިއަން ޓީމު ވަނީ ވީއައިޕީ ޓިކެޓުގައި ބާސެލޯނާ އަށް ގޮސް ބާސާގެ ޓުރެއިނިން ގުރައުންޑުގައި ނޭމާ އާ ބައްދަލުކޮށްފައެވެ. ނޭމާ ބުނެފައި ވަނީ މިއަހަރު ވެސް ފައިނަލުން މޮޅުވެ ގަދަ ފަހެއްގައި ހިމެނޭނެ ކުޅުންތެރިންނާ ބައްދަލު ކުރުމަށް ކެތް މަދުވެފައިވާ ކަމަށެވެ.