ވަކި ތެއްޔެއްގައި ކައްކާ، ސަރވްކޮށްގެން ނޫނީ ފުރިހަމަ ނުވާ ކޭމެއް!

ކޮންމެ ޤައުމަކީވެސް މުއްސަނދި ތާރީޚަކާއި ޘަޤާފަތެއް ލިބިފައި އޮތް ޤައުމެކެވެ. ދުނިޔަވީ ކޯޅުންތަކާއި ހަނގުރާމަތަކުގައި މުޅި ޤައުމު ސުންނާފަތިވެގެން ދިޔަ ކަމުގައި ވީ ނަމަވެސް، އަގުހުރި ތަރިކައަކަށްވެއެވެ. އެތައް އަހަރަކަށް ދިގުލައި ދިޔަ ހަނގުރާމައިގެ ސަބަބުން ހަފުސްވެފައި އޮތް ޔަމަނުގައިވެސް އިސްތިސްނާއެއް ނެތެވެ.

ޔަމަނުގެ ޘަޤާފީ ތަރިކައިގެ ތެރެއިން އެންމެ ފާހަގަ ކޮށްލެވޭ އެއް ކަމަކީ ޔަމަނުގެ ޚާއްޞަ ކޭންތަކެވެ. ވަކިން ޚާއްޞަކޮށް ވަރުގަދަ އަލިފާންގަނޑުތަކުގައި ތައްޔާރު ކުރާ ކޭންތަކަށް ޔަމަނު ވަނީ މަޝްހޫރުވެފައެވެ. މިފަދަ ކޭންތައް ތައްޔާރު ކުރަނީ ހިލައިން ހަދާފައި ހުންނަ ޚާއްޞަ ތެއްޔެއްގައެވެ. ޔަމަނުގެ ބައެއް ބަދިގެ ތަކުން މިއަދުވެސް އެފަދަ ތެލިތެލީގައި ކައްކާލާފައި ހުންނަ މީރު ކޭންތައް ލިބެއެވެ.

އަމިއްލަ އަތުން ހަދާފައި ހުންނަ މި ހިލަ ތެއްޔަކީ ތިމާވެއްޓާ ރައްޓެހި ތެއްޔެކެވެ. މަޤްލާ ނުވަތަ ހަރަޟާގެ ނަމުން ނަން ދީފައިވާ މި ތެލި ހަދަން ހިލަ ކަނޑަނީވެސް ޔަމަނުންނެވެ. ބިމު އަޑިންނެވެ. ޔަމަނުގެ ހުޅަނގު އުތުރުގެ ޕްރޮވިންސެއް ކަމަށް ވާ ސާދާގެ ރާޒިހުގެ ފަރުބަދަތަކުން ކަނޑާ މި ހިލައަކީ ގިނަ ޢަދަދަކަށް މިނަރަލް އެކުލެވިގެން ވާ ހިލައެކެވެ.

ޢަލީ އަލް ރަޒީހީއަކީ މަޤްލާ ތެލި ހަދާ މީހެކެވެ. އޭނާ މި ހުނަރު ދަސް ކުރީ އޭނާގެ ބައްޕަގެ ގާތުންނެވެ. އެއްބަނޑު އެއްބަފާ މީހުންގެ ފަރާތުންވެސް ބައެއް ހުނަރުތައް ދަސްކުރިއެވެ.

ޔަމަނަށް ޚާއްޞަ، އެ ޤައުމުގެ ކޭމެއް ތައްޔާރު ކުރާނަމަ މަޤްލާ ތެއްޔެއް ކޮންމެހެންވެސް ބޭނުންވާނެއެވެ. މަޤްލާ ތެއްޔަކާ ނުލާ، ޔަމަނުގެ ކޭންތަކުގެ އަސްލު ރަހަ ނުނިކުންނަ ކަމަށްވެއެވެ.

ޔަމަނުގެ ވެރިކަން ކުރާ ސަނާގެ ރެސްޓޯރަންޓެއްގެ ކައްކައާއި، އެ ރެސްޓޯރަންޓްގެ ވެރި ފަރަތުންވެސް މިކަމަށް އެއްބަސްވެއެވެ.

ޔަމަނަށް ޚާއްޞާ ކޭންތައް ކަސްޓަމަރުންނާ ހިސާބަށް ގެންދަނީވެސް މަޤްލާ ތެލިތަކުގައެވެ. ކައި ނިމޭއިރުވެސް ތެލީގައި ހޫނުކަން ހުރުމުގެ ސަބަބުން، ރަހަތައް އިތުރަށް ހެޔޮވަރުކޮށްލައެވެ. އެނޫން ގޮތަކަށް ސަރވް ކުރާ ކޭންތަކުގެ ރަހަ ތަފާތުކަމަށް ކަސްޓަމަރުންވެސް ބުނެއެވެ.

ޔަމަނުގެ ކޮންމެ ގޭބިސީއަކަށް ބަލާލިއަސް މަޤްލާ ތެއްޔެއް ފެންނާނެއެވެ. ކޮންމެ ތެއްޔަކީވެސް ޢާއިލީ އެތައް ހަނދާނަކާ ގުޅިފައި އޮންނަ ތެއްޔެކެވެ. ކޮންމެ ތެއްޔަކީވެސް މީހެއްގެ އަމިއްލަ އަތުން ތައްޔާރުކޮށްފައި ވާ ތެއްޔެކެވެ. އެއްވެސް ވަރަކަށް މެޝިނަރީ ބޭނުން ކުރުމެއް ނެތިއެވެ. މިއީ ބިންމައްޗަށް ވައްޓާނުލާނަމަ، ޢުމުރު ދުވަހަށްވެސް ގެންގުޅެވިދާނެ ތެއްޔެކެވެ.